Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2015

 TUMU PARAU MATAMUA | E HINAARO ANEI OE E HAAPII I TE BIBILIA?

No te aha e haapii ai i te Bibilia?

No te aha e haapii ai i te Bibilia?
  • No te aha tatou i hamanihia ’i?

  • No te aha te taata e mauiui e e pohe ai?

  • Eaha te tupu a muri a‘e?

  • Te tâu‘a ra anei te Atua ia ’u?

Ua feruri a‘ena anei oe i te mau uiraa mai tera te huru? Mai te peu e e, e ere oe ana‘e. Te uiui atoa ra te mau taata ati a‘e teie nei ao no nia i te mau uiraa faufaa o te oraraa. Te vai ra anei te mau pahonoraa?

E mirioni taata te parau, e, no te mea ua ite ratou i te mau pahonoraa papu i roto i te Bibilia. E hinaaro atoa anei oe e hi‘opoa i te reira? E farii paha ïa oe hoê haapiiraa Bibilia tamoni ore e te mau Ite no Iehova. *

Te vai ra iho â te parau: “Aita to ’u e taime.” “Mea fifi roa ia taa.” “Aita vau e hinaaro ra”. Mea taa ê râ no te tahi atu. E farii hoi ratou i te haapii i te Bibilia. Teie te tahi mau hi‘oraa:

  • “Ua haere au i te fare pureraa Katolika e Porotetani, te hiero a te tahi haapaoraa no Initia, te monahi no te feia e pee ra ia Bouddha e ua haapii atoa vau no nia i te mau haapaoraa i te haapiiraa teitei. Aita râ ta ’u mau uiraa no nia i te Atua i pahonohia. I muri iho, ua farerei au hoê Ite no Iehova. Ua faahiahia vau, ua faaohipa hoi oia i te Parau a te Atua no te pahono mai e ua farii au i te haapii i te Bibilia.”—Gill no Beretane.

  • “E rave rahi mau uiraa ta ’u no nia i te oraraa, aita râ vau i mauruuru i te mau pahonoraa a to matou orometua. Area te tahi Ite no Iehova, ua faaohipa noa ïa i te Bibilia no te pahono mai. I to ’na aniraa mai e hinaaro anei au e ite atu â, ua farii au ma te oaoa.”—Koffi no Bénin.

  • “Ua hinaaro vau e ite eaha te tupu ia pohe te taata. I tiaturi na vau e nehenehe tei pohe e hamani ino i te feia e ora nei. Ua hinaaro râ vau e ite eaha ta te Bibilia e parau ra. Ua haamata ïa vau i te haapii e te tahi hoa Ite no Iehova.”—José no Beresilia.

  • “Ua taio vau i te Bibilia, aita râ i taa noa ’‘e. I muri iho, ua haere mai te tahi mau Ite no Iehova i to ’u fare no te faataa maitai mai e rave rahi parau tohu Bibilia. Ua hinaaro vau e ite eaha ta ’u e nehenehe e haapii atu â.”—Dennize no Mehiko.

  • “Ua hinaaro vau e ite te tâu‘a mau ra anei te Atua ia ’u e ua pure ïa ia ’Na. I te mahana i muri iho, ua patoto mai te tahi mau Ite no Iehova i te opani e ua farii au i te tahi haapiiraa Bibilia.”—Anju no Népal.

Te haamana‘o mai ra tera mau parau i ta Iesu i faahiti a na ô ai: “Ia ite ratou ia oe i te Atua mau ra.” (Ioane 17:3) Te vai ra tera hinaaro i roto i te taata atoa. O te Atua ana‘e te nehenehe e haamâha i te reira e ta ’na ïa e rave ra maoti ta ’na Parau, te Bibilia.

Teie nei, eaha te ravehia i te tahi haapiiraa Bibilia? E nafea oe ia faufaahia? E pahonohia tera na uiraa i te tumu parau i muri nei.

^ par. 8 O Iehova te i‘oa o te Atua i roto i te Bibilia.