Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Me 2015

 APARAURAA E TE HOÊ ITE NO IEHOVA

No te aha e haamana‘o ai i te poheraa o Iesu?

No te aha e haamana‘o ai i te poheraa o Iesu?

Teie te tahi hoho‘a aparauraa e te hoê Ite no Iehova. A feruri na e Ite no Iehova Megan e te farerei ra o ’na ia Shirley i to ’na fare.

“E NA REIRA OUTOU EI MANA‘ORAA IA ’U”

Megan: Iaorana Shirley. Ua oaoa roa vau i te ite ia oe i te Oroa haamana‘oraa o te poheraa o te Mesia i te hebedoma i mairi. * Eaha to oe mana‘o i tera putuputuraa?

Shirley: Mea au roa, aita râ vau i taa i te mau mea atoa i parauhia. Hau atu â, i ǒ nei, mea haafaufaa a‘e te taata i te mahana fanauraa o Iesu i te Noela e to ’na tia-faahou-raa i te Pakate.

Megan: Oia mau. No te mau Ite no Iehova râ, o te haamana‘oraa i te poheraa o Iesu te mea faufaa a‘e. Mai te peu e taime to oe, oaoa roa vau i te faataa ’tu no te aha mea faufaa ia faatupu i tera oroa.

Shirley: E, e taime rii to ’u.

Megan: E faatupu te mau Ite no Iehova i te Oroa haamana‘oraa o te poheraa o Iesu no te mea na ’na i faaue i ta ’na mau pǐpǐ ia na reira. E hi‘o ana‘e eaha tei tupu i te po na mua ’‘e Iesu a pohe ai. Ua faaroo a‘enei oe ua faatupu Iesu i te tahi amuraa maa taa ê e ta ’na mau pǐpǐ taiva ore?

Shirley: E.

Megan: E parauhia te reira, te Amuraa maa a te Fatu. I tera taime, ua horoa Iesu i ta ’na mau pǐpǐ i te tahi mau faaueraa papu. E nehenehe anei oe e taio i ta ’na i parau i roto i te Luka 22:19?

Shirley: Te parauhia ra: “Ua rave ihora oia i te pane, haamaitai atura i te Atua, vavahi ihora, tuu atura ia ratou ra, na ô atura, O tau tino teie e horoahia na outou nei, e na reira outou ei mana‘oraa ia ’u.”

Megan: Mauruuru. Ua tapao anei oe eaha ta Iesu faaueraa i te pae hopea o te irava? Ua na ô oia: “E na reira outou ei mana‘oraa ia ’u.” Na mua noa ’tu, ua faaite maitai Iesu eaha ta ratou e haamana‘o no nia ia ’na. Ua parau hoi oia e pûpû to ’na ora no ta ’na mau pǐpǐ. Tera atoa te mana‘o o Iesu i roto i te Mataio 20:28. Ua papaihia: “Aita atoa hoi te Tamaiti a te taata nei i haere mai ia tavinihia to ’na, ei tavini râ, e ia horoa i to ’na ora ei hoo no te taata e rave rahi.” Tera te tumu matamua roa e faatupu ai te mau Ite no Iehova i te Oroa haamana‘oraa o te poheraa o Iesu hoê taime i te matahiti. Ei mana‘oraa ïa i to ’na tusia taraehara o te faaora i te feia auraro atoa.

NO TE AHA E TITAUHIA HOÊ HOO?

Shirley: Ua faaroo iho â vau ua pohe Iesu no te faaora ia tatou. Faaite atu râ vau ia oe, aita  vau i ite noa ’‘e nafea te reira e nehenehe ai e tupu.

Megan: Mea rahi mai ia oe. E ere i te mea ohie ia faataa i te tusia taraehara o Iesu. Hoê râ tera o te mau pue parau mau faahiahia i roto i te Bibilia. E taime rii to oe teie nei?

Shirley: E!

Megan: Aita ’tu ai. Ua hi‘opoa faahou vau i te tumu parau o te hoo e e tamata vau i te faataa ia oe ma te ohie.

Shirley: Na reira.

