Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA No 1 2017

 A PEE I TO RATOU FAAROO | ENOHA

“Te mauruuru ra te Atua ia ’na”

“Te mauruuru ra te Atua ia ’na”

MEA fifi paha no tatou ia feruri e nehenehe te taata e ora e 365 matahiti! Tera te faito matahiti o Enoha! Fatata ua tataipae te faito matahiti e naea i te taata ia faaauhia i teie mahana. Mea apî roa râ o ’na no te taata o to ’na tau. A hau atu pae tausani matahiti i teie nei, mea ora maoro a‘e te taata. Hau atu ono hanere matahiti to Adamu a fanauhia ’i Enoha, e ua ora faahou â o ’na e toru hanere matahiti i muri iho. Te vai ra atoa te tahi o to ’na huaai o tei ora maoro a‘e ia Adamu. Noa ’tu e 365 matahiti to ’na, e taata itoito noâ Enoha, e nehenehe e mana‘ohia e ora maoro atu â oia, e ere râ tera ta tatou e ite mai.

Te imi ra te taata i te haapohe ia ’na. A feruri na! Te horo ra o ’na e tapuni ia ’na. Te vai noa ra i roto i to ’na feruriraa te huru o te feia ta ’na i faaite iho nei i te poroi a te Atua. Te itehia ra i nia i to ratou hoho‘a mata te riri e to ratou hae ia Enoha. Aita ratou i au i ta ’na poroi, oia atoa i te Atua o tei tono mai ia ’na. Eita ratou e nehenehe e hauti ia Iehova, to Enoha Atua, ia ’na râ oia ïa! Ua mana‘o anei Enoha eita o ’na e farerei faahou i ta ’na vahine, mau tamahine, ta ’na tamaiti o Metusela aore ra ta ’na mootua o Lameha? (Genese 5:21-23, 25) Eaha te tupu i muri iho?

Aita i rahi te parau no nia ia Enoha. E toru ana‘e buka Bibilia tei faahiti ia ’na. (Genese 5:21-24; Hebera 11:5; Iuda 14, 15) Noa ’tu râ, ua navai teie mau irava no te faaite e faaroo puai to Enoha. E utuafare anei to oe? Ua faaruru anei oe i te patoiraa no te mea te rave ra oe i te mea tia? Mea rahi ta oe e nehenehe e haapii mai no nia i to Enoha faaroo.

“UA AU MAITE TO ENOHA HAEREA I TE ATUA”

I te tau o Enoha, te rave noa ra te taata i te ohipa ino. O ’na te hitu o te u‘i i roto i te huaai a Adamu. Aita ratou i atea roa i te huru tia ta Adamu raua Eva i ere. Te tumu ïa i ora maoro ai te taata i tera tau. E oraraa haapao ore râ to ratou e ua atea roa atoa i te Atua. Ua î roa te fenua i te ino! Ua haamata ê na i te piti o te u‘i, te taime a taparahi pohe ai Kaina i to ’na taeae ia Abela. Ua teoteo roa te tahi i roto i te huaai o Kaina e mea ino a‘e oia e ua titau ia tahoohia ’tu â o ’na ia Kaina! I te toru o te u‘i, e peu apî atura ïa tei itehia. Ua haamata te taata i te tiaoro i te i‘oa o Iehova, eiaha no te haamori ia ’na, no te faaino râ i to ’na i‘oa mo‘a.—Genese 4:8, 23-26.

Tera te peu a te taata i te tau o Enoha i roto i ta ratou huru haamoriraa. A paari noa ’i Enoha, e tia ia rave o ’na i te hoê faaotiraa. E pee anei i te rahiraa o te taata i to ’na ra tau aore ra e imi i te Atua mau o Iehova tei hamani i te ra‘i e te fenua? Eita e ore ua hinaaro oia e ite atu â no nia ia Abela, tei taparahihia no te mea ua haamori o ’na ia Iehova mai ta ’na e titau mai ra. E ua faaoti Enoha i te pee i te hi‘oraa o Abela! Te parau ra te Genese 5:22: “Ua au maite to Enoha haerea i te Atua.” Na roto i teie mau parau, te taahia ra mea taa ê roa Enoha i te toea o te taata o tera tau. O ’na te taata matamua i roto i te Bibilia tei faataahia mai tera.

