Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 69

Jtul tut achʼix la skoltay jtul winik te mukʼ skʼoplale

Jtul tut achʼix la skoltay jtul winik te mukʼ skʼoplale

¿YABAL anaʼ te bin yak ta yalel te tut achʼix ini? Jaʼ yak ta yalbeyel te ants ta swenta te Eliseo te j-alwanej yuʼun Jehová, sok ta swenta te bintik chajpnax ya x-akʼbot spas yuʼun te Jehovae. Te ants ini ma snaʼbey sba te Jehovae, melel ma israel antsuk. Jaʼ yuʼun yame kiltik bael bin yuʼun te achʼix ini te ay ta sna te antse.

Te antse jaʼ slumal te Siriae. Te smamlale Naamán te sbiile, jaʼ capitán yuʼun te soldadoetik yuʼun Siria. Te tut achʼix ini, la yichʼ tsakel bael yuʼun te asiriaetike. Jaʼ kʼot ta j-abat yuʼun te yinam te Naamán.

Te Naamán ay bol chamel yichʼoj, jaʼ te kʼael chamele. Te chamel ini kʼunkʼun ya yakʼ te ay machʼa ya xkʼotspʼij koel jujun xujtʼuk te sbakʼetale. Jaʼ yuʼun jich yak ta yalel te tut achʼix ini: Te yakuk xbajtʼ te kajwal ta stojol te j-alwanej yuʼun Jehová ta Israel, ya xlekubtesot ta swenta yuʼun te schamele. Ta swenta ini la yichʼ albeyel te smamlal te antse.

Ya skʼan ya xlekub yuʼun te schamel te Naamane, jaʼ yuʼun la schʼuun te ya xbajtʼ ta Israele. Te kʼalal kʼot tey-ae, bajtʼ yil ta sna te Eliseoe. Jich te Eliseo jaʼ la stikun lokʼel te j-abat yuʼun sok te jichuk ya yalbey te Naamán te akʼa bajtʼuk spok sba jukeb buelta ta mukʼul jaʼ Jordán. Bayal ilin yuʼun te Naamán sok jich la yal: ¡Jaʼ kʼax lekikxan te mukʼul jaʼetik ta jlumal te bitʼil ayik ta Israele! Te kʼalal laj yoʼtan ta yalel ini, jich-a bajtʼ.

Jaʼukmeto te j-abatetik yuʼune jich la yalbeyik: Kajwal te ayuk bin tulan la yakʼbat apas te Eliseoe, ¿mabal yakuk apas? Jich yuʼun, ¿bin yuʼunix-a te ma xjuʼ ya apok aba, jich te bitʼil la yalbate? Te Naamán la yichʼ ta mukʼ te bin albot yuʼun te j-abatetik yuʼune, jich bajtʼ smul sba jukeb buelta ta mukʼul jaʼ Jordán. ¡Te kʼalal jich la spas ini, toj lekubel te sbakʼetale!

Kʼax tseʼel yoʼtan te Naamán. Sujt bael te banti ay te Eliseo sok jich la yalbey: Yoʼtik la jnaʼix te maʼyuk yan Dios ta swolol Balumilal, jaʼnax stukel te ay ta Israele. Jaʼ yuʼun, awokoluk, tsaka te majtʼanil ini. Jaʼukmeto te Eliseoe jich la yal: Maba ya jtsak. Snaʼoj stojol te Eliseo te maba lek teme ya stsak te majtʼanile, melel te machʼa la slekubtes te Naamane jaʼ te Jehovae. Yan stukel te Giezi (Guehazí) te j-abat yuʼun te Eliseo la skʼan yuʼunin stukel te majtʼanile.

Jaʼ yuʼun jich la spas ini. Te kʼalal baemix-a te Naamane, te Giezi la snuts bael ta animal te Naamán te jich la stae. Te Giezi jich la yal: La stikunon tal te Eliseo yuʼun jich ya kalbat, te yakuklaj awakʼbey jtebuk te majtʼanile yuʼun ay julelto chaʼoxtul j-ulaʼetik yuʼun te jaʼ ya skʼan ya yakʼbeye. Jaʼ ini ma meleluk. Jaʼukmeto ma snaʼojuk stojol te Naamane, jich yuʼun la yakʼbey bael cheʼoxebuk biluketik te Giezie.

Te kʼalal sujt bael te Giezi, te Eliseo snaʼojix-a te bin la spase, melel jaʼ akʼbot snaʼ yuʼun te Jehovae. Jaʼ yuʼun jich la yalbey: Ta swenta te bin chopol la apas ini, te skʼael chamel te Naamán jaʼme ya xkʼot ta atojol. ¡Jich kʼot ta pasel ta oranax!

¿Bin ya xjuʼ ya jnoptik ta swenta spisil ini? Ta sbabial jaʼ te yakuk kalbeytik yaʼiy yantik ta swenta te Jehovae jich te bitʼil la spas te tut achʼixe, yuʼun jich bayal machʼa ya sta koltayel-a. Ta xchebal mame skʼan te ya jtoy jbatik jich bitʼil la spas ta nailal te Naamane, jaʼ lek te ya jchʼuumbeytik te bin ya yal te j-abatetik yuʼun te Jehovae. Ta yoxebal mame skʼan te ya jpastik lot jich bitʼil te Giezie. ¿Mabal jichuk te bayal bintik ya xjuʼ ya jnoptik ta swenta te Bibliae?

2 Reyes 5:1-27.