Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Me 2015

Ua ite anei oe?

Ua ite anei oe?

Ua faufaahia te aposetolo Paulo i to ’na tiaraa ei tino huiraatira no Roma

Ua parau Paulo: “Ei ia Kaisara vau.”

E fana‘o te tino huiraatira o Roma i te tahi mau tiaraa e fana‘oraa taa ê i te mau vahi atoa faaterehia e to Roma. Tei raro a‘e oia i ta ratou mau ture, eiaha râ i ta te mau mataeinaa. Ia faahapahia oia, e nehenehe ta ’na e farii ia haavahia o ’na ia au i te ture o tera mataeinaa. E nehenehe atoa râ ta ’na e ani ia haere i mua i te tahi tiripuna Roma. Mai te peu o te pohe te faautuaraa, e tiaraa to ’na ia ani ia farerei i te faatere o Roma.

No reira te tahi tia faatere no Roma i te senekele matamua hou te Mesia o Cicéron te i‘oa i parau ai: “E ohipa ino ia ruuruu i te tahi tino huiraatira no Roma e ia hui ia ’na. Ia pohe o ’na ia oe, mai te huru ua haapohe oe i to oe iho metua aore ra fetii piri.”

Ua poro rahi te aposetolo Paulo ati a‘e i te tuhaa fenua faaterehia e to Roma. Ua faaohipa oia i to ’na tiaraa tino huiraatira no Roma e toru taime: (1) Ua faaara i te mau haava no Philipi, o tei hamani ino ia ’na, aita ratou i haapao i to ’na tiaraa. (2) Ua faaite i to ’na tiaraa ia ore oia ia huihia i Ierusalema. (3) Ua ani ia tia ’tu oia i mua ia Kaisara, te faatere o Roma, no te faataa i tei tupu.—Ohipa 16:37-39; 22:25-28; 25:10-12.

Mai te aha te mau parau faaau a te mau tiai mamoe i tahito ra?

Ofai e faaite ra ua hoohia te mamoe e te puaaniho i 2050 hou te Mesia

I haapao na Iakoba 20 matahiti i te nǎnǎ a te tahi fetii to ’na o Labana te i‘oa. Ua ohipa oia 14 matahiti no to ’na aniraa i te rima o na tamahine e piti a tera taata. Ua na reira â 6 matahiti ia horoahia ’tu te tahi mau mamoe na ’na. (Genese 30:25-33) Ia au i te tahi vea i te pae o te ihipǎpǎ, “ua matau te feia papai i tahito ra e te mau taata taio Bibilia i te mau parau faaau ta te mau tiai mamoe i rave, mai ta Labana e Iakoba.”—Biblical Archaeology Review.

Mea papu ua tupu tera mau parau faaau no te mea ua itehia mai te tahi mau ofai o te tau tahito i te oire Nouzi, Larsa e te tahi atu mau vahi i Irak. E mana hoê parau faaau mai te tau paotiraa huruhuru mamoe o teie matahiti e tae atu i to te matahiti i muri a‘e. E farii te mau tiai mamoe i te haapao i te tahi numera taa maitai o te mau mamoe oni e ufa faataahia ia au i to ratou matahiti. Hoê matahiti i muri a‘e, e fana‘o te fatu o te nǎnǎ i te tahi tuhaa o te mau huruhuru animara, te û, te mau fanau‘a e te vai atu â. O te tiai mamoe te fana‘o i te tuhaa hau o te reira.

Ia au i te rahiraa o te mau mamoe e horoahia ’tu, e nehenehe te nǎnǎ e rahi mai. Ia horoahia 100 mamoe, 80 fanau‘a te fanauhia. Ia ore te tiai mamoe ia haapao maitai i te nǎnǎ, o ’na te faahapehia. Na te reira ïa e turai ia ’na ia faaitoito i te haapao maite i te mau animara i raro a‘e i ta ’na tiaauraa.