Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Aʼyejetik te lokʼem ta Biblia

 AʼIYEJ 12

Jajch spasik mukʼul toyol tsʼajkʼ te ants winiketike

Jajch spasik mukʼul toyol tsʼajkʼ te ants winiketike

KʼAX bael bayal jaʼbil, te snichʼnab te Noé la sta bayal snichʼnabik. Te smamtak te Noé, chʼiik sok la sta bayal yal snichʼnabik euk. Jich pʼol te ants winiketik ta Balumilal.

Te Noé bayal stsʼumbal kʼot, tey tal-a te Nimrod (Nemrod). Te winik ini kʼax chopol, jnutsojel sok ya smil chambalametik soknix ya smil ants winiketik. Te Nimrod la spas sba ta ajwalil yuʼun ya swentain yantik ants winiketik. Te Dios ma la smulambey stalel te Nimrod.

Ta namey kʼinal-abi te ants winiketike junax kʼopil ya xkʼopojik-a. Te Nimrod jaʼ la skʼan te junuknax ya stsob sba te ants winiketik yuʼun jich ya xjuʼ swentain-a. Jich yuʼun ¿yabal anaʼ te bin la spase? La yaltiklambey te akʼa spasik jpam mukʼul lum sok jun mukʼul toyol tsʼajkʼ tey-a. Ta lokʼomba ya awil te yakalik ta spasel ladrilloetik.

Te Jehová Dios ma la smulan te mukʼul toyol tsʼajkʼ ini. Jaʼ la skʼan Dios te yakuk xlokʼik bael te ants winiketik te banti ayike swenta yuʼun jich ya xkuxinik ta swolol Balumilal. Jaʼukmeto jich la yalik: ¡Konik! Akʼa jpastik jpam mukʼul lum sok jun mukʼul toyol tsʼajkʼ te akʼa kʼotuk kʼalal ta chʼulchan te sjole. ¡Yuʼun jich mukʼ jkʼoplaltik ya xkʼot-a! Jich la yakʼik ta ilel te ma jaʼuk la skʼan yakʼik ta ichʼel ta mukʼ te Diose, melel jaʼ la skʼanik ichʼel ta mukʼ stukelik.

Jich yuʼun te Dios la yakʼbey yijkʼitay spasel te mukʼul toyol tsʼajkʼ te ants winiketike. ¿Yabal anaʼ te bin utʼil la spas te Diose? Jaʼ te bitʼil ajkʼnax la yakʼ kʼopojuk ta yanyantik kʼopiletik te ants winiketike, jich ma junuknax kʼopil te la stuuntesik, melel ma la yaʼiybeyix sbaik te skʼopike. Jaʼ yuʼun te mukʼul lum yuʼunike la sbiilin Babel, o Babilonia, te ya skʼan ya yal te maba la yaʼiybeyix sbaik te skʼopike.

Jich kajik ta lokʼel bael ta Babel te ants winiketike. Te machʼatik pajal la yaʼibey sbaik te skʼopike bajtʼik ta nainel ta yan lum kʼinal ta Balumilal.

Génesis 10:1, 8-10; 11:1-9.