Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

Aʼyejetik te lokʼem ta Biblia

 AʼIYEJ 7

Jtul winik te ma xiw yoʼtane

Jtul winik te ma xiw yoʼtane

TE KʼALAL esmaj bayal ants winiketik ta Balumilal, jteb ma spisiluk te ants winiketik la spasik te bin chopol jich bitʼil te Caine. Jaʼukmeto ay jtul winik te yan stalel la yakʼ ta ilele. Te winik ini Enoc te sbiile, te ma xiw yoʼtan stukele. Te ants winiketik te joytaybil ta kuxinel yuʼun-ae kʼax chopolik, jaʼukmeto te Enoc spisil ora la yichʼ ta mukʼ te Diose.

¿Yabal anaʼ bin yuʼun te kʼax chopol te bin la spas te ants winiketike? Nopa awaʼiy ini: ¿Machʼa la yakʼ skʼaxuntaybey smantal Dios te Adán sok te Evae, te jich la sloʼbeyik sit te teʼ te albil te ma xjuʼ ya sloʼike? Jaʼ jtul chʼul abat te la spas sba ta chopol. Te Biblia ya yakʼbey sbiilin Satanás. Jaʼ ya skʼan te jpisiltik yakuk jpas jbatik ta chopole.

La sta yorail te Jehová la yalbey te Enoc te akʼa yalbey te ants winiketik te bin ma skʼan ya yaʼiybeyik skʼoplale. Jaʼ la yal ini: Yame sta yorail te Dios te ya slajin spisil te machʼatik chopolike. Ta swenta ini kʼaxniwan ilinik yuʼun te ants winiketike sok kʼaniwan smilik te Enoc. Jich yuʼun te Enoc la skʼan te manchuk xiw yoʼtane, yuʼun jich ya xjuʼ yuʼun yalbeyel-a te ants winiketik te bin ya spas te Dios ta stojolike.

Te Dios ma la yakʼ jalajuk skuxlejal te Enoc ta yolil te machʼatik chopolike. Jaʼnax kuxin 365 jaʼbil. ¿Bin yuʼun te ya kaltik te «jaʼnax kuxin 365 jaʼbile»? Melel ta namey kʼinal-abi te ants winiketike kʼax tulanik sok ya xkuxinik bayal jaʼbil-a, ma jichuk te bitʼil ta ora ini. ¡Te snichʼan te Enoc te Matusalén sbiile kuxin 969 jaʼbil!

Te kʼalal lajemix-a te Enoc, kʼax jelawxan yuʼunik te bintik chopol la spasik te ants winiketike. Te Biblia ya yal: Te spisil ora ma lekuk te bintik ya snoptiklan ta yoʼtanik, sok noj ta utsʼinwanej te Balumilale.

¿Yabal anaʼ bin yuʼun te kʼax bayal chopolil ta kʼajkʼal-abi? Jaʼ te bitʼil te Satanás la sle yan te bin utʼil la yakʼbey spas te ants winiketik te bintik ma leke. Ya kiltik bael te bin la spase.

Génesis 5:21-24, 27; 6:5, 11-13; Hebreos 11:5; Judas 14, 15.