Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TIURAI 2015

 TUMU PARAU MATAMUA

Ua fatata anei te hopea?

Ua fatata anei te hopea?

E vaiiho noa anei te Atua i te taata ia faatere e ia haafifi i te oraraa o te huitaata? Eita roa ’tu. Mai ta tatou i ite, e faaore oia i te ati e te hepohepo i itehia e rave rahi hanere matahiti i teie nei. Te hinaaro ra te Atua, tei poiete i te taata e te fenua, ia ite oe ua fatata te taime ta ’na i faaoti no te ohipa mai. E nafea o ’na ia faaite mai i te reira?

A feruri na: Hou oe a tere ai i te vahi atea na nia i te pereoo, e hi‘o paha oe i te mau haamaramaramaraa i nia i te Internet, te mau hoho‘a fenua e te tahi mau aratairaa. A ite ai i te tahi mau tapao purumu e tuati ra i te reira, e papu ia oe fatata oe i te tapae i te vahi hinaarohia. Ua horoa atoa te Atua i ta ’na Parau no te faaite eaha te mau tupuraa faufaa e itehia na te ao nei ia papu ia tatou tei te tau hopea tatou.

Te faataa ra te Bibilia e ite to te ao taatoa i te tahi tau taa ê o te aratai i te hopea. Na te ao nei, e itehia te tahi mau ohipa e tupuraa tei ore i farereihia a‘enei e te taata. Maoti te Parau a te Atua, e hi‘o ana‘e vetahi.

1. UA INO ROA TE TUPURAA NA TE AO NEI: Te faaite ra te tahi parau tohu o te Mataio pene 24 hoê tapao tuhaa rau e faataa ra i te mau ohipa e tupu i nia i te fenua. E haapapu te reira ua tae tatou i te anotau o te aratai i te hopea. (Irava 3, 14) Eaha ïa te itehia? Te mau tama‘i rahi, te o‘e, te aueueraa fenua i tera e tera vahi, te ino rahi, te aroha ore e te mau ohipa a te mau aratai haapaoraa no te haavare i te taata. (Irava 6-26) E na ô paha vetahi: “E ere no teie nei tena mau mea.” Tera râ, a piri mai ai te hopea, e itehia tera mau ohipa e tupuraa i te hoê â tau arepurepu. Teie e toru atu â tuhaa o te tapao o te anotau hopea.

2. UA INO ROA TE HURU O TE TAATA: Te parau ra te Bibilia e ino roa ’tu â te huru o te taata i “te anotau hopea.” Te taio nei tatou: “E riro te taata nei ei miimii, e nounou moni, e faaahaaha, e teoteo, e faaino, e faaroo ore i te metua, e mauruuru ore, e te viivii, e aroha ore, e tahemo parau au, e pari haavare noa, e haapao ore, e iria, e te au ore i te taata maitatai ra, e haavare, e mârô, e faateitei, e te hinaaro i te mau mea e navenave ai ra aore hinaaro i te Atua.” (Timoteo 2, 3:1-4) No vetahi, e ere teie huru faatura ore no teie nei. Tera râ, i te “anotau hopea,” e ino roa ’tu â te huru o te taata. Mea tano mau ia parau ua tae tatou i te ‘anotau ati rahi.’ Te ite ra anei oe i te reira?

3. UA TUINOHIA TE FENUA: Te faaite ra te Bibilia e haamou te Atua i te feia e tuino i te fenua. (Apokalupo 11:18) Eaha hoi ta ratou i rave? Teie tei parauhia no tei tupu i te tau o Noa: “Ua ino roa ra te fenua i mua i te aro o te Atua, ua î te fenua i te parau-tia ore. Ua hi‘o ihora hoi te Atua i te fenua nei, e inaha, ua ino roa.” Ua na ô te Atua no tera mau taata iino: “E haamou [vau] ia ratou.” (Genese 6:11-13) Ua tapao anei oe te rahi noa ’tura te ino i nia i te fenua? Hau atu â, e nehenehe te fenua e te taata atoa e mou roa no te mau mauhaa tama‘i. Taa ê atu i te reira, ua ino roa te fenua, te mata‘i ta tatou e huti ra, te animara, te ururaau e te moana no te faanahoraa tano ore a te taata.

