Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 16

Jtul lekil ants te ya xnujpun sok te Isaac

Jtul lekil ants te ya xnujpun sok te Isaac

¿YABAL anaʼ machʼa-a te ants te ya awil ta lokʼombae? Rebeca te sbiile. Te winik ya awil te banti yak ta noptsajel bael te Rebecae jaʼ te Isaac. Jaʼ ya x-ikʼot yuʼun. ¿Bin utʼil kʼot ta pasel ini?

Te Abraham te stat te Isaac, jaʼ la skʼan te yakuk xnujpun sok jtul lekil ants te snichʼane. Ma la skʼan te ya xnujpun sok jtul ants te jajchem tal ta Canaán, melel te ants winiketik tey-ae schʼuunejik lotil diosetik. Jich yuʼun te Abraham la yikʼ tal te j-abat yuʼune sok jich la yalbey: Ya jkʼan te ya xbaat ta jlumal Harán te banti ay te kermanotake, yuʼun tey ya xbajtʼ alebon yinam-a te jnichʼan Isaac.

Jich ta oranax te j-abat yuʼun te Abraham la yikʼ bael lajuneb ta kojt camelloetik sok jich jajch bael ta namal beel. Te kʼalal nopol ya xkʼotix-a te banti ayik ta nainel te yermanotak te Abraham, la skux yoʼtan ta jun poso. Te kʼalal nopol ya x-ijkʼubix-a te kʼinale te antsetik te tey slumalik-ae ya xko slikik jaʼ. Jich te j-abat yuʼun Abraham jich la yal ta skʼoponel te Jehovae: Te machʼa antsil te ya yakʼbon jaʼ kuchʼ sok te camelloetike, jaʼukme te machʼa atsaojix yuʼun ya xnujpun sok te Isaac.

Jich tal Rebeca ta slikel bael jaʼ. Te kʼalal te j-abat yuʼun Abraham la skʼambey jaʼ yuchʼ, jich ora akʼbot. Sok bajtʼ slexan tal bayal jaʼ yuʼun spisil te camelloetik te ayik ta takin tiʼile. Tulan aʼtej te Rebeca, melel te camelloetike bayal ya yuchʼik jaʼ.

Te kʼalal laj yoʼtan ta yakʼel jaʼ te Rebecae, te j-abat yuʼun te Abraham la sjojkʼoybey te Rebeca te machʼa-a te state. Jaʼnix jich la sjojkʼoybey teme ya xjuʼ xkʼax ajkʼabal yuʼun ta banti te sna te smeʼ state. Jich la yal te Rebecae: Joʼon yantsil nichʼanon te Betuel, sok ay banti ya xjuʼ xwayat. Te j-abat yuʼun te Abraham snaʼoj te jaʼ snichʼan Nacor te Betuel, te jaʼ sbankil te Abraham. Jaʼ yuʼun la skejan sba sok la yalbey wokol Jehová te tey ikʼot bael ta banti ay te yermanotak te Abrahame.

Ta ajkʼabal-abi te j-abat yuʼun Abraham la yalbey te Betuel soknix te Labán te sbankil te Rebeca te bin swentail te kʼot yulaʼtay yuʼune. Te Betuel sok te Labán la yalik te ya xjuʼ yikʼik bael te Rebeca sok te yakuk xnujpun sok te Isaac. ¿Bin la yal te Rebeca te kʼalal la yichʼ jojkʼoybeyel ta swenta ini? La yal te ya skʼan xbajtʼe. Jich yuʼun ta yan kʼajkʼal moik ta camelloetik sok jajchik bael ta beel ta namal yuʼun sujtik bael ta Canaán.

Te kʼalal kʼotikix ta Canaán yakix ta ijkʼubel-a te kʼinale. Te Rebeca la yil jtul winik te yak ta paxial ta akiltik. Jaʼ te Isaac. Bujtsʼnaj kʼinal la yaʼiy te Isaac te kʼalal la yil te Rebecae. Aytonax yoxebal jaʼbil slajel-a te Sara te smeʼ te Isaac, jich yuʼun yato smel yoʼtan yuʼun-a. Te kʼalal kʼax bael te kʼajkʼale te Isaac kʼux la yaʼiy ta yoʼtan te Rebecae, sok la sta stseʼelil yoʼtan ta yan buelta.

Génesis 24:1-67.

Naʼbeyaxan skʼoplal

Te Rebeca la yakʼbey stseʼelil yoʼtan te Jehová

¿Bin ya skʼan ya apas yuʼun ya awakʼbey stseʼelil yoʼtan te Jehová? Naʼbeya skʼoplal ta skʼoponel te aʼyej ini.