Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 1 2017

 UA TAUI TE BIBILIA I TO ’U ORARAA

Aita vau i hinaaro e pohe!

Aita vau i hinaaro e pohe!
  • MATAHITI FANAURAA: 1964

  • FENUA: BERETANE

  • AAMU: OHIPA IINO E MEA APÎ ROA I TE TAMARIIRAAHIA

NA MUA ’‘E

Ua fanauhia vau i Paddington, te tahi tuhaa oire taata roa i Lonedona, Beretane. E ora na vau na muri i to ’u mama e to ’u na tuahine paari e toru. Eita papa e mou na i te fare no ta ’na mau peu taero ava.

I to ’u tamariiraa, ua haapii mai mama ia pure i te mau po atoa. Mea nainai roa ta ’u Bibilia, o te mau Salamo ana‘e to roto. Ua imi au i te mau nota no te himene i te reira. Te haamana‘o ra vau, ua taio vau i te tahi parau i roto i te hoê buka a te haapiiraa o tei faahuru ê roa ia ’u. Teie tei papaihia: “Aita to tatou e ananahi!” E ara pinepine au i te maororaa po no tera mau parau. Ua na ô noa vau, ‘Eaha ïa, aita e tumu to te oraraa? No te aha vau i hamanihia ’i?’ Aita vau i hinaaro e pohe!

Mea au roa na ’u te mau ohipa maere. Ua tamata i te paraparau e te feia pohe, ua haere e mataitai i te mau vahi hunaraa ma‘i e te mau hoa haapiiraa e ua navenave roa i te mau hoho‘a teata riaria. No matou, e ohipa hauti e te riaria atoa râ.

Ua haamata vau i te faaite i te haerea orure hau i te ahuru-noa-raa o to ’u matahiti. Ua puhipuhi i te avaava e ua riro oioi ei peu na ’u. I muri a‘e, ua huti i te raau taero. I te 11raa o to ’u matahiti, ua inu i te ava. E ere te reira ta ’u i au, o te huru râ ta ’na e faatupu i muri a‘e, ua taero ana‘e oe. Mea au roa na ’u te upaupa e te ori. Ia nehenehe ta ’u, e tia noa vau i te mau vahi inuraa e te mau fare oriraa. Ua matau vau i te taie i te fare i te po e te ho‘i atu i te aahiata. No te rohirohi i te poipoi a‘e, pinepine au i te ore e haere i te haapiiraa. E ua haere ana‘e vau, e inu ïa na mua ’‘e a haere ai i te tahi atu piha haapiiraa.

E ere ta ’u mau nota i te mea faahiahia i te matahiti hopea o ta ’u haapiiraa. Ua ite mama e tamahine orure hau vau, ua inoino atu â râ e ua riri i to ’na iteraa i te reira. Ua tatama‘i mâua e ua faarue au i te fare. I muri a‘e, ua faaea vau i to ’u hoa o Tony, e taata eiâ, hoo i te raau taero e te  ino roa. Aita i maoro, ua hapû vau e i te 16raa o to ’u matahiti, ua fanau i ta mâua tamaiti matahiapo.

UA TAUI TE BIBILIA I TO ’U ORARAA

Ua farerei au i te taime matamua i te mau Ite no Iehova i te tahi pu no te mau metua vahine ana‘e e ta ratou aiû. Ua fariihia ia fana‘o vau i te hoê piha i reira. E piti vahine Ite no Iehova o te haere tamau mai e farerei i te tahi mau metua vahine apî. I te hoê mahana, ua apiti atu vau i ta ratou aparauraa. Ua hinaaro vau e faaite te hape ra te mau Ite. Tera râ, ua pahono ratou i ta ’u mau uiraa atoa ma te mǎrû e te papu maoti te Bibilia. E feia maitai e te mǎrû e ua au roa vau ia ratou. Ua farii a‘era vau i te hoê haapiiraa Bibilia.