 A uiui na, ‘Hau atu hoê hanere matahiti i teie nei, e ravea anei ta te taata no te haamou ia ratou iho?’ I teie râ mahana, te vai nei te mauhaa apî no te tama‘i e no te tuino i te heipuni. No te rahi o te mau ravea apî i teie tau, aita ’tura te taata e taa faahou eaha te rave ia ore te fenua ia ino atu â. Auaa râ, e ere na te taata e faaoti. E haamou hoi te Atua i te feia e tuino i te fenua. Tera ta ’na i fafau!

4. TE OHIPA PORORAA NA TE AO NEI: Te faaite ra te tahi atu tuhaa o te tapao e ohipa taa ê te ravehia i te anotau hopea: “E parau-haere-hia te evanelia o te basileia nei e ati noa ’‘e teie nei ao, ia ite te mau fenua atoa: o te hopea ihora ïa i reira.” (Mataio 24:14) Mea taa ê teie pororaa i ta te tahi atu mau haapaoraa i rave i te roaraa o te mau senekele. I te anotau hopea, o te poroi taa ê o te parau apî oaoa o te Basileia te faaitehia. Ua ite anei oe o vai te pǔpǔ faaroo e poro ra i te reira? E mai te peu te na reira ra te tahi pǔpǔ i to oe fenua, te faaite atoa ra anei ratou tera poroi “ati noa ’‘e teie nei ao, ia ite te mau fenua atoa”?

Te porohia ra te Basileia o te Atua na te ao nei na roto hau atu hanere reo

Te haafaufaa ra te reni Internet www.jw.org i te parau apî oaoa o te Basileia. Te faaite ra te mau papai i nia i tera reni i teie poroi na roto hau atu 700 reo. Ua ite anei oe i te tahi atu ohipa i ravehia no te haaparare i te parau apî oaoa o te Basileia na te ao atoa nei? Na mua ’‘e i te Internet, ua matau-a‘ena-hia te mau Ite no Iehova no to ratou itoito i te faaite i te parau apî oaoa o te Basileia o te Atua. Mai 1939, i te api matamua o te vea Te Pare Tiairaa te vai ra teie parau: “E faaite ra i te Basileia o Iehova.” Ua faataa hoê buka no nia i te haapaoraa i te faahiahia o te ohipa pororaa a te mau Ite no Iehova. E haapapuraa te reira ua fatata roa te taime e faatupu ai te Basileia o te Atua i te hopea.

HOÊ ANOTAU TAA Ê NO TE TAATA

Ua feruri anei oe te itehia ra teie na tupuraa e maha i teie tau? Hau atu i te hanere matahiti i teie nei to teie vea faataaraa i te mau ohipa e tupu ra na te ao nei no te tauturu i te taata ia taa te piri mai ra te hopea. Te vai ra  iho â te feaa noa ra ma te mana‘o mea hape te mau parau e faaiteraa i haapararehia. No ratou, i te mea ua rahi te mau ravea haapurororaa parau i teie mahana, e tiaturi iho â te taata ua ino roa te tupuraa na te ao nei. E rave rahi râ taata tei farii i te mau haapapuraa e te ora nei tatou i te hopea o te hoê tau taa ê mau no te taata.

Te faaite ra te mau haapapuraa ua fatata roa te taime e itehia te mau tauiraa rahi i nia i te fenua. I 2014, teie ta te tahi mau aivanaa i faaite no nia i te mau tupuraa atâta rahi no te huitaata: “Ma te hi‘opoa maite i tera mau tupuraa, e nehenehe noâ te tahi ati e tupu na roto i te mau ravea apî e haafifi i te ananahi o te huitaata.” E rave rahi tei papu roa ’tu â te ora nei tatou i te hoê anotau taa ê. Te tiaturi nei te feia i pia i teie vea e te mau taata taio ua fatata te hopea. Eiaha râ e mǎta‘u, e oaoa te itehia i muri a‘e. No te aha? E nehenehe hoi oe e ora ’tu!