Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 21

La yichʼ ilayel yuʼun sbankiltak te José

La yichʼ ilayel yuʼun sbankiltak te José

¡ILAWIL te kerem ini yak ta mel oʼtan sok maʼyuk bin ya xjuʼ spasix yilel! Jaʼ te Josee. Lajeltonax ta chonel yuʼun sbankiltak te José ta stojol te winiketik te ya xbajtʼik ta Egipto. Tey ya xbajtʼ yichʼ mosoinel-a te Josee. ¿Bin yuʼun te jich la spasik te bin chopol te schaʼbankiltake? Jaʼ yuʼun te ay sbikʼtal yoʼtanik ta stojol te José.

Te statik te keremetik ini, jaʼ te Jacob te kʼax kʼux ta yoʼtan te José. La yakʼ ta ilel te kʼalal la spasbey jlijkʼ tʼujbil snajtʼil kʼuʼ. Te kʼalal la yilik te lajuntul sbankiltak te jaʼ kʼaxto kʼux ta oʼtanil yuʼun statik te José, tal sbikʼtal yoʼtanik yuʼun sok la yilayik te Josee. Jaʼukmeto ma jaʼuknax yuʼun-abi.

Te José ay cheb swayich. Ta xchebal swayich te José la yil te la snijan sba te sbankiltak ta stojole. Te kʼalal la scholtiklambey yaʼiy te cheb swayich te sbankiltake bayalxan la yilayik yuʼun.

Ta jun buelta, kʼalal te sbankiltak te José yakik ta skanantaybeyel stuminchij te statike. Te Jacob la yalbey te José te akʼa bajtʼuk yil te bin utʼil ay te sbankiltake. Te kʼalal ilot yuʼun te sbankiltak te yak ta talel ta stojolike, ay chaʼoxtul te jich la yalike: ¡Laʼik, ya jmiltik! Jaʼukmeto te Rubén te bankilale jich la yal: ¡Maʼuk, ma xapasik jich! Manchukme ma la smilik, la schʼojik ochel ta poso te takijeme. Jich yuʼun la snajkʼan sbaik ta xchapel te bin ya yutik te yijtsʼinike.

Ta yorail-abi yakalik ta talel chaʼoxtul ismaeletik. Te Judá jich la yalbey te schaʼbankiltak sok te schaʼijtsʼinabe: Akʼa jchombeytik bael te ismaeletike. Jich la spasik. La schonik bael te José ta jtab jsejp plata. ¡Kʼax ma lekuk te bin la spasike sok kʼax maʼyuk yutsil te yoʼtanike!

¿Binwan ya yalbeyik te statik te bankilaletike? La smilik jkojt tentsun sok la smulbeyik bayal buelta tey-a te snajtʼil tʼujbil kʼuʼ ta banti te schʼichʼel te tentsune. Jich yuʼun la yichʼik bael ta stojol te statik te kʼuʼule sok jich la yalik: La jtatik ini. Ilawil teme ma jaʼuk te skʼuʼ te anichʼan Josee.

Te Jacob la yil te jaʼnix-ae. Jkojt chambalam lajniwan ta tiʼel yuʼun te Josee, xchi ta okʼel. Jaʼnix la skʼanik-a te sbankiltak te José te jichuk ya snop te statike. Kʼax bayal la smel yoʼtan te Jacob sok bayal kʼajkʼal okʼ yuʼun. Jaʼukmeto maba lajem te Josee. Ya kiltik te bin kʼot ta pasel te banti ikʼot baele.

Génesis 37:1-35.