Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Aʼyejetik te lokʼem ta Biblia

 AʼIYEJ 22

Te José ochem ta chukel

Te José ochem ta chukel

AYTONAX juklajuneb yaʼbilal-a te José te kʼalal la yikʼik koel ta Egiptoe. Tey la schombeyik jtul winik-a te Potifar sbiile. Te Potifar jaʼ yak ta aʼtel ta stojol te ajwalil yuʼun Egipto, te Faraón ya yalbeyike.

Te José tulan aʼtej ta stojol te yajwale, jaʼ te Potifar. Jich yuʼun, te kʼalal winikix-a te Josee, akʼbot swentain spisil te bintik ay yuʼun ta sna te Potifare. Jich yuʼun, ¿bin yuʼun te ay ta chukel te Josee? Jaʼ ta swenta te yinam te Potifar.

Te kʼalal mukʼub te José tʼujbilnax ta winikil kʼot, te yinam te Potifar la skʼan te yakuk xway sok te Josee. Jaʼukmeto te José snaʼoj te maba lek ta pasele, jaʼ yuʼun ma la skʼan. Te yinam te Potifar kʼax bayal ilin yuʼun. Jich yuʼun te kʼalal jul te smamlale la slotiy sok jich la yal: ¡Te chopol oʼtan José kʼan sjokinon ta wayel! Te Potifar la schʼuun te bin albot yuʼun te yiname, sok ilin bayal ta stojol te Josee. Jich la yakʼ ta chukel.

Te jwentainwanej yuʼun chukjibal oranax la yil te jaʼ jtul lekil winik te Josee. Jich yuʼun la yakʼbey swentain ta spisil te yantik jchukeletike. Ta patil te Faraón ilin ta stojol te yabat te jkʼasesej copa soknix te jpas pan yuʼune sok la yakʼtiklan ta chukel. Ta jun ajkʼabal wayichajik ta schebalik sok yanax-a te swayichike, jaʼukmeto ma snaʼbeyik te bin swentaile. Ta yan kʼajkʼal te José jich la yal: Albonik kaʼiy te awayichike. Jich te José la yaltiklambey te bintik swentail te swayichik ta swenta te bitʼil koltayot yuʼun te Diose.

Ta swenta te jkʼasesej copae, jich la yal te José: Ta oxeb kʼajkʼal ya xlokʼat ta chukel, sok ya xchaʼochat ta aʼtel ta stojol te Faraone. Sok jich la yalxan te José: Te kʼalal lokʼematix-ae, kʼopojan kuʼun ta stojol te Faraón sok koltayawon te yakuk xlokʼon bael liʼ ini. Jaʼukmeto ta swenta te jpas pane jich la yal te José: Ta oxeb kʼajkʼal te Faraón ya xotʼbat lokʼel ajol.

Ta yoxebal kʼajkʼal jich kʼot ta pasel te bitʼil la yal te Josee. Te Faraón la xotʼbey lokʼel sjol te jpas pane. Jaʼukmeto te jkʼasesej copae la slokʼesik bael ta chukjibal sok jajch ta aʼtel ta yan buelta ta stojol te ajwalile. ¡Jaʼukmeto, te jkʼasesej copae chʼay ta yoʼtan te Josee! Maʼyuk bin la yalbey ta stojol te Faraone, jich jil ta chukel te Josee.

Génesis 39:1-23; 40:1-23.