Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Aʼyejetik te lokʼem ta Biblia

 AʼIYEJ 32

Te lajunchajp wokoliletik

Te lajunchajp wokoliletik

ILAWIL te lokʼombaetike. Tey chikan ta ilel-a te wokolil la yakʼ ta stojol Egipto te Jehovae. Ta sbabial te lokʼombae tey ya kiltik-a te Aarón yak ta smajel ta snabateʼ te mukʼul jaʼ Niloe. Jich kʼatpʼuj ta chʼichʼ te mukʼul jaʼe, te chayetik tey-ae spisil lajik jaʼ yuʼun kaj ta tuubel te mukʼul jaʼe.

Ta patil te Jehová la yakʼ lokʼuk tal chʼuchʼetik ta mukʼul jaʼ Nilo. Ochik ta ornoetik, ta swotsʼojibal pan, ta wayibaletik sok ta bayuknax. Te kʼalal lajik spisil te chʼuchʼetike, te egipcioetik jtsojbnax la yakʼik sok jich kaj ta tuubel spamal te lum Egiptoe.

Tey-abi te Aarón la smaj sok te snabateʼ te lume, jich te stanul te lume kʼatpʼuj ta chʼikiletik, tut usetik te ya xwil sok te ya xtiʼawanike. Jaʼ ini jaʼ te yoxebal wokolile.

Te yantik wokoliletik tale jaʼnax utsʼinotik te egipcioetike, maba utsʼinotikix stukel te israeletike. Te xchanebal wokolile jaʼ te mukʼul usetik te ochik ta sna te egipcioetike. Te yoʼebal wokolile jaʼ te tal schamel te chambalametike. Te wakaxetik yuʼun te egipcioetik sok te stumin chijike, sok stentsunik lajik ta spisil.

Ta patil te Moisés sok te Aarón la sjopik bael stanul orno la sbujkʼiyik moel te jich tsakotik ta kʼaʼel chin te ants winiketik sok te chambalametike. Jaʼ ini jaʼ te swakebal wokolile.

Ta patil-abi te Moisés la stoy moel skʼab ta chʼulchan, jich te Jehová la yakʼ tal tulan chawuk sok bat. Jaʼme te tulan bat te maʼyuk jich kʼaxem ta skʼinal Egipto.

Te swaxakebal wokolil jaʼ te tal ipal kʼulubetike. Te maʼyuk jich kʼaxem-a, sok te maʼyuk jich kʼaxem ta ora ini. Spisil la sweʼik te bin ma la slajin te tulan bate.

Te sbalunebal wokolil jaʼ te ijkʼub kʼinale. Ta oxeb kʼajkʼal ijkʼub kʼinal ta Egipto, jaʼukmeto ay sakal kʼinal stukel te banti ayik-a te israeletike.

Ta slajibal, te Dios la yalbey te lum yuʼun te akʼa stsijtsambeyik schʼichʼel tut tuminchij o tut tentsun ta sjol te stiʼ snaike. Jich kʼax ta skʼinal Egipto te chʼul abat yuʼun te Jehovae. Te kʼalal la yil chʼichʼ ta tiʼnail te chʼul abate, maʼyuk machʼa la smil tey stukel-a. Jaʼukmeto te kʼalal ya yil te maʼyuk chʼichʼ ta nae ya smil te machʼa ba alal tey-ae, soknix te sba yal te chambalame. Jaʼ ini jaʼ te slajunebal wokolil.

Ta slajibal te wokolil ini, te Faraón la yakʼ lokʼel te israeletik te chapalikix-ae, ta ajkʼabal-abi jajchik ta lokʼel bael ta Egipto.

Éxodo, capítulo 7 kʼalalto ta 12.