Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 20

La schʼik sba ta tulan kʼop te Dinae

La schʼik sba ta tulan kʼop te Dinae

¿YABAL awil te machʼatik ya xbajtʼ yulaʼtay te Dinae? Jaʼ ya xbajtʼ yulaʼtay te achʼixetik te nainemik ta skʼinal Canaán. ¿Yalabal smulan akuy te stat te jich ya spase? Te bin ya xjuʼ skoltayat ta yakʼel sujtib te jojkʼoyel ini jaʼ te yakuk xjul ta koʼtantik te bin la snop te Abraham sok te Isaac ta swenta te antsetik te ayik ta Canaán.

¿Labal skʼan te Abraham te ya xnujpun te Isaac sok jtul achʼix te jajchem tal ta Canaán? Maʼuk. ¿Labal skʼan te Isaac sok te Rebeca te ya xnujpun te Jacob sok jtul achʼix te jajchem tal ta Canaán? Maʼuk. ¿Yabal anaʼ bin yuʼun?

Jaʼ yuʼun te ants winiketik te ayik ta Canaán schʼuunejik lotil diosetik. Ma lekukik ta inaminel sok ta mamlalinel sok ma kʼax lekukik ta amigoinel. Jaʼ yuʼun ya jnaʼtik ta lek te ma la smulan te Jacob te bitʼil te yantsil nichʼan la yamigoin sba sok te yantsil nichʼnab cananeoetike.

Te Dina la schʼik sba ta tulan kʼop. ¿Yabal awil te Dina te yak ta ilel yuʼun te cananeo winik ta lokʼombae? Siquem te sbiile. Ta jun buelta bajtʼ ta ulaʼtaywanej te Dinae, te Siquem la suj te Dina yuʼun ya xway sok. Jaʼ ini kʼax ma lekuk, melel jaʼnax ya xjuʼ xwayik jtul ants sok jtul winik teme yuʼun nujpunemike. Ta skaj te bin ma lek la spas te Siquem ta stojol te Dinae, jajch bayal kʼop yuʼun.

Te kʼalal la snaʼik stojol te sbankiltak, o xiʼleltak te Dina te bin kʼot ta pasele, bayal ilinik yuʼun. Te Simeón sok te Leví kʼax ilinikxan stukelik, jich la yichʼik bael yespadaik te ochik bael ta lum te kʼalal chʼayem yoʼtanik-a te ants winiketike. Te Simeón, te Leví soknix te yantik yermanotake la smilik te Siquem sok spisil te yantik winiketike. Ta swenta te bin ma lekuk la spasik te snichʼnab te Jacob kʼax bayal ilin yuʼun.

¿Bin utʼil jajch te tulan kʼop ini? Jaʼ ta swenta te yamigotak te Dina te maba schʼuunejik te mantaliletik yuʼun te Diose. Te joʼotike mame jletik kamigotaktik jichik bitʼil ini, ¿mabal jichuk?

Génesis 34:1-31.