Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TETEPA 2015

 AAMU

Mea rahi ta Iehova i horoa mai noa ’tu to ’u huru

Mea rahi ta Iehova i horoa mai noa ’tu to ’u huru

I te 17raa o to ’u matahiti, hoê â mana‘o e hinaaro to ’u e to te rahiraa o te mau taurearea. Mea au na ’u e amuimui e te mau hoa, e haere e hopu i te miti e te tueraa popo. Ua taui roa râ to ’u oraraa i te hoê po. Ua tupu te tahi ati purumu riaria mau a tere ai vau na nia i to ’u faurao e piti huira. I muri a‘e i te reira, e tino paruparu to ’u mai te a‘î tae roa i te avae. Ua tupu te reira a 30 matahiti a‘enei e mea maoro vau i te vai-noa-raa i nia i te ro‘i.

Ua paari au i te oire no Alicante i te pae miti Hitia o te râ o Paniora. E tupu noa te peapea i te fare, e pinepine au i te itehia i roto i te mau aroâ. E vahi tataîraa huira pereoo to pihai iho i to matou fare. Ua riro atura mâua José María, hoê o te feia rave ohipa, ei hoa rahi. E taata mǎrû mau oia o tei tâu‘a ia ’u, e ere hoi mai tera i te fare. I roto i te fifi, ua riro oia ei taeae e ei hoa papu, noa ’tu e 20 matahiti hau to ’na i to ’u.

Ua haamata José María i te haapii i te Bibilia e te mau Ite no Iehova. Ua ite mau vau mea au roa na ’na te mau Papai, e pinepine oia i te faaite mai i te pue parau mau Bibilia. Ua faaroo vau ia ’na ma te faatura, aita râ i haapao mau i ta ’na i parau. No to ’u apî, vahi ê roa to ’u feruriraa. Ua taui roa râ i muri a‘e.

HOÊ ATI TEI TAUI ROA TO ’U ORARAA

Eita vau e au ia faatia i tera ati purumu. Ta ’u râ e nehenehe e parau, mea maamaa roa e te feruri ore ta ’u i rave. Hoê noa mahana, ua taui roa to ’u oraraa. Na mua ’‘e, e tino oraora maitai e teie nei, eita e nehenehe e hauti faahou e e tarava noa i nia i te hoê ro‘i i te fare ma‘i. E ere i te mea ohie no ’u ia farii i tera tupuraa. Ua uiui noa vau, ‘Eaha te faufaaraa ia ora?’

Ua haere mai José María e hi‘o ia ’u e ua ani oioi i te mau Ite no Iehova o te amuiraa o tera vahi ia haere mai e farerei ia ’u i te fare ma‘i. Ua putapû roa vau i to ratou haere-tamau-raa mai. I to ’u faarueraa i te piha no te feia ma‘i tupuraa atâta, ua haamata vau i te haapii i te Bibilia. Ua ite au no te aha te taata e mauiui e e pohe ai e no te aha te Atua e vaiiho noa ’i ia tupu te ino. Ua haapii atoa vau i ta te Atua e fafau ra no a muri a‘e ia î roa te fenua taatoa i te feia tia roa e eita te hoê e parau: “Ua paruparu vau i te ma‘i.” (Isaia 33:24) I tera taime, ua noaa ia ’u te hoê tiaturiraa faahiahia mau.

I to ’u faarueraa i te fare ma‘i, ua haere oioi au i mua i roto i ta ’u haapiiraa Bibilia. Maoti te hoê parahiraa turairai taa ê, ua haere atoa vau i te tahi mau putuputuraa a te mau Ite no Iehova e ua apiti i te ohipa pororaa. I te 5 no Novema 1988, ua bapetizohia vau i roto i te pape i te hoê vahi hopuraa pape taa ê i te 20raa o to ’u matahiti. Ua tauturu te Atua ra o Iehova ia ’u ia faaite i te huru feruriraa maitai. E nafea râ vau ia haamauruuru ia ’na?

