Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 73

Slajibal lekil ajwalil ta Israel

Slajibal lekil ajwalil ta Israel

AYTONAX waxakeb yaʼbilal-a te Josías te kʼalal och ta ajwalil ta stojol te chaʼchajp stsʼumbal Israel te ayik ta sur. Mato ayuk lek yaʼbilal yuʼun ya x-och ta ajwalil. Jaʼ yuʼun ta sjajchibal koltayot ta swentainel te nación yuʼun winiketik te jaʼ ayxan yaʼbilalike.

Te kʼalal jajch te swaxakebal jaʼbil yochel ta ajwalil te Josiase, jajch ta sleel te Jehovae. La stʼumbey stalel te lekil ajwaliletik jich bitʼil te David, Josafat sok te Ezequiase. Te kʼalal keremto-ae ay bin la spas te la yakʼ ta ilel te ma xiw yoʼtane.

Ayix bayal jaʼbil te jteb ma spisiluk te israeletik te kʼax chopol la yakʼ sbaike. La yichʼik ta mukʼ lotil diosetik. La snijan sbaik ta stojol te lokʼombaetike. Jich yuʼun te Josías sok te winiketik yuʼune jajchik ta slajimbeyel skʼoplal te lotil yichʼel ta mukʼ dios ta lume. Kʼax tulan aʼtejik ta slajinel te lotil diosetik ta skaj te bitʼil ay bayal ants winiketik te yichʼojik ta mukʼ-ae. Ya xjuʼ ya awil liʼ ini te bitʼil te Josías sok te winiketik yuʼune yakalik ta swuytiklanel te lokʼombaetike.

Ta patil, te Josías la yakʼbey swentain oxtul winiketik te yakuk schajpanikxan te Templo yuʼun Jehová. Te takʼin te la yichʼ tsobel yuʼun te lume, la yichʼ akʼbeyel ta swenta stojol te winiketik ini yuʼun te aʼtel ya spasike. Te kʼalal yakalik ta aʼtel ta Templo-a te winiketike, te mukʼul sacerdote Hilcías (Hilquías) ay bin la sta te kʼax mukʼ skʼoplale te jaʼ te libro yuʼun te mantalil yuʼun Jehová te jaʼ akʼbot stsʼibay te Moisés te ayix tal bayal jaʼbile, te libro ini chʼayem-a.

Te kʼalal la yichʼik bael ta stojol Josías te libroe, la skʼan te yakuk yichʼ kʼopombeyel yaʼiye. Te kʼalal yak ta yaʼiyel stojol-a te Josiase la snaʼ te bitʼil maba yakalik ta schʼuumbeyel smantal Jehová te lume. Jaʼ yuʼun kʼax la smel yoʼtan jich la schʼiʼ skʼuʼ, jich bitʼil te ya awil ta lokʼombae. Jich la yal te Josías: Ilinem ta jtojoltik te Jehovae, melel te jmeʼ jtatike ma la schʼuunik te mantaliletik te tsʼibaybil ta libro ini.

Te Josías la yalbey ta mantal te mukʼul sacerdote Hilcías te akʼa sjojkʼoy te bin ya spasbotik yuʼun te Jehovae. Jich te Hilcías bajtʼ sjojkʼoybey te j-alwanej ants te Hulda (Huldá) sbiile. Te Hulda la yalbey te Hilcías te jich akʼa yalbey te Josías te jich yaloj te Jehovae: Te Jerusalén sok spisil te lume yame yichʼik castigo ta skaj te bitʼil yichʼojik ta mukʼ te lotil diosetik sok te bitʼil nojem ta chopolil te lume. Jaʼukmeto, jich bitʼil te apasoj te bintik lek te jaʼate Josías, te castigo ini yame jtikun tal jaʼto te kʼalal lajematix-ae.

2 Crónicas 34:1-28.