Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Aʼyejetik te lokʼem ta Biblia

 AʼIYEJ 108

Ta sbelal Damasco

Ta sbelal Damasco

¿YABAL anaʼ machʼa-a te metsel ta lume? Jaʼ te Sauloe, te machʼa la skanantaybey snajtʼil kʼuʼik te machʼatik la schʼojik ta ton te Estebane. ¡Ilawil te xojob te xlemetnaxe! ¿Bin yak ta kʼoel ta pasel?

Te kʼalal lajemix-a te Estebane, te Saulo bajtʼ ta sleel te jnopojeletik yuʼun Jesús yuʼun jich ya yutsʼinlan-a. Och ta nanatik la stsaktiklan lokʼel tal sok la yakʼtiklan ta chukel. Bayal ta jtul jnopojeletik te anik bael ta yantik lumetike, tey la yalik-a te lek yachʼil kʼope. Jaʼukmeto te Saulo bajtʼ ta yantik lumetik ta sleel te jnopojeletik yuʼun te Jesuse. Ta yorail-abi bajtʼ ta Damasco. Jaʼukmeto, ay bin-a te chajpnax kʼot ta pasel ta bee:

Ta oranax ay bin chiknaj tal xojobil ta chʼulchan te joytayot yuʼun te Sauloe. Yal bael ta lum te Sauloe, jich te bitʼil ya kiltik ta lokʼombae. Tey-abi ay machʼa jich kʼopoj te jich la yale: ¡Saulo, Saulo! ¿Bin yuʼun te ya awutsʼinone? Te winiketik te jokimbilik yuʼun te Sauloe la yilik te xojob te xlemetnaxe sok la yaʼiyik te machʼa kʼopoje, jaʼukmeto ma la snaʼbeyik swentail te bin la yichʼ alele.

¿Machʼaat-a, Kajwal?, xchi te Sauloe.

Joʼon te Jesusone, te machʼa yakat ta yutsʼinele, xchi te machʼa kʼopoje. Jaʼ yuʼun te kʼalal te Saulo yak ta yutsʼinel-a te jnopojeletik yuʼun te Jesuse, jaʼ yak ta utsʼinel kʼoem ya yaʼiy sba te Jesuse.

Jich la sjojkʼoy te Sauloe: ¿Bin ya skʼan ya jpas, Kajwal?

Jich la yal te Jesuse: Jajchan, ochan bael ta Damasco. Teyme ya awichʼ albeyel-a te bin ya skʼan ya apase. Te kʼalal la stam sba jajchele sok te kʼalal la swikʼ sit te Sauloe, ma la yilix kʼinal-a. ¡Tupʼ te site! Jaʼ yuʼun te winiketik te jokimbilik yuʼune la snitik bael kʼalal ta Damasco.

Tey-abi te Jesús la skʼopon jtul jnopojel ta Damasco jich la yalbey: Jajchan, Ananías. Baan ta calle te Toj sbiile. Ta banti te sna Judas jojkʼoya ta swenta jtul winik te sbiilinej Saulo. Jtsaojix yuʼun ya xkʼot ta j-abat kuʼun sok te ya kakʼbey mukʼ yaʼtele.

La schʼuun mantal te Ananiase, jich te kʼalal la yil te Sauloe la skajambey skʼab ta sjol jich la yal: Jaʼ la stikunon tal te Kajwaltik yuʼun ya awilxan kʼinal sok te yakuk xnoj ta awoʼtan te chʼul espiritue. Ta oranax ay bin chʼay koel ta sit te Saulo jich yilel te bitʼil te sulil chaye, jich la yilxan kʼinal.

Te Saulo la yichʼ tuuntesel ta xcholbeyel skʼop Dios yaʼiy te ants winiketik ta yanyantik nacionetik. La yichʼ naʼbeyel sba jich bitʼil jpuk kʼop Pablo, patiltome ya jnoptikxan bael ta swenta. Jaʼukmeto nail akʼa kiltik te bin kʼambot yuʼun Dios te akʼa spas te Pedroe.

Hechos 8:1-4; 9:1-20; 22:6-16; 26:8-20.