Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Sjunal kaʼteltik ta swenta tsoblej: Jkuxlejaltik sok Kaʼteltik ta swenta Dios  |  Junio yuʼun 2017

 KAKʼTIK TA ILEL TE JCHʼUUNEJTIK DIOSE

Jkoltaybeytik skʼoplal te tojil mantaliletik yuʼun te Jehovae

Jkoltaybeytik skʼoplal te tojil mantaliletik yuʼun te Jehovae

Te machʼa ya yakʼ te tojil mantaliletike, jaʼ te Jehovae. Jich bitʼil ta swenta te nujpunele yaloj ta mantal te jaʼnax ya xnujpun jtul winik sok jtul ants te ma xjuʼ jichnax ya yijkʼitay sbaike (Mt 19:4-6, 9). Jkʼaxel maba lek ya yil te mulweje (1Co 6:9, 10). Jaʼnix jich yakʼoj te bintik smelelil te ya xtojobteswan te ayik ta Biblia ta swenta te bin yilel te skʼuʼ spakʼik sok te bitʼil ya skʼan ya schajpan sba te j-abatetik yuʼun te ma pajaluk sok te yantik ants winiketike (Dt 22:5; 1Ti 2:9, 10).

Ta ora ini bayal ants winiketik ya spʼajik te tojil mantaliletik yuʼun te Jehovae (Ro 1:18-32). Jaʼ ya smulanik te bintik ay ta moda, jich bitʼil te kʼuʼul pakʼetik, te bitʼil ya schajpan sba te ants winiketik sok te bin yilel te stalelike. Ya stoy sba kʼinal yaʼiyik yuʼun te mulil ya spasike sok ya slabanik te machʼatik maba jich ya spasike (1Pe 4:3, 4).

Te bitʼil Testigootike ya skʼan ya jkoltaybeytik skʼoplal te tojil mantaliletik yuʼun te Jehová ta swenta te bitʼil ya skʼan ya xkuxinotike (Ro 12:9). ¿Bin-utʼil ya xjuʼ ya jpastik-abi? Jaʼ te kʼalal sok yutsil koʼtantik ya kakʼtik ta naʼel te bintik lek yoʼtan yuʼun te Diose sok te ya jpas ta jkuxlejaltik te tojil mantaliletik yuʼune. Jich bitʼil ta swenta te jkʼuʼ jpakʼtik sok te bitʼil ya jchajpan jbatike, ya skʼan ya jojkʼoybey jbatik: «¿Jaʼbal yakon ta stʼunel te tojil mantaliletik yuʼun te Jehovae o jaʼbal te balumilale? ¿Yabal xchiknaj ta ilel te j-abaton yuʼun Dios ta swenta te bin-utʼil ya jchajpan jbae?». O te kʼalal ya jtsatik bin programa o pelikula ya kiltik ya skʼan ya jojkʼoybey jbatik teme lek ya yil Jehová te bintik ya xkʼax tey-ae, teme jaʼ ya yakʼ ta nopel te bin stojil ta pasel o teme jaʼ te bintik ya xjuʼ ya yutsʼinotike (Sl 101:3). ¿Bin-utʼil ya xjuʼ ya yutsʼin te jfamiliatik sok te yantik ta swenta te bintik ya jpastike? (1Co 10:31-33).

¿Bin yuʼun te tulan skʼoplal te ya jkoltaybeytik skʼoplal te tojil mantaliletik yuʼun te Jehovae? Te Jesucristo nopolme ya slajin te nasionetik sok spisil te bintik chopole sok jaʼnax ya xkolik jilel te machʼatik ya schʼuunbeyik smantal te Diose (Eze 9:4-7; 1Jn 2:15-17). Jaʼ yuʼun, mame xiwotik ta skoltaybeyel skʼoplal te tojil mantaliletik yuʼun te Diose, jich te machʼatik ya yil te lekil taleliletik kuʼuntike yame yalbeyik yutsil skʼoplal te Jehovae (1Pe 2:11, 12).

¿Yabal xchiknaj ta ilel te jaʼ jchʼuunej te tojil mantaliletik yuʼun Dios ta swenta te jkʼuʼ jpakʼ sok te bitʼil ya jchajpan jbae?

TE KʼALAL LA AWILIX-A TE VIDEO, AMIGOINA TE JEHOVÁ: JTUL WINIK SOK ANTS LEBEYA SUJTIB TE JOJKʼOYELETIK INI:

  • ¿Bin yuʼun ya skʼan ya jchʼuuntik spasel te tojil mantaliletik yuʼun te Jehovae?

  • ¿Bin yuʼun te meʼil tatiletik ya skʼan ya snojptesik te yal snichʼnabik ta yalalilto ta swenta te tojil mantaliletik yuʼun te Diose?

  • ¿Bin ya xjuʼ ya spasik te jchʼieletik sok te machʼatik ayix yaʼbilalik ta skoltayel te ants winiketik ta stael te yutsil yoʼtan te Diose?