Megan: No te taa, e hi‘o ana‘e na mua eaha tei tupu a hara ’i Adamu raua Eva i roto i te ô i Edene. E hi‘opoa tâua i te Roma 6:23. E hinaaro oe e taio?

Shirley: E. Te parauhia ra: “E utua te pohe no te hara, area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.”

Megan: Mauruuru. A hi‘o na i te omuaraa o te irava: “E utua te pohe no te hara.” Mea ohie roa ta te Atua ture no te taata. Ia hara oe, e pohe oe. Parau mau, aita e taata hara i te haamataraa, mea tia roa hoi Adamu e Eva e e fanau atoa ïa raua i te tamarii tia roa. Aita ïa i titauhia ia pohe hoê. E nehenehe Adamu, Eva e to raua huaai e ora e a muri noa ’tu ma te oaoa. Mai ta tâua râ i ite, aita roa ’tu te mau mea i tupu mai tera.

Shirley: E hoi, ua amu Adamu raua Eva i te maa hotu opanihia.

Megan: Tera. I to raua na reiraraa, ua faaoti Adamu e Eva i te faaroo ore i te Atua e tera taime, ua hara ïa. Na raua iho i faaoti e riro ei taata hara e te tia ore. E ere raua ana‘e te ati, ta raua atoa râ huaai.

Shirley: Aita vau e taa ra.

Megan: E rave tâua i te tahi hi‘oraa. Mea au na oe ia tunu i te faraoa monamona?

Shirley: E, mea au roa na ’u!

Megan: A hi‘o na, ahiri e farii apî ta oe no te tunu i te reira. Na mua ’‘e oe a faaohipa ’i, topa ’tura te farii e popo‘a a‘era. Mai te aha ïa te huru o te mau faraoa monamona atoa e tunuhia i roto i tera farii? Mea popo‘a atoa ïa, e ere anei?

Shirley: E.

Megan: I to Adamu raua Eva faaotiraa i te faaroo ore i te Atua, ua riro raua ei taata popo‘a, tuinohia e te hara e te huru tia ore. I te mea ua rave raua i te reira na mua ’‘e a tamariihia ’i, ua fanauhia ta raua huaai atoa e tera popo‘a. Ua riro te taatoaraa ei feia hara. I roto i te Bibilia, e faaohipahia te parau hara ia ravehia te tahi ohipa ino, oia atoa râ no te faataa i tei tutuuhia mai e Adamu e Eva. Te auraa, noa ’tu aita tâua i rave i te ohipa ino e aita atoa i fanauhia ’tura, ua riro ê na tâua ei taata hara no ta Adamu e Eva i rave. Ua naeahia ta raua tamarii e tatou i te huru tia ore e te hara a pohe atu ai. Mai tei parauhia i roto i te Roma 6:23, e utua te pohe no te hara.

Shirley: Aita e tano ia mauiui tatou paatoa e a muri noa ’tu no te hara a Adamu raua Eva.

Megan: Parau mau. E ere râ tera ana‘e. Ua faaoti te Atua ia pohe Adamu e Eva no ta raua hara. No to ’na râ parau-tia, aita oia i vaiiho noa i to raua huaai mai tera noa. Ua faanaho te Atua i te tahi ravea, te tusia taraehara o Iesu. A hi‘o faahou na i te Roma 6:23. Te parauhia ra i muri iho: “Area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” O te pohe o Iesu ïa te ravea no te faaora, aore ra faatiamâ, ia tatou i te hara e te pohe. *

 TE HOO, TE Ô RAHI ROA ’‘E A TE ATUA

Megan: Te vai nei â te tahi vahi faufaa i roto i teie irava ta ’u e hinaaro e faaite atu.

Shirley: Eaha te reira?

Megan: A hi‘o na i tei papaihia: “Te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” Mai te peu o Iesu tei mauiui e tei pohe no tatou, no te aha i parauhia ’i “mea horoa-noa-hia mai ïa e te Atua” te hoo, eiaha râ mea horoa-noa-hia mai ïa e Iesu? *

Shirley: Aita vau i ite.

