Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 1 2017

E hape nainai anei?

E hape nainai anei?

Ua ite te tahi tamahine i nia i te hoê fare i te auauahi o tei rahi roa mai e ua meumeu roa mai te ata ra te huru. Na ô a‘era oia, e hamanihia te mau ata i roto i tera fare. Mea arearea te hape nainai mai tera no ǒ mai i te tamarii. Ia tupu râ te reira no te mau mea faufaa, e nehenehe to tatou oraraa e taui roa. Mai tera te huru, ua hape ana‘e te raau ta tatou i rave.

Ua hape atoa ana‘e tatou no nia i te mau haapiiraa no ǒ mai i te Atua, mea ino roa ’tu â ïa. Tera tei tupu i te taa-ore-raa vetahi i ta Iesu haapiiraa. (Ioane 6:48-68) Aita ratou i hinaaro e faaroo i te faataaraa mau, ua patoi râ i te mau haapiiraa atoa a Iesu. Auê te peapea e, o ratou tei ere!

Te taio ra anei oe i te Bibilia no te fana‘o i ta ’na aratairaa? Mea au roa. Mai e rave rahi râ, e nehenehe paha oe e ore e taa maitai i te tahi mau irava. E hi‘o ana‘e e toru hi‘oraa.

  • Aita vetahi i taa maitai i te auraa o te parau “o te Atua te mǎta‘u atu.” No ratou, e tia ia riaria tatou ia ’na. (Koheleta 12:13) E ere râ tera ta te Atua e hinaaro no te feia e haamori ia ’na. Ua na ô hoi oia: “Eiaha e mǎta‘u, tei pihai-atoa-iho vau ia oe; eiaha e taiâ, o vau hoi to Atua. E faaetaeta vau ia oe, e tauturu vau ia oe.” (Isaia 41:10) Teie râ te auraa mau ia mǎta‘u i te Atua, e faahiahia e e faatura rahi tatou ia ’na.

  • E haamouhia anei te fenua i te auahi?

    Ua hape atoa vetahi i to ratou taioraa i teie mau parau faaurua: “E tau to te mau mea atoa nei, . . . e taime to te fanau, e taime to te pohe.” Na ô a‘era ratou, ua faataa ê na te Atua i te mahana e pohe ai tera e tera taata. (Koheleta 3:1, 2) Te auraa mau râ, te faaite ra tera irava mai te aha te huru o te oraraa o te taata e te faataa ra, e pohe iho â tatou paatoa. Te haapii atoa ra te Parau a te Atua, e nehenehe to tatou pue mahana e maoro ia au i te mau faaotiraa ta tatou e rave. Te na ô ra hoi: “Tei te mǎta‘u ia Iehova e maoro ai to te taata nei pue mahana.” (Maseli 10:27; Salamo 90:10; Isaia 55:3) E parau mau roa, ia haapao tatou i te Parau a te Atua, eita tatou e rave i te mau peu o te tuino i to tatou tino mai te inu-hua-raa i te ava e te mau peu taotoraa tia ore.—Korinetia 1, 6:9, 10.

  • Ua mana‘o roa vetahi e haamou te Atua i te fenua no to ratou taioraa i roto i te Bibilia e te tapeahia ra te ra‘i e te fenua no “te auahi.” (Petero 2, 3:7) Ua fafau râ te Atua eita roa oia e vaiiho ia haamouhia te fenua. Te na ô ra hoi te Bibilia: “Te ore nei te tahi ui, e te itea maira te tahi; area te fenua nei te vai noa nei â ïa.” (Koheleta 1:4; Isaia 45:18) Te faahoho‘a ra te auahi i te hoê haamouraa papu. E ere te fenua iho te haamou-roa-hia, o teie ao ino râ. Ia faahitihia te parau ra‘i, te mana‘ohia ra ïa i te ao nui aore ra i te parahiraa o te Atua. Eita roa te reira e haamouhia.

NO TE AHA EITA TE BIBILIA E TAAHIA I TE TAHI TAIME?

Mai ta oe i ite i roto i na hi‘oraa e toru, e pinepine te taata i te hape no nia i te auraa mau o ta ratou e taio i roto i te Bibilia. No te aha râ te Atua e vaiiho ai ia tupu te reira? E na ô vetahi, ‘Mai te peu e Atua î i te paari e te ite, e horoa mai oia i te hoê buka e nehenehe te taata atoa e taa ohie i tei papaihia! No te aha aita o ’na i na ô?’ E hi‘o ana‘e e toru tumu.

