Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2015

 UA TAUI TE BIBILIA I TO ’U ORARAA

Toru uiraa tei taui i to ’u oraraa

Toru uiraa tei taui i to ’u oraraa
  • MATAHITI FANAURAA: 1949

  • FENUA: MARITE

  • AAMU: UA HINAARO E ITE I TE OAOA MAU

NA MUA ’‘E:

Ua paari au i Ancram, te tahi oire iti i te tuhaa apatoerau o New York, i Marite. Ua î tera vahi i te mau fare hamaniraa û. I tera oire, ua rahi a‘e ïa te puaatoro i te taata.

Hoê ana‘e fare pureraa i ǒ e i reira to matou utuafare e haere atoa ’i. I te mau Tapati poipoi atoa, e faaanaana papa ruau i to ’u tiaa na mua ’‘e vau a haere ai i te haapiiraa Tapati. I hopoi atoa na vau i te Bibilia iti ta to ’u mama ruau i horoa mai. Ua haapiihia ia matou to ’u taeae e tuahine ia faaitoito i te rave i te ohipa, ia faatura e ia tauturu i te taata a mauruuru atoa ’i i te mau haamaitairaa ta matou i fana‘o.

I to ’u paariraa, ua vaiiho vau i to ’u utuafare e ua riro mai ei orometua i te fare haapiiraa. E rave rahi uiraa ta ’u no nia i te Atua e te oraraa. I roto i ta ’u piha haapiiraa, te vai ra vetahi e mau piahi aravihi, te tahi atu mea itoito noa ïa. Te vai ra e tino paruparu to ratou, area te tahi atu mea oraora maitai. No ’u, mea tia ore te tupuraa o te taata. I te tahi taime, e parau mai te mau metua o te mau piahi tino paruparu: “Tera iho â ïa ta te Atua i hinaaro no ta ’u tamarii.” I feruri na vau, no te aha te Atua e vaiiho ai ia paruparu te tino o vetahi mau pêpe. E ere hoi no ratou te hape.

I feruri atoa na vau, ‘Eaha te ohipa faahiahia te tia ia ’u ia rave i roto i to ’u oraraa?’ No ’u, mea poto roa te oraraa o te taata. Ua paari au i roto i te tahi utuafare au mau, ua haere i te mau fare haapiiraa maitai e teie nei, mea au roa na ’u ta ’u ohipa. Aita râ vau i ite i te oaoa mau. Peneia‘e, e faaipoipo vau i te tane, e fana‘o i te fare nehenehe, e fanau i te tamarii, e rave i te ohipa tae noa ’tu i te faatuhaaraa e te pae hopea e haere i te fare ruau. Ua feruri au, mai tera noa ïa to tatou oraraa?

UA TAUI TE BIBILIA I TO ’U ORARAA:

Ua tere au e vetahi orometua haapii i Europa. Ua haere matou e mataitai i te Abbaye de Westminster, Notre-Dame de Paris, te Vaticana, oia atoa te tahi atu mau fare pureraa nainai. I tera mau vahi atoa, ua ui au i ta ’u mau uiraa. I to ’u ho‘iraa i te fare i Sloatsburg i New York, e rave rahi fare pureraa  ta ’u i mataitai, aita râ te mau pahonoraa papu i horoa-noa ’‘e-hia mai.

I te tahi mahana, ua haafatata mai hoê piahi 12 matahiti e e toru uiraa ta ’na i horoa mai. A tahi, ua ite anei au e Ite no Iehova oia. Ua pahono vau, e. Te piti, e hinaaro anei au e ite atu â no nia i te mau Ite no Iehova, ua na ô faahou atu vau, e. Te toru, ua ani mai ihea vau e noho ai. I to ’u faaiteraa ’tu, taa ’tura mâua, e ere to ’u vahi nohoraa i te mea atea i to ratou. Aita vau i mana‘o a‘e e taui roa to ’u oraraa i na uiraa e toru a teie tamahine.

I muri iti a‘e, ua haere mai o ’na na nia i te pereoo taataahi i to ’u fare e ua haamata i ta ’u haapiiraa Bibilia. Ua ui atu vau i te mau uiraa ta ’u i horoa i te mau tia faaroo e rave rahi. Te mea taa ê râ ia ratou, ua faaite mai oia i te mau pahonoraa papu i roto i ta ’u iho Bibilia. A tahi ra vau a ite ai i tera mau parau!

