Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 3 2017

 TUMU PARAU MATAMUA | NA TAATA FAAHORO PUAAREHENUA: TE AURAA NO TATOU

Te auraa o teie orama

Te auraa o teie orama

Mea maere e mea riaria paha te parauhia ra no na taata faahoro puaarehenua e maha. E tauturu mai râ te Bibilia e te mau tupuraa o teie tau ia taa papu i te parau mau no nia i te reira. Noa ’tu te faaara mai ra ta ratou hororaa e tupu te ati i nia i te fenua, e parau apî oaoa to muri mai i te reira, no oe e no to oe utuafare. Na mua râ, e hi‘o ana‘e o vai te parahi ra i nia iho i te puaarehenua matamua. I muri iho, e hi‘opoa tatou te faahoho‘a ra na toru taata faahoro hopea i te aha.

TE TAATA FAAHORO PUAAREHENUA UOUO

Te haamata ra te orama na roto i teie mau parau: “Ite atura vau e inaha, te hoê puaarehenua uouo, e e fana ta tei parahi ra i nia iho. E hei upoo arii tei horoahia no ’na e ua horo oia ia pau to ’na mau enemi ia ’na, a upootia roa ’tu ai oia.”—Apokalupo 6:2.

O vai te parahi ra i nia iho i te puaarehenua uouo? Te faaite ra tera noa â buka Bibilia, oia hoi te Apokalupo, o vai o ’na. No te ra‘i oia e e piihia o ’na “Te Parau a te Atua.” (Apokalupo 19:11-13) No Iesu Mesia tera tiaraa no te mea ua riro o ’na ei auvaha no te Atua. (Ioane 1:1, 14) E pii-atoa-hia o ’na te “Haapao maitai ïa e o Parau mau” e te “Arii o te mau arii e Fatu o te mau fatu.” (Apokalupo 19:11, 16) Te taa-maitai-hia ra e mana to ’na no te haa ei arii e ei aito, eita râ o ’na e faaohipa i to ’na tiaraa no te rave i te ino. E hiti mai râ te tahi mau uiraa.

Na vai i horoa ia Iesu i te mana no te aro i te enemi? (Apokalupo 6:2) Ua ite te peropheta Daniela i te hoê orama o tei faaite i te Mesia mai “te Tamaiti a te taata” e ua horohia ia ’na “te mana, e te hinuhinu, e te basileia.” Na vai i horoa ’tu i te reira? Na “To te mau mahana tahito,” te Atua ra o Iehova. * (Daniela 7:13, 14) Na te Atua Mana hope ïa i horoa ia Iesu i te mana e te tiaraa ia faatere e ia faatupu i ta ’na haavaraa. E pinepine te Bibilia i te faahoho‘a i te parau-tia i te ǔ uouo. Mea tano mau te reira no te faahoho‘a i te tama‘i parau-tia arataihia e te Tamaiti a te Atua.—Apokalupo 3:4; 7:9, 13, 14.

Afea i haamata ’i te hororaa a teie na feia faahoro puaarehenua? A tapao na, ua haamata te taata faahoro puaarehenua matamua, o Iesu ïa, i ta ’na hororaa i te taime e horoahia ia ’na te hoê hei upoo arii. (Apokalupo 6:2) Afea Iesu i te riroraa mai ei arii i te ra‘i? E ere i te taime i ho‘i ai o ’na i te ra‘i. Te faaite ra te Bibilia e titauhia ia ’na ia tiai rii. (Hebera 10:12, 13) Ua horoa Iesu i ta ’na mau pǐpǐ i te tapao o te faaite ua hope te taime tiairaa e ua haamata o ’na i te faatere i te ra‘i. Ua parau oia, e tupu te ati na te ao atoa nei, i te hoê faito eita e nehenehe e faaau. E itehia te tama‘i, te o‘e e te ma‘i pee. (Mataio 24:3, 7; Luka 21:10, 11) I muri noa mai i te Tama‘i rahi matamua o tei tupu i 1914, ua ite-papu-hia e ua haamata te tau ta te Bibilia e pii ra, “te mau mahana hopea.”—Timoteo 2, 3:1-5.

