Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 97

Och tal bitʼil ajwalil te Jesuse

Och tal bitʼil ajwalil te Jesuse

TE KʼALAL mato jaluk slajel yoʼtan te Jesús ta slekubtesel te chaʼtul jkʼambajel maʼsitetike, bajtʼ ta tut lum te nopol yiloj sba sok te Jerusalene. Jich la yalbey chaʼtul jnopojeletik yuʼun: Baanik ta tut lum teyme ya ataik jkojt jkolel burro. Tilaik sok ikʼbonik tal.

Te kʼalal ikʼbotik tal te jkolel burro ta stojol te Jesuse, tey kajaj-a jich bajtʼ ta Jerusalén te maba namal aye. Te kʼalal nopol ya xkʼotix ta lum-ae, ay ipal ants winiketik te lokʼ ta tael yuʼune. Jteb ma spisiluk la slokʼes smukʼul kʼuʼik la slimtiklanik ta be. Ay yantik te la slimik yabenal palmera sok jich la yalik ta aw: ¡Bayalukme yutsil te ajwalil te ya xtal ta swenta sbiil te Jehová!

Te yachʼil ajwaliletik ta namey kʼinal ta Israel kajal ta burro ya x-ochik bael ta Jerusalén yuʼun jich ya yakʼ sbaik ta ilel ta stojol-a te lume. Jaʼme jich la spas euk te Jesuse. Te ants winiketik ini la yakʼik ta ilel te la skʼanik te jaʼuk ajwalil kʼot yuʼunik te Jesuse. Jaʼukmeto ma spisiluk la skʼanik. Jaʼ ini ya jnaʼtik ta swenta te bin kʼot ta pasel te kʼalal bajtʼ ta Temploe.

Te Jesús la slekubtes te maʼsitetik sok te machʼatik chamen yok skʼabik tey ta Templo. Kʼalal te alaletik la yilik ini, jajchik ta aw ta yalbeyel yutsil skʼoplal te Jesús. Ta swenta ini ilinik yuʼun te sacerdoteetike jaʼ yuʼun jich la yalbeyik te Jesuse: ¿Yabal awaʼiy te bin yakalik ta yalel te alaletike?

Yak, xchi te Jesuse. ¿Mabal ayuk awilojik ta Biblia te banti ya yal: Ta ye alaletik te Dios la yakʼ ta alel utsil kʼopetike? Jich yuʼun ma la skom sbaik te alaletik ta yalbeyel yutsil skʼoplal te ajwalil tsabil yuʼun te Diose.

¿Mabal jich ya jkʼantik te jichukotik te bitʼil te alaletik ini? Ayniwan machʼatik te ya skʼanik te yakuk jkom jbatik ta yalbeyel skʼoplal te ajwalinel yuʼun Diose. Jaʼukmeto maba ya jkom jbatik ta yalel te bintik chajpnax yato spas bael ta stojol ants winiketik te Jesuse.

Te kʼalal ayto ta Balumilal-a te Jesuse mato yorailuk-a te ya xjajch ta pasaw ta mantale. ¿Bin ora ya xkʼotix ta pasel-a? Te jnopojeletike la skʼan snaʼik te bin orae. Yatome kiltik bael ta swenta ini.

Mateo 21:1-17; Juan 12:12-16.