Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 67

Te Josafat la smukʼulin yoʼtan te Jehová

Te Josafat la smukʼulin yoʼtan te Jehová

¿YABAL anaʼ machʼatik-a te winiketik ini sok bin yakalik ta spasel? Yakalik ta bael ta guerra, te winiketik te nail ayike yakalik ta kʼayoj. Yaniwan ajojkʼoybey aba: ¿Bin yuʼun te ma yichʼojik yespadaik sok slanzaik ta swenta guerra te machʼatik yakalik ta kʼayoje? Yatome kiltik bael.

Te Josafat (Jehosafat) jaʼ ajwalil yuʼun te chaʼchajp stsʼumbal Israel. Jaʼ kuxin euk-a te kʼalal ay ta mantalteswanej te ajwalil Acab sok Jezabel te la swentainik te lajunchajp stsʼumbal Israel te ayik ta norte. Lekil ajwalil stukel te Josafate, jaʼnix jich te Asa (Asá) te state lekil ajwalil kʼax ta kʼinal euk. Jich yuʼun bayal jaʼbil lek kʼot skuxlejalik te chaʼchajp stsʼumbal Israel te wentaimbilik ta sur.

Jaʼukmeto ay bin kʼot ta pasel te xiwik yuʼun te ants winiketike. Ay machʼatik te jich tal yalbeyik te Josafate: Yak ta talel ta atojol ipal soldadoetik te talemik ta skʼinal Moab, Amón (Ammón) sok ta witstikil yuʼun Seir (Seír). Jich yuʼun la stsob sbaik bayal ta jtul israeletik ta Jerusalén ta sleel koltayel ta stojol te Jehovae. Bajtʼik ta Templo tey la skʼopon Dios-a te Josafate: Jehová Diosat kuʼunkotik, ma jnaʼ bin ya jpaskotik. Maʼyuk bin ya xjuʼ ya jpaskotik ta swenta te ipal soldadoetik ini. Koltayawonkotik.

Aʼiybot skʼop yuʼun Jehová te Josafate, jich la stikun bael jtul j-abat yuʼun ta yalbeyel te lume: Te guerra ini ma jaʼuk awuʼunik, melel jaʼ yuʼun te Diose. Ma jaʼuk ya awakʼik guerra te jaʼexe: Ilawiliknax te bin utʼil ya skoltayex te Jehovae.

Jich yuʼun ta sab yuʼun yan kʼajkʼal te Josafat jich la yalbey te lume: ¡Akʼa smukʼulin awoʼtanik te Jehovae! Tey-abi la yakʼ nailajuk jkʼayojetik ta stojol te soldadoetik yuʼune, jich te kʼalal yakalik ta beel-ae yakalik ta kʼayoj ta swenta yalbeyel yutsil skʼoplal te Jehová. ¿Yabal anaʼ bin kʼot ta pasel te kʼalal nopol ya yakʼikix guerra-ae? Te Jehová la yakʼ te jichnax jajch smiltiklan sbaik te skontratakike. ¡Te kʼalal kʼotik te israeletike, spisil te soldadoetik te skontratakike lajemikix-a!

La yakʼ ta ilel te ay spʼijil yoʼtan te Josafat te kʼalal la smukʼulin yoʼtan te Diose, ¿mabal jichuk? Teme jich ya jpastik euke, ya kakʼtik ta ilel te ay spʼijil koʼtantike.

1 Reyes 22:41-53; 2 Crónicas 20:1-30.