No te aha aita te tupuraa o te ao i maitai mai i muri a‘e Iesu a riro ai ei arii i 1914? No te mea i tera matahiti, ua haamata Iesu i te faatere i te ra‘i, eiaha râ i nia i te fenua. Ua tupu te tama‘i i te ra‘i e ua huri mai te Arii apî o Iesu, pii-atoa-hia Mikaela, ia Satani e ta ’na mau demoni i raro nei. (Apokalupo 12:7-9, 12) E riri rahi to Satani, ua ite hoi e taime poto to ’na e toe ra. Fatata roa te Atua i te faatupu i to ’na hinaaro i nia i te fenua nei no nia ia Satani. (Mataio 6:10) I teie nei, e hi‘o ana‘e mea nafea na taata faahoro puaarehenua e toru e haapapu ai e te ora ra tatou i te tau ino mau o “te mau mahana hopea.” Ua ite atura tatou o Iesu te taata faahoro puaarehenua matamua. Area tera na e toru i muri mai ia ’na, te faahoho‘a ra ïa e toru ati ta te huitaata e faaruru na te ao.

 TE TAATA FAAHORO PUAAREHENUA UTEUTE

“Ite atura vau i te tahi atu puaarehenua, mea uteute, e ua faatiahia tei parahi ra i nia iho ia faaore i te hau i nia i te fenua, ia haapohe hoi te taata te tahi i te tahi. E ‘o‘e rahi tei horoahia na ’na.”—Apokalupo 6:4.

Te faahoho‘a ra teie taata faahoro puaarehenua i te tama‘i. A tapao na e faaore o ’na i te hau na te fenua taatoa, eiaha râ i te tahi noa mau vahi. I 1914, ua ô te mau nunaa na te ao i roto i te tama‘i rahi, a tahi ra te reira a tupu ai i roto i te aamu o te taata nei. I muri a‘e, ua tupu te piti o te tama‘i rahi e tei mua ’tu â to ’na ino. Te parau ra vetahi mai 1914 mai, ua hau atu i te 100 mirioni tei pohe no te mau tama‘i e no te mau aroraa i rotopu i te tahi mau nunaa taata. E ere râ tera ana‘e, mea rahi atoa hoi o tei roohia i te fifi e tei mauiui no tera mau tama‘i.

Ua tae roa te tama‘i i teihea faito? Eita e nehenehe e faaau. I teie mahana, te vai ra te mauhaa no te haamou roa i te huitaata. E te mau faanahonahoraa mai te Nunaa Amui o tei haamauhia no te faatupu i te hau, e ravea anei ta ratou? Aita roa, eita hoê noa ’‘e e nehenehe e tapea i te hororaa a tei parahi i nia i te puaarehenua uteute.

TE TAATA FAAHORO PUAAREHENUA EREERE

“Ite atura vau e inaha, te hoê puaarehenua ereere, e e faito tei te rima o tei parahi ra i nia iho. Faaroo atura vau mai te hoê reo i ropu i na melahi e maha i te parauraa: ‘Hoê kilo sitona, hoê ïa denari. E toru kilo kerite, hoê ïa denari, e eiaha e hauti i te hinu olive e te uaina.’”—Apokalupo 6:5, 6.

Te faahoho‘a ra teie taata faahoro puaarehenua i te o‘e. Te faaite ra te reira e maraa roa ino te moni hoo o te maa. Te denari, o te tino moni e noaa i te hoê mahana ohiparaa i te senekele matamua. Te na ôhia ra, i te hoê denari, 700 tarama sitona ana‘e te noaa mai. (Mataio 20:2) I te hoê noa â denari, e nehenehe e hoo mai 2 kilo kerite, e huero maa tera mea iti a‘e to ’na maitai i to te sitona. Eita râ te reira e navai no te faatamaa i te hoê utuafare rahi! Te faaarahia ra te taata ia tarani i te maa, ta te hinu olive e te uaina ïa e faahoho‘a ra. E maa hoi te reira o tei faaohipahia na i te mau mahana atoa i tera ra tau.

Ua ite papu anei tatou ua haamata tei parahi i nia i te puaarehenua ereere i ta ’na hororaa mai 1914 mai? E! Mai 1901 e tae roa i 2000, hau atu i te 70 mirioni tei pohe no te o‘e. Ia au i te tahi titorotororaa, e au ra 805 mirioni taata, hoê ïa taata i nia e iva, tei ore i navai i te maa mai 2012 e tae atu 2014. Ua parauhia i te mau matahiti atoa, mea rahi a‘e te taata o tei pohe no te o‘e ia amuihia te mau numera o tei pohe no te he‘a mate, no te paludisme e no te ma‘i tutoo. Noa ’tu te ohipa rahi o te ravehia ra no te faatamaa i te feia e pohe ra i te poia, te tamau noa ra tei parahi i nia i te puaarehenua ereere i ta ’na hororaa.