Megan: Ua poiete te Atua ia Adamu e Eva e ua rave raua i te hara ma te faaroo ore ia ’na i roto i te ô i Edene. Eita e ore, ua mauiui roa ino oia a orure hau ai ta ’na na tamarii matamua i te fenua nei. Ua faanaho oioi râ Iehova i te tahi ravea. * Ua tono oia hoê o ta ’na mau melahi no te haere mai i te fenua nei ia riro ei taata tia roa e te pae hopea ia horoa i to ’na ora ei tusia taraehara. E ô no ǒ mai i te Atua ïa te hoo. E ere râ tera ana‘e. Ua feruri ê na anei oe eaha to te Atua huru i te taime a haapohehia ’i Iesu?

Shirley: Aita.

Megan: Te ite ra vau i te tahi mau hauti i roto i te aua. E tamarii ta oe?

Shirley: E, hoê tamaroa e hoê tamahine.

Megan: E metua oe. A feruri na maa taime mai te aha te huru o te Metua o Iesu i te ra‘i, te Atua ra o Iehova, a haapohehia ’i Iesu. Mai te ra‘i mai, ua ite oia i ta ’na Tamaiti here i te tapeahia, faaooohia e te taparahihia. Ua patitihia i nia i te pou raau e ua vaiihohia i nia ia mauiui roa a pohe atu ai.

Shirley: Aita vau i feruri a‘enei i te reira! Ua mauiui roa ino oia.

Megan: Parau mau, eita iho â e nehenehe e faataa papu roa i to te Atua huru i tera taime. E taa râ tatou ua mauiui mau o ’na. Ua faaite-atoa-hia eaha te tumu i vaiiho ai oia ia tupu te reira. E hi‘o ana‘e i tera irava nehenehe mau, Ioane 3:16. Na oe e taio?

Shirley: E. Te na ôhia ra: “I aroha mai te Atua i to te ao, e ua tae roa i te horoa mai i ta ’na Tamaiti fanau tahi, ia ore ia pohe te faaroo ia ’na ra, ia roaa râ te ora mure ore.”

O te hoo te faaiteraa rahi roa ’‘e o te here

Megan: Mauruuru. A hi‘o faahou na i te omuaraa o tera irava. Ua papaihia: “I aroha mai te Atua i to te ao.” No to ’na ïa here te Atua i tono ai i ta ’na Tamaiti i te fenua nei no te pohe no tatou. O te hoo te faaiteraa rahi roa ’‘e o te here. Tera atoa te tahi tumu e putuputu ai te mau Ite no Iehova hoê taime i te matahiti no te haamana‘o i te pohe o Iesu. Ua faufaahia anei oe i ta tâua aparauraa?

Shirley: E. Mauruuru i te faataaraa i te taime ia hi‘opoa tâua i te reira.

E uiraa ê anei ta oe no nia i te tahi tumu parau Bibilia? E hinaaro anei oe e ite atu â i te mau tiaturiraa a te mau Ite no Iehova? Mai te peu e e, eiaha e taiâ i te ui atu. E oaoa roa ratou i te aparau e oe.

^ par. 5 Hoê taime i te matahiti, e putuputu te mau Ite no Iehova i te mahana o te poheraa o Iesu no te haamana‘o i te tusia ta ’na i rave.

^ par. 32 I to muri nei mau tumu parau, e hi‘opoahia nafea tatou e tiamâ mai ai i te hara maoti te tusia taraehara o Iesu e eaha te tia ia rave ia faufaahia tatou i tera hoo.

^ par. 36 Ia au i te Bibilia, mea taa ê te Atua ia Iesu. No te ite atu â, a hi‘o i te pene 4 o te buka Eaha ta te Bibilia e haapii mau ra? piahia e te mau Ite no Iehova.

^ par. 38 A hi‘o i te Genese 3:15.

No te ite atu â

EAHA TA TE BIBILIA E HAAPII MAU RA?

Te hoo—Te ô rahi roa ’‘e a te Atua

Eaha te hoo? E nafea oe e faufaahia ’i i te pohe o Iesu e te tia-faahou-raa?