Aita i maoro, ua haapii au i te tahi mea i roto i te Bibilia o tei taui i to ’u oraraa. Mai to ’u apîraa, aita vau i hinaaro e pohe. I teie nei râ, ua ite au i ta Iesu haapiiraa no nia i te tia-faahou-raa e te tâu‘a atoa ra te Atua ia ’u. (Ioane 5:28, 29; Petero 1, 5:7) Ua putapû roa vau i te mau parau o te Ieremia 29:11 o te na ô ra e: “Ua ite hoi au i te opua ta ’u i opua ia outou nei, te parau maira Iehova. E opuaraa hau ïa, e ere i to te ino; ia horoa ’tu vau i ta outou i tiaturi ra, i to outou hopea.” Ua tiaturi ihora vau e nehenehe au e fana‘o i te ora mure ore i roto i te paradaiso i nia i te fenua.—Salamo 37:29.

Ua faaite mai te mau Ite no Iehova i te here mau. Mea mahanahana e te anaanatae te putuputuraa matamua ta ’u i haere, e mata oaoa to te taata atoa. (Ioane 13:34, 35) E ere roa ’tu tera ta ’u i ite i te tahi atu fare pure! Ua farii maitai te mau Ite ia ’u noa ’tu to ’u tupuraa. Ua horoa mai hoi i te taime, ua tâu‘a ia ’u, ua faaroo e ua tauturu mai. Mai te huru ra tei roto vau i te hoê utuafare rahi î i te here.

I roto i ta ’u haapiiraa Bibilia, ua ite au e titauhia ia ’u ia rave i te mau tauiraa no te haapao i te mau titauraa a te Atua. E ere roa ’tu i te mea ohie ia faaea i te puhipuhi i te avaava. I te hoê â taime, ua taa ia ’u e rahi mai to ’u hinaaro e huti i te raau taero no te tahi mau himene ta ’u i faaroo na. Ua taui ihora vau ta ’u mau pehe. No te ore e tapea faahou i te ava, ua faaea vau i te haere i te vahi arearearaa e te mau fare oriraa. Ua imi au i te mau hoa o te turu mai ia ’u i roto i to ’u oraraa apî.—Maseli 13:20.

Ua haapii atoa Tony i te Bibilia e te mau Ite no Iehova i muri a‘e. Ua pahono ratou i ta ’na mau uiraa maoti te Bibilia e ua papu ia ’na o te parau mau ta ’na e haapii ra. Mea rahi te mau tauiraa ta ’na i rave. Ua faaea i te amuimui i to ’na mau hoa tahito, i te rave i ta ’na mau ohipa iino e te huti i te raau taero. No te faaoaoa ’tu â ia Iehova, e tia atoa ia faaafaro i to mâua oraraa ia paari ta mâua tamaiti i roto i te tahi utuafare hoê. Faaipoipo atura mâua i 1982.

“Eita vau e ara faahou i te po no to ’u riaria i te tupu a muri a‘e aore ra i te pohe”

Ua imi au i roto i Te Pare Tiairaa, oia atoa te A ara mai na! * (na roto i te reo Farani) i te aamu o te mau taata hoê â tupuraa e to ’u, ua tia râ ia ratou ia taui. Ua faaitoito to ratou mau hi‘oraa ia ’u ia tutava noa, ia ore e taora i te tauera. Ua tamau vau i te pure ia Iehova eiaha ia faarue ia ’u. Ua bapetizohia mâua Tony ei Ite no Iehova i Tiurai 1982.

TO ’U FAUFAARAAHIA

Ua pohe paha vau ahani aita to ’u auhoaraa e te Atua ra o Iehova. Ua ite atoa mâua Tony i to ’na rima i roto i te fifi. Ua haapii atoa i te tiaturi noa i te Atua i tera mau taime e ua ite roa i ta ’na tauturu e aupuru tamau i to matou utuafare.—Salamo 55:22.

Oaoa roa vau i te tautururaa i ta mâua tamaiti e tamahine ia haapii atoa o vai o Iehova mai ia ’u. Mai tera atoa to ’u huru ia ite au ia raua ia na reira atoa i nia i ta ’u mau mootua.

Eita vau e ara faahou i te po no to ’u riaria i te tupu a muri a‘e aore ra i te pohe. Te haa rahi nei mâua Tony ma te haere i tera e tera amuiraa a te mau Ite no Iehova i te mau hebedoma atoa no te faaitoito atu. E apiti atoa mâua na muri ia ratou no te haapii ia vetahi ê ia faatupu i te faaroo ia Iesu ia nehenehe atoa ratou e fana‘o i te ora mure ore.

^ par. 17 Piahia e te mau Ite no Iehova.

No te ite atu â

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?