Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 60

Te Abigail sok te David

Te Abigail sok te David

¿YABAL anaʼbey sba te tʼujbil ants te yak ta talel ta yilel te Davide? Abigail te sbiile, ya snaʼ lek snopel te bin ya spase, jich la skom ta spasel bin chopol te Davide. Jaʼukmeto nail ya kiltik bin-a te yak ta kʼoel ta pasel ta stojol te Davide, ta patil ya kiltik bin-a te kʼan spase.

Te kʼalal lokʼ bael ta anel ta stojol Saúl te Davide, la snakʼ sba ta chʼen. Te sbankiltak sok te yantik machʼatik ay yuʼune, talik ta jokinel yuʼun. Ayniwan 400 ta jtul winiketik te talik ta stojole, jich och ta jwolwanej yuʼunik. Ta patil, te David bajtʼ ta stojol te ajwalil yuʼun Moab, jich la yalbey: Ya kalbat wokol te yakuk sjokinex jilel te jmeʼ jtat jaʼto te kʼalal ya kil te bin ya xkʼot ta jtojole. Jich yuʼun ta patil te David sok te swiniktake bajtʼ snakʼ sbaik ta witstikil.

Te kʼalal kʼax te kʼajkʼale, te David la snaʼbey sba te Abigail. Nabal sbiil te smamlal te Abigaile jaʼ jkʼulej winik te ay bayal skʼinale. Ay oxmil ta kojt tuminchijetik yuʼun sok jmil ta kojt tentsunetik yuʼun. Kʼax tulan yoʼtan te Nabale. Te Abigail kʼax tʼujbil ants, jaʼnix jich ya spas te bin toj ta pasele. Ta jun buelta la skoltay te machʼatik ay yuʼun te manchuk la yichʼik milele. Yame kiltik bael.

Te David sok te winiketik yuʼune la yakʼ ta ilel yutsil yoʼtanik ta stojol te Nabale. La skoltayik ta skanantayel te tuminchijetik yuʼune. Ta jun buelta te David la stikun bael te swiniktak ta skʼambeyel wokol te Nabale. Te winiketik ini kʼotik te banti ay te Nabal sok te swiniktak te yakik ta slokʼesbeyel stsotsil tuminchijetike. Yorail kʼin-a, ay bayal lekil weʼelil yuʼun-a. Jich yuʼun te swiniktak te Davide, jich la yalik: Kakʼojkotik ta ilel yutsil koʼtankotik ta atojol. Maʼyuk kelkʼanojbatkotik te tuminchijetik awuʼune, melel la jkoltayatkotik ta yilel. Awokoluk, akʼbonkotik jtebuk weʼelil.

Jich la yal te Nabal: Machʼaex-a te ya kakʼbeyex aweʼelike. Kʼax ma lekuk te bitʼil kʼopoje, sok bayal bintik chopol la yal ta stojol te Davide. Kʼalal la yalbeyik te David ta swenta ini, kʼax ilin yuʼun. Te David jich la yal: ¡Chuka ta achʼujtʼik te espada awuʼunike! Jich bajtʼik ta smilel te Nabal sok te winiketik yuʼune.

Ta patil jtul winik yuʼun te Nabal, bajtʼ yalbey yaʼiy ta ora te Abigail te bintik chopol la yal te Nabale. Ta oranax la schajpan bael weʼelil te Abigaile, la yakʼbey bael skuch te burroetik yuʼune jich lokʼ bael. Te kʼalal la sta sba ta be sok te Davide, ko ta sburro la snijan sba kʼalal ta lum ta stojol sok jich la yal: Kajwal, awokoluk, ma xawichʼbey ta mukʼ te bin la yalbat te jmamlale. Yuʼun ma snaʼ kʼinal, sok ma snaʼ te bintik ya spase. Liʼ kichʼojbat talel amajtʼan. Awokoluk, tsaka sok pasbonkotik perdón yuʼun te bin kʼot ta pasele.

Te David jich la yal: Kʼax pʼij awoʼtan, la akomon yuʼun maba ya jmil te Nabal ta swenta yakʼbeyel spakol te bin chopol la spase. Ta ora ini, jun awoʼtan sujtan bael ta ana. Ta patil, te kʼalal laj te Nabale, te Abigail inaminot yuʼun te Davide.

1 Samuel 22:1-4; 25:1-43.