 MEA ITOITO NOA ’TU TE FIFI

Ua faaoti papu vau eiaha ia vaiiho i to ’u tupuraa ia tapea mai ia rave i te nehenehe i roto i te taviniraa a Iehova. Ua hinaaro vau e tavini atu â i te Atua. (Timoteo 1, 4:15) E ere i te mea ohie i te haamataraa, ua patoi mai hoi to ’u utuafare no te mea ua taui au i ta ’u haapaoraa. Te vai ra râ to ’u mau hoa Kerisetiano o tei riro ei taeae e tuahine i roto i te faaroo. Ua tauturu ratou ia ’u ia tae i te mau putuputuraa atoa e ia poro noa.

I muri a‘e, ua titauhia ia fana‘o vau i te tauturu taa ê i te mau mahana atoa. Ua maimi noa vau te tahi pu tano maitai no te huma e ua itehia mai hoê i te oire no Valence i 160 kilometera i te pae apatoerau no Alicante. I reira vau e noho ai tae roa mai teie nei.

Noa ’tu tei nia noa vau i te ro‘i, ua faaoti papu vau i te poro ia vetahi ê

Noa ’tu tei nia noa vau i te ro‘i, ua faaoti au e tamau noa i te tavini ia Iehova. Maoti ta ’u moni tauturu e te tahi atu mau faanahoraa a te hau, ua fana‘o vau hoê matini roro uira o tei tamauhia i pihai iho i to ’u ro‘i. Ua hoo atoa mai au hoê niuniu afaifai. I te mau poipoi atoa, e tuama te tahi tuati ma‘i i ta ’u matini e ta ’u niuniu afaifai. Maoti to ’u taa, e faaohipa vau te tahi atu tao‘a no te faatere i te matini roro uira. Te vai ra atoa hoê raau taa ê ta ’u e tuu i roto i to ’u vaha no te patapata i nia i te mau reta e te mau numera o te niuniu afaifai.

Maoti hoê raau taa ê, e nehenehe au e patapata i te mau numera i nia i te niuniu afaifai

Ua tauturu mau tera ravea apî ia ’u! Na mua roa, e nehenehe au e haere i nia i te reni jw.org e te VAIRAA BUKA I NIA I TE INTERNET. Auê ravea faahiahia no ’u! E pinepine au i te faataa tau hora i te mau mahana atoa no te haapii e no te rave i te mau maimiraa i roto i te mau papai Bibilia. E tauturu noa mai te reira ia ite atu â no nia i te Atua e to ’na mau huru maitatai. E ia moemoe aore ra ia paruparu rii au, te vai ra iho â te tahi mea i nia i tera reni Internet o te faaitoito mai.

Maoti te matini roro uira, e nehenehe atoa vau e faaroo e e apiti i te mau putuputuraa a te amuiraa. E nehenehe au e pahono, e pure, e rave i te mau tumu parau e e taio atoa i Te Pare Tiairaa mai te peu na ’u tera tuhaa. Noa ’tu eita vau e tae roa ’tu i te mau putuputuraa, e melo taa maitai au i roto i tera amuiraa.

E nehenehe au e poro maitai maoti atoa te niuniu afaifai e te matini roro uira. Parau mau, eita vau e haere i tera e tera fare mai te tahi atu mau Ite no Iehova, aita râ te reira i tapea ia ’u. Ma te faaohipa i tera mau ravea, e nehenehe au e faaite i ta ’u mau tiaturiraa ia vetahi ê. I te mea ua au roa vau e poro na roto i te niuniu afaifai, ua ani mai te matahiapo o te amuiraa ia tiaau i tera hoho‘a taviniraa. Ua tauturu atoa te reira i te mau melo o te amuiraa o te ore e nehenehe e faarue i to ratou fare.

