Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TIURAI 2015

 AAMU

Te faufaa i tutuuhia i na hitu u‘i

Te faufaa i tutuuhia i na hitu u‘i

E parau te taata, ua tia-roa-hia vau i to ’u metua tane: To ’u tino, to ’u mata e ta ’u huru ataraa. E faufaa ê râ ta ’na i tutuu atoa mai e ua faahiahia na u‘i e hitu o to ’u fetii i te reira. Vaiiho mai na ia ’u ia faataa ’tu.

Te faatia mai ra papa i te faufaa a to matou fetii

I te 20 no Tenuare 1815, ua fanauhia to ’u tupuna Thomas (1) * Williams i Horncastle, Beretane. E piti matahiti i muri iho, ua pohe to ’na metua vahine e ua paari o ’na, to ’na na taeae e hoê tuahine e to ratou papa, John Williams. Ua haapii John ia Thomas nafea ia riro ei tamuta, e toroa ê râ ta ’na i hinaaro.

Ua tupu te tahi amahamaharaa i te pae faaroo ati a‘e Beretane. Ua faataa ê te orometua John Wesley ia ’na i te Ekalesia no Beretane no te haamau i te Taiete a te mau Méthodiste, hoê pûpû tei haafaufaa i te haapiiraa Bibilia e te ohipa poro evanelia. Ua parare oioi te mau haapiiraa a Wesley e ua farii te utuafare Williams i te reira. Ua riro Thomas ei pǐpǐ na te orometua Wesley e ua hinaaro oioi oia e riro ei mitionare i te pae apatoa no Patitifa. I Tiurai 1840, ua reva o ’na e ta ’na vahine Mary (2) i te motu Lakeba * i Fiti nohohia e te feia amu taata.

UA ORA I ROTOPU I TE FEIA AMU TAATA

I te haamataraa o to raua oraraa i Fiti, ua faaruru Thomas e Mary e rave rahi fifi. Noa ’tu ta raua ravea iti haihai e te veavea, ua ohipa rahi mau na hoa faaipoipo. Ua ite atoa raua i te mau ohipa riaria mau ia faatia, mai te aroraa o tera e tera pǔpǔ taata, te taparahiraa i te mau vahine ivi ma te uumi i to ratou arapoa, te haapoheraa tamarii e te amuraa taata. Taa ê atu i te reira, ua patoi te rahiraa o ratou i ta raua poroi. Ua ma‘ihia Mary e ta raua tamaiti matahiapo John e ua fatata i te pohe. I 1843, ua papai Thomas: “Ua hepohepo roa ino vau. . . . Eita faahou ta ’u e nehenehe e faaoromai.” Noa ’tu râ, ua faaitoito raua Mary maoti te faaroo i te Atua ra o Iehova.

Ua faaohipa Thomas i to ’na aravihi ei tamuta no te hamani i te fare popaa matamua i Fiti. Ua faateitei i te tahua ia haere maitai te mata‘i na raro a‘e e ua faaohipa i te tahi atu mau ravea o tei faatupu i te maere rahi o te feia no Fiti. Na mua ’‘e te fare a oti ai, ua fanau Mary i te piti o ta raua tamaiti o Thomas Whitton (3) Williams. Mea na roto mai ia ’na to ’u fetii.

I 1843, ua apiti Thomas papa i te huriraa i te evanelia a Ioane na roto i te reo o te feia no Fiti, ua ite mau oia e ere i te ohipa ohie. * Ua riro râ o ’na ei aivanaa maitai aravihi i te pae o te hi‘opoaraa. Ua tapao maite oia i ta ’na i ite na roto i ta ’na mau maimiraa i roto i ta ’na buka o tei faatia i te oraraa o te feia no Fiti i te mau matahiti 1900.

 I muri a‘e 13 matahiti tutavaraa i Fiti, ua ma‘i-roa-hia Thomas e ua haere o ’na e to ’na utuafare i Auteralia. Ua tavini maoro oia ei tia faaroo e ua pohe i Ballarat, Victoria i 1891.

E “AURO” I TE PAE TOOA O TE RÂ

I 1883, ua haere Thomas Whitton Williams e ta ’na vahine, Phoebe, (4) e ora i Perth i te pae tooa o te râ o Auteralia. E iva matahiti to te piti o ta raua tamarii, Arthur Bakewell (5) Williams.Mea na roto atoa mai ia ’na to ’u fetii.

