Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2015

Ua ite anei oe?

Ua ite anei oe?

Eaha te hopoia a te raatira faehau no Roma?

Hoho‘a o te raatira faehau Marcus Favonius Facilis

I roto i te mau Papai Heleni Kerisetiano, ua faahitihia te parau o te mau raatira faehau no Roma e rave rahi taime. Te vai ra te raatira i tiaau i te haapoheraa o Iesu, oia atoa te taata nunaa ê matamua tei riro mai ei Kerisetiano o Korenelio te i‘oa. E raatira faehau te taata i haapao ia huihia te aposetolo Paulo, na reira atoa Iulio, tei afai ia ’na i Roma.—Mareko 15:39; Ohipa 10:1; 22:25; 27:1.

E faatere te raatira faehau 50 e tae atu 100 faehau. Na ’na e faaineine e e a‘o ia ratou a hi‘opoa atoa ’i i te ahu e te mau mauhaa a te mau faehau. Na ’na atoa e tiaau atu ia haere ratou i te aroraa.

Tera te tiaraa teitei roa ’‘e i roto i te nuu faehau. E maitihia tei rave maoro i tera toroa e tei riro ei aratai maitai. Na ratou hoi e ara ia riro to Roma ei nuu nahonaho e te puai. Ia au i te tahi papai, “e pinepine, e mau taata aravihi e haapao maitai” te riro ei raatira faehau.

No te aha mea taa ê te hi‘o i tahito ra i to teie tau?

Hi‘o tahito no Aiphiti

Mea taa ê roa te mau hi‘o o teie mahana i to te tau tahito. Na mua ’‘e, i faaohipahia na te mau metara mai te veo, peneia‘e atoa te veo anoihia i te tahi atu metara, te ario, te auro aore ra te hesemala parauhia électrum. I roto i te Bibilia, ua haamata te hi‘o i te faahitihia i te hamaniraa o te sekene, te vahi haamoriraa matamua a to Iseraela. Ua horoa te mau vahine i ta ratou mau hi‘o no te hamani i te tahi farii pape veo mo‘a e to ’na tapearaa. (Exodo 38:8) Te mana‘ohia ra, hou a rave ai i te reira, ua faatahehia tera mau hi‘o.

Ua itehia mai te tahi mau hi‘o i roto i te mau apoo hi‘opoaraa a te feia ihipǎpǎ i Iseraela e ati a‘e tera vahi. E pinepine tera mau hi‘o i te itehia e te mau tao‘a faaunauna e te tahi atu faaneheneheraa no te vahine. Mea menemene tera mau hi‘o e e tapearaa raau, metara aore ra ivori faanehenehehia to te reira. E pinepine, e taraihia te hoho‘a o te tino o te tahi vahine no te hamani i te tapearaa. Aita e faaneheneheraa to te pae i ore i haamaninahia.

Aita te hoho‘a i ite-maitai-hia na i roto i te mau hi‘o i tahito ra, e ere roa ’tu hoi mai to teie tau. Te taa ra ïa ia tatou no te aha te aposetolo Paulo i parau ai: “Teie nei hoi, te ite arehurehu nei tatou mai te mea e, i na roto i te hi‘o.”—Korinetia 1, 13:12.