Te faatere ra i te hoê haapiiraa Bibilia

 E ere râ te mau ravea apî ana‘e te mea faahiahia i roto i to ’u oraraa. I te mau mahana atoa, e haere mai to ’u mau hoa here e farerei ia ’u e to ratou mau fetii e te feia i anaanatae i te Bibilia. E pinepine, e ani atoa mai ratou ia aratai i te aparauraa. I te tahi atu taime, e haere mai te mau utuafare e farerei ia ’u e ani atoa ia apiti atu vau i ta ratou haamoriraa utuafare. Ta ’u mea au roa ’‘e, ia faaite te mau tamarii no te aha ratou e here ai ia Iehova a parahi noa ’i i pihai iho i to ’u ro‘i.

Arui haamoriraa utuafare oaoa mau e te mau hoa

Auê au i te oaoa ia haere mai e rave rahi e farerei ia ’u. E pinepine, e î roa to ’u piha i to ’u mau hoa tei haere mai mai te vahi piri e te atea atoa râ. Ua maere roa iho â ïa te mau tuati ma‘i o te pu mea here-mau-hia vau. I te mau mahana atoa, te haamauruuru nei au ia Iehova i te fariiraa ia ’u i roto i teie fetii taeae faahiahia mau.

TE FAAITOITO NOA RA

Ia aroha mai te taata ia ’u e ia ani mai eaha to ’u huru, e parau noa vau: “Te faaitoito noa ra!” Ua ite au e ere vau ana‘e i roto i tera tupuraa. Noa ’tu eaha to tatou fifi aore ra ma‘i, te apiti ra te mau Kerisetiano atoa i te tahi aroraa, ‘te rohiraa maitai i te faaroo.’ (Timoteo 1, 6:12) Eaha tei tauturu mai ia faaitoito i tera rahiraa matahiti? Ua pure au i te mau mahana atoa e ua haamauruuru ia Iehova i te horoaraa mai i te tiaturiraa. E tutava atoa vau i te ohipa rahi i roto i te taviniraa i te Atua ma te haamana‘o i te oraraa e tiai mai ra.

José María

E pinepine au i te feruri i te ao apî e to ’u huru ia horo e ia ou‘ou‘a faahou vau. I te tahi taime, e hauti au i to ’u hoa rahi José María, tei roohia i te ma‘i polio, ma te parau ia tae ana‘e tera mahana, e faatupu mâua hoê hororaa atea. E ani au ia ’na: “O vai te upootia?” E pahono mai oia: “Te mea faufaa, e ere o vai te upootia, ia tapae râ tâua i roto i te paradaiso no te rave i tena hororaa.”

E ere i te mea ohie no ’u ia farii i to ’u tupuraa. Ua ite au, e ohipa maamaa mau ta ’u i rave i to ’u taurearearaa e e ati rahi tei noaa mai. Te haamauruuru nei au ia Iehova, aita roa oia i faarue ia ’u. Mea rahi ta ’na i horoa mai, te fetii taeae, te puai no te faaoromai, te oaoa i te tauturu ia vetahi ê e hoê tiaturiraa faahiahia no a muri a‘e. Ahiri e tia ia ’u ia haapoto i to ’u mana‘o, e parau noa vau, mea rahi ta Iehova i horoa mai noa ’tu to ’u huru.

No te ite atu â

Eaha te opuaraa a te Atua no te fenua?

Te faataa ra te Bibilia no te aha te Atua i poiete ai i te fenua, afea te mauiui e ore ai, eaha te a muri a‘e o te fenua, e o vai te ora i reira.

Eaha te tupu i nia i te mau haapaoraa?

E tahoê anei te taata i te hoê mahana no te haamori i te Atua mau hoê roa?

E ore roa anei te mauiui?

Ia au i te Bibilia, mea riri na te Atua te ohipa tia ore e te tâu‘a mau ra o ’na i to ’na nunaa. Eaha te auraa no oe?