Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 64

La spas templo te Salomón

La spas templo te Salomón

TE KʼALAL mato xlaj-a te Davide, la yakʼbey jilel te Salomón te sjunal te bin utʼil la skʼan te Jehová te ya yichʼ pasbeyel te sTemploe. Ta xchanebal jaʼbil te yak ta matalteswanej-a te Salomone, jajch spas te Temploe la yichʼ bael jukeb jaʼbil sok olil ta juʼtesel yuʼun. Kʼaxem ta 180,000 ta jtul winiketik te aʼtejik ta spasel te Temploe. Kʼax bayal takʼin laj tey-a ta skaj te la yichʼ tuuntesel bayal oro sok plata.

Ta banti te Templo ini ay cheb kuartoetik yuʼun te mukʼ skʼoplale, jich bitʼil te la yichʼ pasel ta Nailpakʼ temploe. Jaʼukmeto te smukʼul te kuartoetik ini jaʼ cheb buelta kʼaxemxan-a te bitʼil te kuartoetik yuʼun te Nailpakʼ temploe. Jich te Salomón la yakʼ ta otsesel te skaxaul te chapbil kʼop ta banti te kuarto te ay bael ta yutilto te Temploe.

Kʼalal juʼ ta pasel te Temploe, la yichʼ pasel mukʼul kʼin. Jich te Salomón la skejan sba ta stojol te Templo sok la skʼopon Dios, jich bitʼil te ya awil ta lokʼombae. Te Salomón jich la yalbey te Jehová: Ni jaʼuk te stoyolil chʼulchan ya xjuʼ ya x-ochat tey-a, jich yuʼun, ¿bin utʼil ya xjuʼ ya x-ochat-a te Templo ini? Jaʼukmeto, Dios kuʼun, awokoluk aʼiybeya skʼop te lum awuʼun te kʼalal ya yakʼ tal sitik ta stojol ta awilal ini.

Te kʼalal laj yoʼtan ta skʼoponel Dios te Salomone, ta oranax ko tal kʼajkʼ ta chʼulchan. La schikʼ spisil te milbil majtʼaniletik te yichʼoj akʼel tey-ae. Jaʼnix jich te xojobil te Jehová noj ta Templo. Jich chiknaj ta ilel te tseʼelnax yoʼtan te Jehová ta swenta te Temploe soknix te bitʼil kʼoponot yuʼun te Salomone. Jich yuʼun te Templo jaʼ kʼot ta awilal te banti talik ta yichʼel ta mukʼ Dios te lume, ma jaʼukix te Nailpakʼ temploe.

Bayal jaʼbil mantalteswan sok spʼijil yoʼtan te Salomone, sok tseʼelnax yoʼtan ayinik te ants winiketike. Jaʼukmeto te Salomón la yikʼ bayal ta jtul antsetik te talemik ta yanyantik nacionetik te maba yichʼojik ta mukʼ te Jehovae. ¿Yabal awil te ay jtul te yak ta yichʼel ta mukʼ jun lokʼombae? Ta patil, te antsetik ini la yakʼbeyik yichʼ ta mukʼ yantik lotil diosetik te Salomone. ¿Yabal anaʼ bin kʼot ta pasel? Te Salomón kʼax tulanub yoʼtan, jich yuʼun maba tseʼelix yoʼtanik spisil te lume.

Ta swenta ini te Jehová ilin ta stojol te Salomone sok jich la yalbey: Ya jpojbat te awaʼtel ta ajwalile yan machʼa ya kakʼbey ta swenta. Jaʼ ini maba ya jpas te kʼalal kuxulato-ae, jaʼto te kʼalal yak ta mantalteswanej-a te anichʼane. Jaʼnax yuʼun ma spisiluk ya jpojbey te ants winiketik te ay ta swentainel te anichʼane. Yatome kiltik bael bin utʼil kʼot ta pasel ini.

1 Crónicas 28:9-21; 29:1-9; 1 Reyes 5:1-18; 2 Crónicas 6:12-42; 7:1-5; 1 Reyes 11:9-13.