Ochan ta banti te bintik yichʼoje

Ochan ta banti bintik jujunchajp yichʼoje

Baan ta sleojiʼbal

sTestigotak te Jehová

tseltal

Sjunal kaʼteltik ta swenta tsoblej: Jkuxlejaltik sok Kaʼteltik ta swenta Dios  |  Junio yuʼun 2017

 KAKʼTIK TA ILEL TE JCHʼUUNEJTIK DIOSE

Mulana scholel te lek yachʼil kʼope

Mulana scholel te lek yachʼil kʼope

¿Aybal wokol ya awaʼiy te ya xlokʼat ta scholel skʼop Diose? Teme jiche, ma atukeluk, ay tsobol jich ya kaʼiy jbatik. Jaʼniwan yuʼun te ay ma smulanik skʼop Dios te ants winiketik o te chopol stalelike, o jaʼniwan yuʼun te wokol ya kaʼiytik te ya xkʼopojotik sok te machʼatik ma jnaʼbeytik sbae. Jaʼ-abi ya yakʼ xchʼay te stseʼelil koʼtantike, jaʼukmeto jaʼ yakotik ta yichʼel ta mukʼ te Dios te tseʼel yoʼtane sok ya skʼan te tseʼeluk koʼtantik ya x-abatinotik ta stojole (Sl 100:2; 1Ti 1:11TNM). Jich yuʼun akʼa kiltik oxeb swentail te bin ya skoltayotik yuʼun ya jmulantik scholel te skʼop Diose.

Te sbabiale jaʼ te ya kakʼtik ta naʼel te bin ya xjuʼ ya jmaliytik ta pajel chaʼbeje. Manchukme yak ta pejkʼajel smukʼul yoʼtan te ants winiketik ta swenta te bin ya smaliyike, ya xjuʼ ya kakʼbeytik stseʼelil yoʼtanik sok te «lequil cʼop[e]» (Is 52:7). Te lek yachʼil kʼop yuʼun te Ajwalinel yuʼun te Dios ya yakʼbotik stseʼelil koʼtantik-euk. Te kʼalal mato xbaat ta scholel skʼop Dios nopilana ta awoʼtan te bendisionetik ya yakʼ te Ajwalinel yuʼun te Dios ta Balumilale.

Te schebale, te bin ya jcholbeytik yaʼiy te ants winiketike ya sta slekilalik yuʼun soknix ya xjeltaybotik skuxlejalik yuʼun, melel ya xjuʼ ya yijkʼitayik te bintik chopol kʼayemik ta spasel sok ya xjuʼ ya sta skuxlejalik ta sbajtʼelkʼinal (Is 48:17, 18; Ro 1:16). Akʼa jnop kaʼiytik te ayotik ta skoltaybeyel skuxlejal te ants winiketike, manchukme ay ma skʼanik koltayel, ma jaʼuk ya jkom jbatik yuʼun ta sleel te machʼatik ya skʼan ya xkolike (Mt 10:11-14).

Te yoxebale jaʼ mukʼxan skʼoplal, melel te kʼalal ya jcholtik te skʼop Diose jich ya yichʼ ichʼel ta mukʼ te Jehovae. Kʼax bayal skʼoplal ya yil te aʼtelil-abi (Is 43:10; Heb 6:10). Jaʼnix jich ya yakʼbotik te schʼul espiritu swenta ya xjuʼ ya jpastik te aʼtelile. Jaʼ yuʼun akʼa jkʼanbeytik te tseʼel-oʼtanil ya yakʼ te chʼul espiritue (Gál 5:22). Jich bitʼil sjokinejotik te Jehová yame xjuʼ kuʼuntik stsalel te xiwel sok ayme yip koʼtantik ta scholel te skʼop Diose (Hch 4:31). Teme jich-abi, chikan bin yilel stalel te ants winiketik te banti ya jcholtik skʼop Diose, yame xbajtʼ jmulantik spasel te aʼtelil-abi (Eze 3:3).

¿Bin talelil ya amulan te ayuk awuʼun te kʼalal ya achol te skʼop Diose? ¿Bin-utʼil ya xjuʼ ya awakʼ ta ilel te stseʼelil awoʼtane?

TE KʼALAL LA AWILIX-A TE VIDEO, TE BIN-UTʼIL LA JTAXAN STSEʼELIL KOʼTAN TA ABATINEL TA STOJOL JEHOVÁ LEBEYA SUJTIB TE JOJKʼOYELETIK INI:

  • ¿Bin yuʼun te mukʼ skʼoplal ta koʼtantik te ya skʼan ya jmakʼlin jbatik ta swenta skʼop Dios manchukme bayal ora ya jcholtik skʼop Dios ta jujun u?

  • ¿Bin-utʼil ya xjuʼ ya jkʼayinbeytik stalel te Mariae?

  • ¿Bin-ora ya alokʼes tiempo ta snopilanel ta awoʼtan te sKʼop Diose?

  • ¿Bin-a te ya amulanxan te kʼalal ya achol te lek yachʼil kʼope?