Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 3 2017

 TUMU PARAU MATAMUA | NA TAATA FAAHORO PUAAREHENUA: TE AURAA NO TATOU

Te orama o na taata faahoro puaarehenua e maha

Te orama o na taata faahoro puaarehenua e maha

Te orama o na taata faahoro puaarehenua e maha Te faura maira e maha puaarehenua, te horo ra ratou e te faaroohia ra te haruru puai! E maha atoa taata o te faahoro ra i na puaarehenua e maha. Mea oraora mau te faatiaraa a te Bibilia mai te huru tei reira roa tatou! Te puaarehenua matamua, mea uouo ïa. Na te hoê arii hanahana o tei faaterono-apî-hia e faahoro ra ia ’na. I muri mai, te vai ra te tahi puaarehenua uteute, e faaore tei parahi i nia iho ia ’na i te hau i nia i te fenua taatoa. Te apee atoa maira te toru o te puaarehenua, mea ereere ïa, te amo ra tei parahi i nia iho i te hoê faito ma te faaite i te poroi mauiui mau, e iti mai te maa. Te maha o te puaarehenua, mea mahe‘ahe‘a. Te faaara mai ra te reira e tupu te ma‘i e te tahi atu mau ati pohe. Na te Pohe iho e faahoro i tera puaarehenua, ta tei parahi i nia iho ïa e faahoho‘a ra. Na muri noa mai ia ’na, te itehia ra te faahoho‘araa o te Apoo, oia hoi te menema o te huitaata. E rave rahi ta ’na e rave mai!—Apokalupo 6:1-8.

“I te taime matamua a taio ai au te faatiaraa o na puaarehenua e maha e te feia e faahoro ra ia ratou, ua riaria roa vau. No ’u, ua tae mai tera Mahana Haavaraa e eita vau e ora ’tu, aita hoi au i ineine atura.”—Crystal.

“Ua faahiahia roa vau i te taa-ê-raa e vai ra i nia i te feia faahoro puaarehenua. I to ’u iteraa i te auraa o teie orama, ua taa roa ia ’u no te aha ratou i faahoho‘ahia ’i mai tera.”—Ed.

Eaha to oe huru i mua i te faatiaraa o na taata faahoro puaarehenua e maha o te Apokalupo? Te riaria ra anei oe mai ia Crystal aore ra te faahiahia ra oe mai ia Ed? E tuhaa matau-roa-hia te hororaa a teie na feia faahoro puaarehenua i roto i te Apokalupo, te buka hopea o te Bibilia. Ua ite anei oe e nehenehe oe faufaahia i tera orama? E nafea? Te fafau mai ra te Atua e nehenehe oe e ite i te oaoa mau ma te taio, ma te haapii e ma te haapao i te mau parau tohu o teie buka Bibilia i roto i to oe oraraa.—Apokalupo 1:1-3.

Aita tera orama i papaihia no te faariaria ia oe. E mirioni taata tei ite e ua haapuai tera orama i to ratou faaroo e ua horoa ’tu i te hoê tiaturiraa faahiahia mau no a muri a‘e. A taio na i te tuhaa i muri mai, e nehenehe atoa oe e ite i tera mau maitai!