 Te parau atoa ra tera irava, ua tamau noa Enoha i te vaiiho ia Iehova ia aratai ia ’na i muri a‘e i te fanauraa o ta ’na tamaiti o Metusela. Ua riro Enoha ei metua tane i te 65raa o to ’na matahiti. Aita te Bibilia e faahiti ra i te i‘oa o ta ’na vahine e ehia “ta ’na tamarii tamaroa, e te tamarii tamahine.” Ia tavini te hoê metua tane i te Atua a haapao noa ’i i to ’na utuafare, e tia ia tutava oia i te aupuru ia ratou mai ta te Atua e titau ra. Ua taa maitai ia Enoha aita o Iehova i hinaaro ia taiva oia i ta ’na vahine. (Genese 2:24) E eita e ore, ua rave oia i te mau mea atoa no te haapii i ta ’na tamarii o vai te Atua ra o Iehova. Eaha te mau haamaitairaa ta ’na i ite?

Mea iti roa ta te Bibilia e faahiti ra. Aita rea parau atoa no nia i te faaroo o Metusela te tamaiti a Enoha. O ’na te taata o tei ora maoro roa ’‘e ta te Bibilia i faahiti e ua pohe i te matahiti a tupu ai te diluvi. Ua fanau râ ta Metusela tamaiti o Lameha e ua ora faahou o Enoha hanere matahiti i muri a‘e i te reira. Ua faatupu o Lameha i te faaroo i te Atua. Ua faaue Iehova ia ’na ia faahiti i te hoê parau tohu no nia i ta ’na tamaiti o Noa e ua tupu te reira i muri a‘e i te diluvi. Mai ia Enoha, te papa ruau o to ’na metua tane, ua vaiiho Noa i te Atua ia aratai ia ’na. Aita oia i farerei noa ’‘e ia Enoha, ua faatia ’tu râ paha te tahi mero o to ’na utuafare i te aamu o Enoha. Na vai i faatia ’tu? Na Lameha anei? Peneia‘e na Metusela aore ra na Iareda, te metua tane o Enoha? E 366 matahiti hoi to Noa a pohe ai oia. Te mea papu râ, ua vaiiho atu Enoha i te hi‘oraa maitai.—Genese 5:25-29; 6:9; 9:1.

Mea taa ê roa Adamu ia Enoha. Noa ’tu e taata tia roa o Adamu, ua faaroo ore o ’na ia Iehova e ua vaiiho i to ’na huaai i te huru orure hau e te mauiui. Area Enoha, e taata tia ore, ua vaiiho râ i te hi‘oraa maitai no nia i te faaroo. Ua pohe Adamu e e 308 matahiti to Enoha i tera taime. Ua oto anei te utuafare ia ’na noa ’tu e taata miimii mau? Aita tatou i ite. Te mea papu râ, ua “au maite hoi to Enoha haerea i te Atua.”—Genese 5:24.

E nehenehe te faaroo o Enoha e tauturu ia oe ia aupuru i to utuafare. Mea maitai ia tâu‘a i te hinaaro pae tino o to utuafare, mea faufaa ’tu â râ ia haapao i to ratou auhoaraa e te Atua. (Timoteo 1, 5:8) E na reira oe na roto i ta oe mau parau e ohipa atoa râ. Ia maiti oe i te pee i te hi‘oraa o Enoha, e vaiiho ïa oe i te mau aratairaa a te Atua ia faatere i to oe oraraa. Tera te faufaa maitai roa ’‘e ta oe e vaiiho i to oe utuafare!

O ENOHA “TEI TOHU ÏA I TEIE NEI FEIA”

Ua mo‘emo‘e roa paha o Enoha, o ’na ana‘e hoi tei faaite i te faaroo i to ’na ra tau. Ua ite râ anei to ’na ra Atua o Iehova i te reira? E! Ua tae i te mahana e paraparau ai o Iehova i to ’na tavini taiva ore. Ua faaue te Atua ia Enoha ia faaite i te hoê poroi i te taata o to ’na tau. Faariro atura oia ia Enoha ei peropheta, ua faaite te Bibilia eaha ta ’na poroi matamua. Ua ite tatou i te reira no te mea ua faaurua te Atua ia Iuda, te taeae o Iesu, ia papai i  te mau parau ta Enoha i tohu ehia a‘enei matahiti i teie nei. *

Eaha ta Enoha i tohu? Teie ta ’na mau parau: “Inaha te haere mai na te Fatu [ra o Iehova], ma te ahuru atoa o te tausani o tana feia mo‘a ra, e faautua mai i te taata atoa, e e faaite hoi i te mau paieti ore atoa i roto ia ratou, i ta ratou mau parau paieti ore atoa i ravehia e ratou ra, e te mau parau etaeta atoa o te feia hara paieti ore i parau ia ’na ra.” (Iuda 14, 15) Te tapao ra anei oe, ua faahiti Enoha i tera mau parau mai te huru ra ua faatupu a‘ena te Atua i te reira. Tera atoa te itehia i roto i te tahi atu mau parau tohu i muri a‘e. Eaha ta te reira e faaite ra? Ua papu i te peropheta e tupu iho â ta ’na i tohu i faaite ai oia i te reira mai te huru ra ua tupu a‘ena!—Isaia 46:10.

