Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 8

Mukʼul najtʼil winiketik ta Balumilal

Mukʼul najtʼil winiketik ta Balumilal

TE AYUK machʼa ya xtal ta atojol te kʼalalto ta sjol ana ya xkʼot te snajtʼile, ¿bin ya awal yuʼun? ¡Te jaʼ jtul mukʼul najtʼil winike! Ta melel yuʼunix ay jich machʼatik kuxinik ta Balumilal-a. Te Biblia ya yal ta swenta te statik te mukʼul najtʼil winiketik ini te jaʼik chʼul abatetik yuʼun Dios ta nailal. Jaʼukmeto, ¿bin utʼil kʼot ta pasel ini?

Julukme ta awoʼtan, te Satanás te la spas sba ta chopol yak ta sjachel kʼopetik-a. Soknix yoʼtanuk kʼan spas ta chopol te chʼul abatetik yuʼun te Diose. Ta patil ay chaʼoxtul chʼul abatetik jajch yichʼbeyik ta mukʼ skʼop te Satanase. La yijkʼitayik spasel te aʼtelil akʼbilik yuʼun Dios ta chʼulchane. Koik tal ta Balumilal sok la skʼatpʼun sbaik ta winiketik. ¿Yabal anaʼ bin yuʼun?

Te Biblia ya yal te yuʼun la yilik tʼujbil antsetik ta Balumilal sok la skʼan sjokinik ta kuxinel te antsetike. Jich yuʼun koik tal yuʼun la yikʼ sbaik sok te antsetike. Te Biblia ya yal te chopol te bin la spasike, melel te Dios la spas te chʼul abatetik yuʼun ya xkuxinik ta chʼulchan.

Kʼalal la staik yal snichʼnabik sok te yinamike, yan yilelik-a te alaletike. Jaʼnax yuʼun maniwan kʼax yanukik ta ilel-a te kʼalal tutikto-ae. Jaʼukmeto te kʼalal kajik ta chʼiele la stsak tulan yipik, jich kʼatpʼujik ta mukʼul najtʼil winiketik.

Te mukʼul najtʼil winiketik ini kʼax chopolik. Ta skaj te kʼax mukʼik sok te ay bayal yipike la yutsʼinik te ants winiketike. Yoʼtanuk kʼan sujik ta spisil te ants winiketik te yakuk spas sbaik ta chopol jich te bitʼil stukelike.

Lajemix-a te Enoc, jaʼukmeto ay kuxin jtul winik ta Balumilal te lek yoʼtan stukele. Te winik ini la sbiilin Noé. Te Noé spisil ora la spasbey skʼanojel yoʼtan te Diose.

Ta jun buelta te Dios la yalbey te Noé te kʼotix yorail te ya slajin spisil te machʼatik chopolike. Jaʼukmeto te Dios ya skoltay te Noé sok te machʼatik ay yuʼun soknix te bayal ta jchajp chambalametike. Ya kiltik bael bin utʼil la spas.

Génesis 6:1-8; Judas 6.