Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 17

Lo-alaletik te maba pajalike

Lo-alaletik te maba pajalike

TE CHEB keremetik te ya awile maba pajalukik, ¿mabal jichuk? ¿Yabal anaʼtiklambey te sbiile? Te machʼa ya snuts chambalame jaʼ te Esaú, te kerem te ya awil te yak ta skanantayel tuminchijetik jaʼ te Jacobe.

Te Esaú sok te Jacob jaʼ lo-alaletik yuʼun te Isaac sok te Rebeca. Te Isaac jaʼ kʼuxan ta yoʼtan te Esaú, melel lekil jnutsojel yuʼun chambalam sok ya yichʼ tal ta sna te bin ya stsake, yuʼun jich ya sweʼik te machʼatik jayeb ay yuʼune. Jaʼukmeto te Rebeca jaʼ kʼax kʼux ta yoʼtan te Jacobe, melel lek yoʼtan sok lamal yoʼtan stukel.

Kuxulto-a te Abraham te jaʼ smamuchik te chaʼtul keremetike, jich yuʼun ya xjuʼ jnop ta koʼtantik te bin utʼil te Jacob kʼaxto la smulan schʼamel yaʼiy te bintik cholbot yuʼun te Abraham ta swenta te Jehovae. Te kʼalal te lo-alaletik ayix joʼlajuneb yaʼbilalik-ae, laj bael te Abraham te ayix 175 yaʼbilal-ae.

Te kʼalal ayix 40 yaʼbilal-a te Esaú nujpun sok cheb antsetik te jajchemik tal ta skʼinal Canaán. Ta swenta ini bayal la smel yoʼtan yuʼun te Isaac sok te Rebeca, melel te antsetik ini maba jaʼ yichʼojik ta mukʼ te Jehovae.

Ta jun buelta ay bin kʼot ta pasel te kʼaxto ilintayot yuʼun Esaú te Jacobe. La sta yorail te ya yakʼbey bendición te sba snichʼan te Isaac, melel te Esaú jaʼ bankilal yuʼun te Jacobe, te Esaú la skuy te jaʼ ya x-akʼbot bendición yuʼun te state. Jaʼukmeto te Esaú schonojix-a te bitʼil jaʼ ay ta swenta yichʼel te bendicione, jaʼ la schombey te yijtsʼine. Jaʼnix jich te kʼalal ayin te cheb keremetik ini, te Dios yalojix-a te jaʼ ya yichʼ bendición te Jacobe. Jich kʼot ta pasel ini, te bitʼil te Isaac jaʼ la yakʼbey bendición te Jacobe.

Te kʼalal la snaʼ stojol te Esaú la yilintay te Jacobe. Kʼax ilin yuʼun te la yal te ya smil te yijtsʼine. Kʼalal la snaʼ stojol te Rebeca ini kʼax bayal la smel yoʼtan yuʼun. Jich yuʼun jich la yalbey te smamlal Isaac: Wokolme ta tsʼikel euk teme ya yinamin jtul cananeail ants te Jacobe.

Jich yuʼun te Isaac la yikʼ tal te snichʼan Jacob jich la yalbey: Mame xnujpunat sok jtul cananeail ants. Jaʼ yuʼun baan ta Harán ta sna Betuel te jaʼ stat te ameʼe. Jaʼ xawikʼ awinamin te jtul yantsil nichʼan te Labán te jaʼ sbankil te ameʼe.

Te Jacob la schʼuumbey smantal te state, jich bajtʼ ta namal beel ta Harán te banti ayik ta nainel te machʼatik ay yuʼun te smeʼe.

Génesis 25:5-11, 20-34; 26:34, 35; 27:1-46; 28:1-5; Hebreos 12:16, 17.