Ua faaite Enoha i te poroi a te Atua ma te mǎta‘u ore i te feia patoi

Ua uiui paha o Enoha e faaroohia anei ta ’na poroi? A tapao na mea nafea o ’na i te faaararaa ia ratou. E ere hoê ana‘e taime to ’na faahitiraa i te parau “paieti ore.” Ua hinaaro oia e faaite i te huru o te taata, ta ratou mau ohipa e peu. Ua riro ïa ta ’na parau tohu ei faaararaa no te feia atoa ua ino roa te ao mai te taime a tiavaruhia ’i te taata i rapae i te ô i Edene. E ite tera ao ino i te haamouraa ia haere mai o Iehova “ma te ahuru atoa o te tausani o tana feia mo‘a ra,” ta ’na ïa nuu melahi puai. Ua hopoi o Enoha ma te mǎta‘u ore i tera poroi faaararaa a te Atua noa ’tu o ’na ana‘e tei na reira! Mai te peu ua ite Lameha i to ’na papa ruau ia poro, eita e ore ua faahiahia o ’na i te itoito o Enoha.

E turai mai te faaroo o Enoha ia tatou ia uiui te hi‘o ra anei tatou i teie nei ao mai ia Iehova. Te tano noa ra ta Enoha poroi haavaraa i faaite ma te itoito no teie tau, e au hoi te ao i teie mahana mai te tau o Enoha. Ia au i te faaararaa a Enoha, ua faatupu o Iehova i te diluvi no te haamou i te mau ohipa e taata ino atoa i te tau o Noa. Ua riro râ te reira ei faaararaa no te haamouraa e tiai mai ra ia tatou. (Mataio 24:38, 39; Petero 2, 2:4-6) I teie atoa mahana, ua ineine te Atua e ta ’na mau tausani melahi i te hopoi mai i te haavaraa tia i nia i teie nei ao o tei atea ê roa i te Atua. E tia ia haapao maite te taata taitahi i te faaararaa a Enoha e ia faaite atoa i te reira ia vetahi ê. Peneia‘e, e hi‘o ê mai te fetii e te mau hoa ia tatou. E mo‘emo‘e atoa paha tatou i te tahi taime. Aita roa râ o Iehova i faarue ia Enoha, eita atoa oia e faarue i ta ’na mau tavini taiva ore o teie tau!

“I TAHITIHIA ’I ENOHA IA ORE OIA IA ITE I TE POHE”

Eaha tei tupu no Enoha? Mea iti roa atoa te parau no nia i to ’na pohe. Teie noa ta te Genese e parau ra: “I au maite hoi to Enoha haerea i te Atua, e aita ra oia; ua hopoi-ê-hia hoi oia e te Atua ra.” (Genese 5:24) Eaha te auraa ua hopoi-ê-hia Enoha e te Atua? Ua pahono te aposetolo Paulo i muri a‘e: “No te faaroo i tahitihia ’i Enoha ia ore oia ia ite i te pohe; e aita ra oia, no te mea ua tahitihia oia e te Atua; hou hoi oia i tahitihia ’i i ite ai oia e, te mauruuru ra te Atua ia ’na.” (Hebera 11:5) Eaha ta Paulo i mana‘o i to ’na parauraa “i tahitihia ’i Enoha ia ore oia ia ite i te pohe”? I roto i te tahi atu mau huriraa Bibilia, ua tuuhia ua rave te Atua ia Enoha no te afai ia ’na i te ra‘i. Mea hape râ, te faaite ra hoi te Bibilia o Iesu Mesia te matamua o tei faatiahia no te ora i te ra‘i.—Ioane 3:13.

