TUMU PARAU MATAMUA | IA POHE TE TAATA: E ORA FAAHOU ANEI?
E nehenehe anei e farerei faahou tei pohe?
E tia faahou anei te feia pohe?
TE PAHONORAA A TE BIBILIA: “Te fatata mai nei hoi te hora e faaroo ai te feia atoa i roto i te apoo ra i tana reo [to Iesu], e e haere mai i rapae.”—Ioane 5:28, 29.
Ua fafau Iesu ia tae te hoê mahana, raro aˈe te faatereraa a to ˈna Basileia, eita te hoê e toe i roto ia Hade. Te na ô ra Fernando, faahitihia i to na mua ˈtu tumu parau: “Ua maere roa vau i te taime matamua a taio ai i te Ioane 5:28, 29. Ua fanaˈo vau hoê tiaturiraa papu e ua taa ˈtura te vai ra te tahi oraraa maitai a muri aˈe.”
I tahito ra, ua tiaturi te taata taiva ore Ioba e faahoˈi mai te Atua ia ˈna i te ora. Ua ani oia: “Ia pohe te taata nei, e ora faahou anei?” I muri iho, ua pahono Ioba ma te papu: “E tiai au i to ˈu pue mahana i haapaohia ra [i roto ia Hade] e ia hope, e ia tae i te taime e faahoˈihia ˈi au ra. Na oe e tiaoro mai, e na ˈu e parau atu ia oe.”—Ioba 14:14, 15.
Te faaite mai ra te tia-faahou-raa o Lazaro i te tupu a muri aˈe
E ere te tia-faahou-raa i te parau apî no Mareta, te tuahine o Lazaro. I muri aˈe hoi te poheraa o to ˈna taeae, ua parau Iesu ia Mareta: ‘E tia faahou mai to tuaane.’ Ua pahono atu o ˈna: “Ua ite au e, e tia faahou mai â oia ia tae i te tia-faahou-raa i te mahana hopea ra.” Teie ta Iesu i parau ia ˈna: ‘O vau te tia-faahou-raa e te ora, o te faaroo mai ia ˈu ra, pohe noâ oia e ora â ïa.’ (Ioane 11:23-25) I muri iho, ua faatia mai Iesu ia Lazaro i te ora! Ua riro tera aamu faahiahia ei faaiteraa i te mau ohipa rahi e tupu a muri aˈe. A feruri na ia faatiahia mai te taata na te ao taatoa!
E faatiahia anei vetahi no te ora i te raˈi?
TE PAHONORAA A TE BIBILIA: Te faaite ra te Parau a te Atua mea taa ê te tia-faahou-raa o Iesu i na vau tei faaitehia i roto i te Bibilia. No tera na vau taata, ua faahoˈihia mai ratou i te ora i nia i te fenua. Area no te tia-faahou-raa o Iesu, te taio ra tatou: “O Iesu Mesia ra: o tei reva aˈenei i nia i te raˈi, e tei te rima atau o te Atua.” (Petero 1, 3:21, 22) O Iesu anaˈe anei te faatiahia no te ora i te raˈi? Ua parau Iesu na mua ˈtu i ta ˈna mau aposetolo: “Ua oti anaˈe i te faaauhia e au te hoê vahi no outou ra, e hoˈi mai au e aratai ia outou i o ˈu ra; ei reira atoa outou i te vahi e parahihia e au ra.”—Ioane 14:3.
Ua haere te Mesia i nia i te raˈi e ua faaineine i te mau mea atoa no te farii vetahi o ta ˈna mau pǐpǐ. E 144 000 te faatiahia no te ora i te raˈi. (Apokalupo 14:1, 3) Eaha râ ta teie mau hoa piri o Iesu e rave i reira?
Mea rahi roa te ohipa ta ratou e rave! Te na ô ra te mau Papai: “E ao to ˈna, e te moˈa, to te noaa ia ˈna te tia-faahou-raa matamua ra; e ore roa te piti o te pohe e tiaia noa mai i te reira: e riro râ ratou ei tahuˈa na te Atua e na te Mesia, e e hau to ratou ia ˈna ra e ia hoê tausani i te matahiti.” (Apokalupo 20:6) E riro ïa te feia e faatiahia i te raˈi ei arii e ei tahuˈa i nia i te fenua taatoa e te Mesia.
O vai te faatiahia mai i muri aˈe?
TE PAHONORAA A TE BIBILIA: Teie te mau parau a te aposetolo Paulo i roto i te mau Papai faaurua: “E tiaturi nei au i te Atua, o ta ratou atoa hoi ïa e tiai nei, e e tia-faahou-raa to tei pohe, te feia parau-tia e te feia parau-tia ore.”—Ohipa 24:15.
Te haapapu mai ra te Bibilia e miria te faatiahia mai
O vai tei roto i te pǔpǔ ta Paulo i pii “te feia parau-tia”? Ua parauhia i te taata taiva ore Daniela ia taoto i roto i te pohe, e tia mai râ o ˈna i te hopea o te mau mahana no te fanaˈo i te mau haamaitairaa o te mau ohipa ta ˈna i rave. (Daniela 12:13) Ihea Daniela e faatiahia ˈi mai te pohe mai? “E parahi te feia parau-tia i nia i te fenua, e parahi tamau â ratou i reira.” (Salamo 37:29) Ua fafau Iesu: “E ao to tei mǎrû; e riro hoi ia ratou te fenua.” (Mataio 5:5) E faatiahia ïa Daniela e te tahi atu mau taata taiva ore, tane e vahine, i nia i te fenua no te ora e a muri noa ˈtu.
O vai tei roto i te pǔpǔ ta Paulo i pii “te feia parau-tia ore”? O te mau miria taata tei pohe, te rahiraa ma te ore i haapii e haapao i te pue parau mau Bibilia. I muri aˈe i to ratou tia-faahou-raa, e nehenehe tera mau taata e haapii e e here ia Iehova * e ia Iesu. (Ioane 17:3) I te mea e Atua mure ore o Iehova, e nehenehe te feia atoa e maiti i te tavini i te Atua e fanaˈo i te tiaturiraa e ora e a muri noa ˈtu.
E fanaˈo te feia atoa e maiti i te tavini i te Atua i te tiaturiraa e ora e a muri noa ˈtu ma te oaoa e te ea maitai roa
Mai te aha te oraraa i nia i te fenua i tera taime?
TE PAHONORAA A TE BIBILIA: “Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa.” (Apokalupo 21:4) “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira.”—Isaia 65:21.
A feruri na e ora mai tera e te feia herehia e oe o te faatiahia mai! Tera râ, e nafea ia papu e tupu iho â te tia-faahou-raa?
^ O Iehova te iˈoa o te Atua i roto i te Bibilia.