I to ’u haapiiraa i te Bibilia, ua oaoa e ua mauruuru mau vau. Putapû roa to ’u aau a taio ai i te Ioane 1, 5:19 o te na ô ra: “Te vai noa nei to te ao atoa i raro a‘e i taua varua ino ra.” Ua tamahanahanahia vau i te ite o Satani te tumu o te mau ati atoa e haaati mai ra e e faaafaro te Atua i te mau mea atoa. (Apokalupo 21:3, 4) Ua taa ia ’u e nehenehe mau e maramarama i ta te Bibilia e haapii ra ia faataa-maitai-hia te reira. Taa ê noa ’tu i te reira, na te tahi tamahine 12 noa matahiti e haapii ra ia ’u. Feruri a‘era vau, e taa iho â oe i te parau mau noa ’tu o vai te faaite mai ia oe i te reira.

Ua hinaaro râ vau e ite te faaohipa ra anei te mau Ite no Iehova i ta ratou e parau ra. I faaite mai na te tamahine e faatupu te mau Kerisetiano mau i te mau huru maitatai mai te faaoromai e te mǎrû. (Galatia 5:22, 23) Ua hinaaro vau e tamata ia ’na no te ite mai tera atoa anei to ’na mau huru. I te tahi mahana, ua faataere au ia mairi te hora faaauhia no te haapiiraa. I feruri na vau, ‘E tiai mai anei oia? Mai te peu e, e riri anei no te mea ua taerehia vau?’ I to ’u tapearaa i te pereoo, ite atura vau ia ’na e tiai noa ra i mua i to ’u fare. Horo mai ra oia e parau: “Haamata ra vau i te ho‘i i te fare no te parau ia mama ia niuniu i te fare ma‘i e te mutoi no te ite aita anei oe i fifihia. Haapeapea roa vau no oe! Aita hoi oe i maoro a‘enei no ta oe haapiiraa.”

I te tahi atu mahana, ua horoa vau i te tahi uiraa ta ’u i mana‘o mea fifi no te tahi tamahine 12 matahiti ia pahono. Ua hinaaro vau e ite e pata hanoa mai anei oia i te pahonoraa. To ’u uiraa ’tu, hi‘o mai nei oia ia ’u e ua parau: “Mea paari roa ta oe uiraa. E tapao vau i te reira e e ui au i to ’u na metua.” I te haapiiraa i muri iho, ua afai mai oia i te tahi vea Te Pare Tiairaa tei roto te pahonoraa o ta ’u uiraa. Tera te tahi tumu i au roa ’i au i te mau Ite no Iehova, e faaite mai ta ratou mau papai i te mau pahonoraa Bibilia i ta ’u mau uiraa atoa. Ua tamau vau i te haapii e teie tamahine e hoê matahiti i muri a‘e, ua bapetizohia vau ei Ite no Iehova. *

TO ’U FAUFAARAAHIA:

Ua pahono-maitai-hia ta ’u mau uiraa e ua hinaaro vau e faaite i te reira ia vetahi ê. (Mataio 12:35) I te haamataraa, ua patoi mai to ’u utuafare. I muri a‘e râ, ua mǎrû rii mai to ratou huru. Ua haapii to ’u mama i te Bibilia a fatata ’i oia i te pohe. Noa ’tu aita i tapae i te bapetizoraa, ua papu ia ’u ua faaoti oia i te tavini ia Iehova.

I 1978, ua faaipoipo vau i te tahi Ite no Iehova o Elias Kazan te i‘oa. I 1981, ua titau-manihini-hia mâua ia riro ei melo o te utuafare o te Betela i Marite. * Ma te peapea, ua pohe Elias maha noa matahiti i muri a‘e. Ua faaea noa râ vau i te Betela e ua tauturu mai te reira ia faaitoito noa e ua tamahanahana atoa mai.

I 2006, ua faaipoipo vau ia Richard Eldred, te tahi melo o te utuafare o te Betela. Te oaoa noa nei mâua no te fana‘oraa taa ê e tavini i te Betela. Ma te haapii i te parau mau no nia i te Atua, aita noa vau i ite i te mau pahonoraa ta ’u i imi na, te oaoa mau atoa râ vau. Ua haamata noa ïa na roto na uiraa e toru a te tahi tamahine.

^ par. 16 Ia amuihia, ua haapii teie tamahine e to ’na iho mau taeae e tuahine paari a‘e, e pae o ta ratou mau orometua haapii i te Bibilia e o tei haamata i te tavini ia Iehova.

^ par. 18 “Fare o te Atua” te auraa o te parau “Betela.” Tera te i‘oa o te mau piha ohipa a te mau Ite no Iehova na te ao nei. (Genese 28:17, 19) E rave rau hopoia ta te mau melo o te utuafare o te Betela e haapao no te turu i te ohipa haapiiraa a te mau Ite no Iehova.