Mea nafea o Iehova i hopoi ê ai ia Enoha “ia ore oia ia ite i te pohe”? Ua rave o Iehova i te ora o Enoha  ia ore oia ia ite i te hoê pohe ino mau i te rima o te feia i hae ia ’na. Na mua ’‘e râ, ua ite Enoha te mauruuru ra te Atua ia ’na. Hou a pohe ai, ua ite oia i te hoê orama no ǒ mai i te Atua, peneia‘e o te faaite ra ua riro te fenua ei paradaiso. I muri iho i tera haapapuraa oraora mau o te farii maitai a Iehova, ua taoto Enoha i roto i te pohe. Ma te mana‘o i te tahi atu mau tavini taiva ore o te Atua e ia Enoha atoa, ua na ô te aposetolo Paulo: “I pohe ana‘e atura taua feia ra ma te faaroo.” (Hebera 11:13) I muri a‘e, ua imi te mau enemi o Enoha i to ’na tino, “e aita ra” i itehia. Peneia‘e, ua haamo‘e o Iehova i te reira ia ore te taata ia tuino aore ra ia faaohipa i to ’na tino i roto i ta ratou haamoriraa hape. *

Na roto i te hi‘opoaraa ta tatou i rave na mua ’tu, e tamata ana‘e i te feruri mea nafea Enoha i te poheraa. A haamana‘o râ, e mana‘o noa teie, e ere mai te huru ra ua tupu iho â mai tera. A feruri na te horo ra Enoha, ua oti roa o ’na i te rohirohi. Era ’tu to ’na mau enemi e tapapa ra ia ’na, ua riri e ua hae roa ino no ta ’na poroi haavaraa. Itehia maira ia Enoha te hoê vahi no te tapuni e no te faafaaea rii, ua taa râ ia ’na ua fatata roa mai to ’na pohe ino mau i te rima o to ’na mau enemi. I reira, pure atura oia ia Iehova. I muri iho, ua tamǎrû te hau no ǒ mai i te Atua ia ’na, ite a‘era Enoha i te hoê orama oraora mau mai te huru ra tei reira roa o ’na.

Ua rave o Iehova ia ’na ia ore oia ia ite i te hoê pohe ino mau

Mea taa ê râ i ta ’na i matau. E au te nehenehe o te vahi ta ’na e ite ra mai to te ô i Edene, aita râ e kerubi o te tiai ra i te e‘a. Te mau taata atoa ta ’na e ite ra i reira, mea apî ana‘e e mea oraora maitai to ratou tino! Te vai ra te hau i rotopu ia ratou. Aita hoê noa ’‘e o te hae ra e te hamani ino ra i te tavini o te Atua mai ta Enoha i faaruru a‘enei. Ua ite oia i te haapapuraa o te here o Iehova e ta ’na farii maitai. Ua papu ia ’na tei reira to ’na parahiraa tano. I tera taime, ua tamǎrû roa ’tu â te hau o te Atua ia ’na, tapiri a‘era Enoha i to ’na mata, taoto ihora i roto i te pohe.

Tae roa mai i teie nei, te vai maite ra Enoha i roto i te mehara o te Atua ra o Iehova! Mai ta Iesu i fafau i muri a‘e, e faaroo te feia atoa o ta te Atua e haamana‘o i te reo o te Mesia i te hoê mahana. E tia faahou mai ratou, e ite to ratou mata i te nehenehe e te hau i roto i te ao apî.—Ioane 5:28, 29.

E hinaaro anei oe e ora atoa i roto i te ao apî? A feruri na i te oaoa ia farerei ia Enoha, e faatia mai oia e rave rahi ohipa faahiahia! E nehenehe o ’na e haapapu i tei tupu mau na mua ’‘e i to ’na poheraa. Mea ru râ ia haapii mai tatou i to ’na hi‘oraa i teie nei â. Ua paraparau Paulo no Enoha e muri a‘e, teie ta ’na i faahiti: “Aore e faaroo ra e ore roa oia [te Atua] e mauruuru.” (Hebera 11:6) Auê tumu faufaa roa ia pee i te hi‘oraa o te faaroo puai o Enoha!

^ par. 14 Ua parau vetahi taata hi‘opoa Bibilia, ua faahiti Iuda i tei piihia te buka a Enoha, e papai te reira e ere i te mea faaurua e te Atua. E buka noa râ tera o tei hamanihia e te mana‘o taata e mea hape ia parau no ǒ mai ia Enoha te reira. Peneia‘e, te faahiti ra ma te tano i te parau tohu ta Enoha i faaite, na te tahi taata paha i tahito i faatia i te reira, na roto i te tahi papai aore ra ma te parau vaha noa, aita râ i tae roa mai ia tatou. Ua ite paha Iuda i te reira na roto i te hoê â ravea no tahito mai e aore ra na Iesu paha i faaite atu i te parau no Enoha. O ’na hoi tei ite mata i te haerea o tera tavini a te Atua mai te ra‘i mai.

^ par. 20 Ua ara maitai atoa te Atua i te haamo‘e i te tino o Mose e to Iesu no te hoê â tumu.—Deuteronomi 34:5, 6; Luka 24:3-6; Iuda 9.