  1. Ua faaineinehia te Bibilia ia taa te feia haehaa e tei farii i te haapii mai. Ua parau Iesu i to ’na Metua: “E haamaitai au ia oe, e tau Metua, e te Fatu o te ra‘i e te fenua, i te mea, huna ê noâ oe i teie nei mau parau i te feia paari  e te ite ra, ua faaite mai oe i te tamarii nei.” (Luka 10:21) Ua papaihia te Bibilia ia taa te feia aau haehaa i ta ’na poroi. Eita râ e tia i te feia teoteo, te huru ïa o “te feia paari e te ite ra.” E haamaitaihia te taata o te taio i te Bibilia mai “te tamarii” ra te huru, ma te haehaa e te ineine i te haapii mai, e taa maitai hoi ratou i te poroi a te Atua. E ere anei i te mea aravihi i te na reiraraa!

  2. Ua faaineinehia te Bibilia no te feia o te hinaaro mau i te tauturu a te Atua no te taa i te reira. Ua faaite Iesu i te taata e titauhia te tauturu no te taa mau i ta ’na i haapii. Eaha ïa tera tauturu? Ua faataa Iesu: “Na te Faaa‘o râ, na te Varua Maitai ra, o ta te Metua e tono mai ma to ’u nei i‘oa ra, na ’na e haapii mai ia outou i te mau mea atoa.” (Ioane 14:26) E horoa ïa te Atua i to ’na varua mo‘a, to ’na puai ohipa, no te tauturu i te taata ia taa i ta ratou e taio i roto i te Bibilia. Eita râ oia e horoa i te reira i te feia o te ore e ani ia ’na i te tauturu. No reira ratou e ore ai e maramarama no nia i ta te Bibilia e parau ra. E turai atoa te varua mo‘a i te mau Kerisetiano o tei fana‘o ê na i te ite papu ia farerei e ia tauturu i te feia o te hinaaro ra e taa i te Bibilia.—Ohipa 8:26-35.

  3. E taahia te tahi mau irava Bibilia i te taime faataahia. Ua parauhia i te peropheta Daniela ia papai i te tahi poroi o te tupu i muri a‘e. Ua na ô te hoê melahi ia ’na: “E Daniela, e opani i teie nei mau parau, e tapiri atu i te buka e tae noa ’tu i te tau hopea ra.” Tau tausani matahiti i muri a‘e, ua taio e rave rahi i te buka a Daniela ma te ore râ e taa i te auraa. O Daniela iho, aita oia i taa i te tahi mau mea ta ’na i papai. Ua na ô oia ma te haehaa: “Te faaroo atura vau, aita râ vau i ite.” Na reira atoa no te feia o te taa maitai i muri a‘e i te parau tohu ta Daniela i papai, e maramarama noa ratou i te taime ta te Atua i maiti. Ua faataa te melahi: “A haere, e Daniela: ua opanihia taua parau nei, ua tapirihia e tae noa ’tu i te tau hopea ra.” O vai te taa i te mau poroi a te Atua? “E ore hoi te taata ino e ite e ite râ te feia paari.” (Daniela 12:4, 8-10) Eita ïa te Atua e horoa i te maramarama no te taa i te tahi mau irava Bibilia na mua ’‘e i te taime ta ’na i faataa.

Ua hape atoa anei te mau Ite no Iehova no nia i te auraa o te tahi mau irava Bibilia? E. I te taime râ ta te Atua i maiti no te haamaramarama ’tu, ua faatano te mau Ite i ta ratou haapiiraa. Ua na reira no te pee i te hi‘oraa o te mau aposetolo a te Mesia. Ua farii hoi ratou ma te haehaa i te faatano i to ratou feruriraa i to Iesu a‘oraa ’tu.—Ohipa 1:6, 7.

E hape nainai te mana‘o ta te tamahine faahitihia i te omuaraa. Ta te Bibilia râ e haapii ra, mea faufaa roa no oe! Te mana‘o ra vetahi, e navai noa ia taio i te Bibilia no te taa i ta ’na poroi. O oe râ, a ani i te tauturu. A imi i te feia o te haapii ra i te Bibilia ma te haehaa, o te ani ra i te varua mo‘a o te Atua e o tei papu te ora nei tatou i te tau e hinaaro ai te Atua ia maramarama ’tu â te taata no nia i te Bibilia. Eiaha e taiâ i te paraparau i te mau Ite no Iehova aore ra i te hi‘opoa i ta ratou mau maimiraa i rave i nia i te reni Internet jw.org. Te fafau ra te Bibilia: “Ia titau hua oe i te haapao maitai, . . . e noaa ïa ia oe te ite i te Atua.”—Maseli 2:3-5.