E 22 matahiti to Arthur, ua faufaahia o ’na i Kalgoorlie, te tahi oire ruperupe no te imiraa auro. Tei tau 600 kilometera te reira i te pae hitia o te râ o Perth. I ǒ, ua taio oia vetahi papai piahia e te Feia Haapii Bibilia Nunaa rau, piihia i teie nei, Ite no Iehova. Ua faaî atoa i ta ’na parau aniraa ia hapono-noa-hia ’tu te vea Le Phare de la Tour de Sion (Beretane). Ua faahiahia oia i ta ’na i taio e ua haamata Arthur i te faaite haere i ta ’na i ite ia vetahi ê e ua faatupu i te mau putuputuraa no te haapii i te Bibilia. Na roto i te mea iti haihai ta ’na i rave i rahi roa mai ai te ohipa a te mau Ite no Iehova i te pae tooa o te râ o Auteralia.

Ua faaite atoa Arthur i to ’na utuafare i ta ’na i haapii. Ua apiti Arthur e te Feia haapii Bibilia e ua turu atu to ’na papa Thomas Whitton tei pohe i muri iti noa ’‘e i tera faaotiraa. Ua riro atoa mai to ’na metua vahine Phoebe, to ’na na tuahine Violet e Mary ei melo o te Feia haapii Bibilia. Ua riro Violet ei taata poro ma te taime taatoa aore ra pionie. Ua parau Arthur o Violet te “pionie maitai, itoito e haapao maitai roa ’‘e o te pae tooa o te râ o Auteralia.” Ua rahi roa paha ta Arthur, ua riro râ te itoito o Violet ei hi‘oraa maitai no te u‘i i muri a‘e o te fetii Williams.

I muri a‘e, ua faaipoipo Arthur e ua haere e ora i Donnybrook, te tahi oire faaapu i te pae apatoa o te tooa o te râ o Auteralia. No to ’na itoito i te poro i te mau parau tohu Bibilia e tupu i 1914, * i piihia na o ’na i ǒ, “Ruau maamaa no 1914!” Ua faaea râ te mau faaoooraa a tupu ai te Tama‘i rahi matamua. I poro noa na Arthur i te taata i roto i ta ’na fare toa. Ua faaiteite atoa o ’na i te mau papai Kerisetiano na roto atu i te maramarama o te fare toa ia ite maitai te taata i te reira. I nia atoa, ua pia i te tahi parau e horoa oia 100 moni Auteralia (150 tara Marite i teie nei) i te taata e nehenehe e haapapu i te haapiiraa o te Toru tahi, te tahi tiaturiraa niu-ore-hia i nia i te Bibilia ta Arthur i patoi papu. Aita hoê a‘e i fana‘o a‘enei i tera tino moni!

Ua riro te fare o te utuafare Williams ei vahi faufaa no te pǔpǔ taata haapii Bibilia, oia atoa no te mau putuputuraa a te amuiraa i Donnybrook. I muri a‘e, ua hamani Arthur hoê Piha a te Basileia aore ra vahi putuputuraa i roto i te oire, tera ïa te matamua i te pae tooa o te râ o Auteralia. Noa ’tu 70 matahiti to ’na, e oomo oia i to ’na ahu faanehenehe e to ’na taamu arapoa, e faaineine i ta ’na puaahorofenua  ruau piihia Doll e ua haere e poro i te vahi atea na te mataeinaa rahi Donnybrook.

Ua putapû mau te aau o te mau tamarii a Arthur i te hi‘oraa o to ratou papa o tei riro ei taata hau e te haerea tura e te itoito atoa. Ua tavini ta ’na tamahine Florence (6) ei mitionare i Initia. Mai to ratou papa, ua amo maoro ta ’na na tamaiti, Arthur Lindsay (7) e Thomas i te hopoia matahiapo i roto i te amuiraa.

TE APARA MONAMONA A TE VAHINE WILLIAMS

Ua matau e rave rahi i te metua tane o to ’u papa ruau Arthur Lindsay Williams e mea herehia o ’na no to ’na maitai. E faataa noa iho â oia i te taime no vetahi ê e mea faatura ia ratou. E aito tâpû raau atoa oia, 18 taime te re i te noaaraa ia ’na i te hoê maororaa 12 matahiti.

