Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Baan ta sleojiʼbal

Ochan ta banti te bintik yichʼoje

sTestigotak te Jehová

tseltal

SJUNAL KAʼTELTIK TA SWENTA TSOBLEJ: JKUXLEJALTIK SOK KAʼTELTIK TA SWENTA DIOS NOVIEMBRE 2016

 KAKʼTIK TA ILEL TE JCHʼUUNEJTIK DIOSE

¿Bin-utʼil ta tuuntesel te yachʼil libro Snopel te Biblia te ma tulanuk ta naʼbeyel swentaile?

¿Bin-utʼil ta tuuntesel te yachʼil libro Snopel te Biblia te ma tulanuk ta naʼbeyel swentaile?

Te libro What Can the Bible Teach Us? jteb ma pajaluk sok te libro Snopel te Bibliae, ta schebal te libro-abi yato xlokʼ ta yantik kʼopil. Pajal te bintik ya scholbey skʼoplale sok te bitʼil cholanbile. Te yachʼil libro-abi, maba chujkʼul ta naʼbeyel swentail te bin ya yale sok te bin-utʼil ya yakʼ kʼotuk ta koʼtantike. La yichʼ pasel ta swenta te machʼatik ma xkʼot lek ta yoʼtanik te bin ya yal te libro Snopel te Bibliae. Te yachʼil libroe maʼyuk yichʼojix apéndice, jaʼxanix yichʼoj notaetik te ya scholbey skʼoplal kʼopetik sok jmajkʼ kʼopetik te ya xchiknaj ta kapituloe. Te jujun kapituloe maba yichʼojix jojkʼoyeletik ta sjajchibal sok te recuadro ta slajibale. Jaʼxanix albil ta chaʼoxpʼalnax kʼop te bintik smelelil ya yal te Biblia ta parrafoetik. Jich bitʼil ya jpastik sok te libro Snopel te Bibliae, te yachʼil libroe ya xjuʼ ya japtik biluk-ora, manchukme yan jun yak ta japel ta u-abi. ¿Bin-utʼil ya xjuʼ ya jtuuntestik te bintik yachʼil yichʼoj te libro kʼalal ya xpʼijubteswanotike?

TA CHAʼOXPʼALNAX KʼOP. Yato xjuʼ ya jpastik te bitʼil kʼayemotik ta pʼijubteswaneje, jaʼ te ya yichʼ kʼoponel te parrafoetik sok te jojkʼoyeletik yuʼun te libro Snopel te Bibliae. Jaʼukmeto, ¿bin ya skʼan pasel teme ma snaʼ lek te kʼopil o ma snaʼ lek skʼoponel jun te ants winike? Te jcholkʼope ya xjuʼ ya stuuntes te yachʼil libro Snopel te Biblia te ma tulanuk ta naʼbeyel swentaile. Ya xjuʼ ya stuuntes te bin albil ta chaʼoxpʼalnax kʼop yuʼun te kapitulo ta snopel te Biblia sok ya xjuʼ ya stijbey yoʼtan te machʼa yak ta snopel te Biblia yuʼun ya skʼopon ta stukel te kapituloe. Te bin smelelil ya yal te Biblia ya xjuʼ ta cholel ta joʼlajunebnax minuto. Te bin albil ta chaʼoxpʼalnax kʼope jtebnax bintik yichʼoj ma jichuk te bitʼil jujun kapituloe. Te jcholkʼope ya skʼan ya schajpan ta lek te bin ya yakʼ ta nopele sok ya yichʼ ta wenta te bin yilel ya yil te machʼa ya spʼijubtese. Teme ya skʼoponik te parrafoetike, te jcholkʼope ya xjuʼ ya stuuntes te bin albil ta chaʼoxpʼalnax kʼop ta schaʼnaʼel te bin la yichʼix nopele.

NOTAETIK TE AY BIN YA SCHOLBEY SKʼOPLAL. Te jpʼal kʼop sok te jmak kʼop yichʼoj te notaetike jich cholanbil te bitʼil cholbil te kapituloetike. Te jcholkʼope jaʼme ya yil teme ya snopik te notaetik te kʼalal yakik ta snopel te libroe.