Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2015

 UIRAA A TE FEIA TAIO

E oroa Kerisetiano iho â anei te Pakate?

E oroa Kerisetiano iho â anei te Pakate?

I roto i te Encyclopædia Britannica, te faataahia ra ua riro te Pakate ei “oroa faufaa ta te haapaoraa Kerisetiano e faatupu no te haamana‘o i te tia-faahou-raa o Iesu Mesia.” Tera râ, e oroa Kerisetiano iho â anei tera?

No te ite e ere tera i te tao‘a haavare, mea faufaa roa ia hi‘opoa maite i te reira. No te ite atoa e oroa Kerisetiano anei te Pakate, e titauhia ia hi‘opoa ua taaihia tera oroa i te aha.

Na mua roa, ua ani Iesu i ta ’na mau pǐpǐ ia haamana‘o i to ’na pohe, eiaha râ i to ’na tia-faahou-raa. Ua faaite te aposetolo Paulo i te reira mai “te amuraa maa a te Fatu.”—Korinetia 1, 11:20; Luka 22:19, 20.

Ia au atoa i te buka Britannica, mea iti roa te taairaa e vai ra i roto e rave rahi peu o te oroa Pakate e te tia-faahou-raa o Iesu, e peu tutuu râ te reira na te taata. Ua riro te huero moa e te rapiti ei tapao no te Pakate. No nia i te reira, te parauhia ra i roto i te tahi papai no nia i te haapaoraa: “Te faahoho‘a ra te huero moa i te oraraa apî ua parari ana‘e te apu huero moa.” Ua na-ô-atoa-hia: “E animara te rapiti o te fanau rahi roa e ua riro ïa te reira ei faahoho‘araa no te tau uaaraa tiare.”

E orometua haapii Philippe Walter no nia i te tuatapaparaa o te taata i te tau tahito. Te faataa ra oia mea nafea tera mau peu i riro ai ei tuhaa o te oroa Pakate. I faatupu na te mau nunaa ěê i te tahi oroa ia hope te mau ava‘e toetoe e ia haamata te tau uaaraa tiare. Ia riro ratou ei Kerisetiano, mea ohie a‘e ia taai tera oroa i te pohe e te tia-faahou-raa o Iesu. Ua na ô atoa Walter, ua riro ei ravea maitai no te faaô i te mau oroa Kerisetiano i roto i te tarena a te mau nunaa ěê ia farii-ohie-hia te reira.

Aita tera ohipa i tupu a ora noa ’i te mau aposetolo, ua riro hoi ratou ei “tapea” a patoi ai i te mau peu a te mau nunaa ěê. (Tesalonia 2, 2:7) Ua faaara te aposetolo Paulo: “Ia reva ê atu vau . . . E tia mai hoi te taata i roto ia outou iho, e parau mai i te parau pi‘o, ia peehia ratou e te pǐpǐ.” (Ohipa 20:29, 30) I te hopea o te senekele matamua, ua papai atoa te aposetolo Ioane ua haavarehia te mau Kerisetiano e vetahi taata. (Ioane 1, 2:18, 26) Ua haamata ïa te mau peu a te mau nunaa ěê i te fariihia.

“Eiaha outou ia amui-au-ore-hia i te feia faaroo ore.”—Korinetia 2, 6:14

E parau vetahi, e ere hoi i te mea ino ia farii vetahi peu o te oroa Pakate. Maoti hoi te reira, ua taa maitai a‘e te mau nunaa ěê i te auraa o te tia-faahou-raa o Iesu. Aita râ Paulo i feruri noa ’‘e mai tera. A tere ai na te mau fenua faaterehia e to Roma, e rave rahi peu ta ’na i ite. Noa ’tu râ, aita oia i farii noa ’‘e hoê no te tauturu i te taata ia ite o vai Iesu. Teie râ ta ’na i faaara i te mau Kerisetiano: “Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? e eaha to te maramarama auraa i te pouri? . . . E teie nei, te na ô maira Iehova, E haere mai outou i rapae au mai roto mai ia ratou ra, ia taa ê outou, e eiaha e rave noa ’tu i te mea viivii.”—Korinetia 2, 6:14, 17.

Mai te aha ’tura te huru o ta tatou hi‘opoaraa poto? Ua faaite papu mai te reira e ere te Pakate i te oroa Kerisetiano.