Aita ïa Arthur i maere a rave ai ta ’na tamaiti e piti matahiti Ronald (8) (to ’u papa ruau) i te to‘i no te tâpû i te tahi tumu raau apara pihai iho i to ratou fare. Ua haaati maitai te mama o Ronald i te tumu raau i te tahi ahu e ua horoa mai te reira i te apara monamona mau. Parauhia tera hoho‘a apara apî, te apara a te vahine Williams (Lady Williams apple). Muri mai, ua faatupuhia na roto i te reira te tahi atu hoho‘a apara tuiroo roa ’‘e i te ao nei parauhia, te apara roti a Cripps (Cripps Pink apple).

I muri a‘e, ua tapi to ’u papa ruau Ronald, aore ra ta ’u i pii na Gramp, i te tahi atu mau fa maitai a‘e. Ua tavini raua to ’u mama ruau e rave rahi matahiti ei rima tauturu no te mau paturaa a te mau Ite i Auteralia e te motu Solomona. Noa ’tu te piri ra to ’na i te 80 matahiti, te tavini noa ra Gramp ei matahiapo i roto i te amuiraa e te tauturu atoa ra ia patu e ia tataî i te mau Piha a te Basileia i te pae tooa o te râ o Auteralia.

UA HAAFAUFAA I TEI TUTUUHIA MAI

Ma te haafaufaa i tei tutuuhia mai, ua tutava mau to ’u na metua Geoffrey (9) e Janice (10) Williams i te haapii ia mâua to ’u tuahine Katharine (11) ia hinaaro i te mau aratairaa Kerisetiano. I te 13raa o to ’u matahiti, ua faatupu mau vau (12) i te taairaa piri e o Iehova. A haere ai i te tahi tairururaa, ua faaroo vau ia John Barr, te tahi melo o te tino aratai a te mau Ite no Iehova, ia faaitoito i te feia apî ma teie mau parau: “Eiaha ia haafaufaa ore i te fana‘oraa rahi roa ’‘e e vai ra ia outou, te iteraa o vai Iehova e te hereraa ia ’na.” I tera po, ua pûpû vau ia ’u ia Iehova. E piti matahiti i muri a‘e, ua haamata vau i te taviniraa pionie.

I teie mahana, te oaoa nei au i te poro ma te taime taatoa e ta ’u vahine Chloe i Tom Price, te tahi oire atea i te pae apatoerau o te tooa o te râ o Auteralia e rave-atoa-hia ra te imiraa auro. E ohipa afa mahana ta mâua. E pionie to ’u na metua e to ’u tuahine Katharine e ta ’na tane, Andrew i Port Hedland. E oire tera tei tau 420 kilometera te atea mai ǒ nei ma te haere tia ’tu i apatoerau. E matahiapo papa e vau atoa i roto i te amuiraa.

E hitu u‘i na mua ’tu, ua faaoti papu to ’u tupuna Thomas Williams i te tavini i te Atua ra o Iehova. Ua tutuuhia mai ia ’u tera faufaa o te faaroo e te taviniraa i te Atua. Ua haamaitai-mau-hia vau i te fana‘o i tera faufaa tao‘a rahi.

^ par. 5 A hi‘o i te numera i nia i te hoho‘a i muri mai.

^ par. 6 I piihia na na mua ’‘e Lakemba. E motu tera i te pae hitia o te râ o te mau motu Lau.

^ par. 10 Na te mitionare John Hunt i huri i te rahiraa o te mau tuhaa o te Faufaa apî na roto i te reo Fiti i piahia i 1847. E huriraa maitai no te mea ua faahitihia te i‘oa o te Atua, “Jiova,” i roto i te Mareko 12:36, Luka 20:42 e Ohipa 2:34.

^ par. 16 A hi‘o i te tuhaa hau “1914—te hoê matahiti faufaa i roto i te parau tohu bibilia” i roto i te buka Eaha ta te Bibilia e haapii mau ra?, piahia e te mau Ite no Iehova e te vai atoa ra i nia www.jw.org/ty.

No te ite atu â

Eaha te maitai o te mau ture a te Atua?

Ua faataa Iesu no te aha e hinaarohia ’i te aratairaa e eaha na faaueraa Bibilia faufaa roa.

A pee i to ratou faaroo

E nafea tatou e faufaahia ’i i te haapiiraa no nia i te mau tane e vahine haapao maitai i roto i te Bibilia?