TE TAATA FAAHORO PUAAREHENUA MAHE‘AHE‘A

“Ite atura vau e inaha, te hoê puaarehenua mahe‘ahe‘a, e o Pohe te i‘oa o tei parahi ra i nia iho. Te na muri noa mai ra te Apoo ia ’na. Ua horoahia ia raua te mana i nia i te maha o te tuhaa o te fenua, e haapohe i te taata i te ‘o‘e roa e i te o‘e e i te ma‘i pohe e i te animara oviri.”—Apokalupo 6:8.

Te faahoho‘a ra tei parahi i nia i te puaarehenua mahe‘ahe‘a i te pohe o tei tupu i muri a‘e i te tahi ma‘i aore ra ati. I muri iho 1914, hau atu i te ahuru mirioni taata tei pohe no te fiva Paniora. E au ra 500 mirioni taata tei roohia i tera ma‘i, hoê ïa taata i nia e toru o te huiraatira na te ao i tera tau!

E haamataraa noa râ te fiva Paniora. Te faaite ra te tahi mau taote, ua hau atu i te 300 mirioni taata tei pohe no te tahi hoho‘a ma‘i opupu i te mau matahiti 1901 e tae mai i 2000. Tae roa mai i teie mahana, e mirioni taata o te pohe nei no te he‘a mate, te ma‘i tutoo e te paludisme noa ’tu te mau maimiraa rahi o tei ravehia.

 I muri a‘e i te tama‘i, te o‘e e te ma‘i, o te pohe te itehia. Aita e hororaa, aita hoi te Apoo e faaea ra i te faaî ia ’na i te taata pohe.

E ORARAA OAOA TE TIAI MAI RA!

Fatata teie tau ati i te hope. I 1914, ua haamata Iesu i te “horo . . . ia pau to ’na mau enemi.” Ua huri mai oia ia Satani i raro i te fenua nei. Aita râ ta ’na hororaa i oti atura a upootia roa ’tu ai o ’na. (Apokalupo 6:2; 12:9, 12) Te piri mai ra Aramagedo, i reira Iesu e tapea ’i i te mau ohipa a Satani e e haamou ai i te feia o te turu ra ia ’na. (Apokalupo 20:1-3) Eita noa Iesu e tapea i te hororaa o na toru taata faahoro puaarehenua, e faaore atoa râ oia i te ino e te mauiui ta ratou i faatupu. Eaha ta ’na e rave? A hi‘o na i ta te Bibilia e fafau ra.

E ore te tama‘i e e itehia te hau. E faaore Iehova “i te tama‘i e tae roa a‘enei i te hopea fenua! ua ofati oia i te fana, e ua tapûpû i te mahae.” (Salamo 46:9) E no te feia o te hinaaro i te hau, “e oaoa ratou i te rahi o te hau.”—Salamo 37:11.

E ore te o‘e e e auhune te maa. “E riro hoi e maa sitona tei te fenua i nia i te tupuai o te mau mou‘a.”—Salamo 72:16.

Fatata Iesu i te faaore i te mau mauiui ta te hororaa o na taata faahoro puaarehenua e toru i faatupu

E ore te ma‘i e te pohe. E fana‘o tatou paatoa i te ea maitai roa e te ora mure ore. Na te Atua “e tamǎrô . . . i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:4.

I nia i te fenua, ua faaite Iesu eaha te mau ohipa mahanahana mau ta ’na e rave i mua nei i raro a‘e i ta ’na faatereraa. Ua haapii oia ia faatupu i te hau, ua rave i te semeio no te faatamaa e tausani taata, ua faaora i tei ma‘i e ua faatia mai tei pohe i te ora.—Mataio 12:15; 14:19-21; 26:52; Ioane 11:43, 44.

Eaha te tia ia rave ia ineine oe hou a hope ai te hororaa o na taata faahoro puaarehenua? Ma te faaohipa i ta oe iho Bibilia, e oaoa te mau Ite no Iehova i te tauturu atu. E hinaaro anei oe e ite atu â?

^ par. 7 O Iehova te i‘oa o te Atua i roto i te Bibilia.

No te ite atu â

A ARA MAI NA!

Ta te Bibilia e parau ra no nia i te hopea o teie nei ao

Eaha te “ao” o te mou? E nafea e afea te reira e tupu ai?

PARAU APÎ OAOA A TE ATUA

Eaha te parau apî oaoa?

Haapii eaha te parau apî no ǒ mai i te Atua, no te aha mea faufaa roa ’i e ia aha ïa tatou.