Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA NOVEMA 2014

 UA TAUI TE BIBILIA I TO ’U ORARAA

O vau ana‘e ta ’u e haapao

O vau ana‘e ta ’u e haapao
  • MATAHITI FANAURAA: 1951

  • FENUA: HEREMANI

  • AAMU: TAATA TEOTEO E TE HAEREA ORURE HAU

NA MUA ’‘E:

I to ’u nainairaa, ua ora to matou utuafare i pihai iho ia Leipzig i Heremani hitia o te râ. E ere i te mea atea roa i te otia fenua o Tchèque e Poronia. I te onoraa o to ’u matahiti, ua haere matou i Beresilia e i muri iho i Équateur no te ohipa a to ’u papa.

I te 14raa o to ’u matahiti, ua afaihia vau i te tahi fare nohoraa no te mau piahi i Heremani. I te mea e tei te atea to ’u na metua i Marite apatoa, na ’u iho i haapao ia ’u. Ua haamata atura vau i te faaite i te haerea orure hau. E ere vau i te mea tâu‘a roa i te mana‘o o vetahi ê.

I te 17raa o to ’u matahiti, ua ho‘i mai to ’u na metua i Heremani e ua ora faahou vau i ǒ raua. No to ’u râ huru, eita ta ’u e nehenehe e faaea faahou e to ’u utuafare. I te 18raa o to ’u matahiti, ua faarue au i te fare.

Eita ta ’u e nehenehe e faaea i te hoê noa vahi e ua imi ïa i te fa o to ’u oraraa. Ua hi‘opoa vau i te oraraa huru rau o te taata e ua tiaturi e aita ’tu ohipa maitai a‘e ta ’u e rave i te haereraa e mataitai i teie paraneta nehenehe mau hou te taata a tuino roa ’i te reira.

Ua faarue atura vau ia Heremani e ua hoo mai i te hoê faurao e piti huira no te haere i Afirika. Aita râ i maoro, ua ho‘i i Europa no te tataî i te reira e ua tapae oioi vau i te pae tahatai o te fenua Potiti. I muri a‘e, opua ’tura vau e vaiiho i to ’u faurao no te tere haere na nia i te pahi.

Ua apiti au i te hoê pûpû taurearea e faaineine ra i te tere na te moana Ataranitita. I reira to ’u matauraa ia Laurie o te riro ei vahine na ’u i muri a‘e. Ua tere na mua matou i te mau motu no Antilles. I muri iho, ua faaea rii matou i Porto Rico e ua ho‘i atura i Europa. Ua hinaaro mâua i te tahi pahi taie no te faariro te reira ei vahi nohoraa. E toru noa ava‘e to mâua imiraa e tupu atura te tahi ohipa mana‘o-ore-hia. Ua titauhia vau ia rave i ta ’u tau faehau i Heremani.

Ua riro vau ei faehau i roto i te nuu moana o Heremani e 15 ava‘e. I muri iho, ua faaipoipo mâua Laurie e ua faaineine  no te tere â na te mau fenua. A rave noa ’i au i ta ’u tau faehau, ua hoo mai mâua i te hoê poti e ua faariro i te reira ei poti taie. Ua opua mâua e ora i roto a tere noa ’i no te mataitai i teie paraneta nehenehe mau. I tera taime, i muri a‘e i ta ’u tau faehau e hou a oti ai te poti taie, ua farerei mâua i te mau Ite no Iehova e ua haamata i te haapii i te Bibilia.

UA TAUI TE BIBILIA I TO ’U ORARAA:

Na mua ’‘e, aita vau i mana‘o e titauhia ia taui au i to ’u oraraa. Ua faaipoipohia vau e ta ’u vahine e ua faaea a‘ena atoa i te puhipuhi i te avaava. (Ephesia 5:5) E no ta mâua opuaraa e tere na te ara, ua mana‘o vau e mea maitai roa ia faaohipa i to tatou oraraa no te mataitai i te mau mea faahiahia ta te Atua i poiete.

Ua titau-mau-hia râ ia taui au, i to ’u iho â râ huru. E taata teoteo roa vau e te orure hau, ua faahiahia roa vau i to ’u aravihi e te mau ohipa ta ’u i rave. E haapao noa vau ia ’u.

I te hoê mahana, ua taio vau i te A‘oraa tuiroo a Iesu i nia i te mou‘a. (Mataio pene 5-7) I te haamataraa, ua huru ê au i ta Iesu i parau no nia i te oaoa. Ei hi‘oraa, ua parau oia e oaoa te feia e hiaai i te maitai. (Mataio 5:6) I uiui na vau e nafea te hiaairaa i te tahi mea e nehenehe ai e faaoaoa i te taata. A tamau noa ’i i te haapii i te Bibilia, ua taa ia ’u e hinaaro tatou paatoa e faatupu i te taairaa e te Atua. E mea tia râ na mua ia farii ma te haehaa i te reira, ua parau hoi Iesu: ‘E ao to tei haehaa te aau, no ratou hoi te Basileia ra o te ao.’—Mataio 5:3.

I muri a‘e to mâua Laurie haapiiraa i te Bibilia i Heremani, ua tere mâua i Farani e i muri a‘e i Italia. E Ite no Iehova to te mau vahi atoa ta mâua i haere. Ua putapû roa vau i to ratou here haavare ore te tahi e te tahi e to ratou tahoê. Ua papu atura vau e ua riro iho â te mau Ite ei fetii taeae na te ao nei. (Ioane 13:34, 35) Ua bapetizohia ’tura mâua Laurie ei Ite no Iehova.

Ua tutava noa vau i te taui i to ’u huru i muri a‘e i te bapetizoraa. Ua opua mâua Laurie e haere i Marite na te pae tooa o te râ no Afirika e na roto atu i te moana Ataranitita. I nia i teie moana rahi, o mâua ana‘e to nia i te poti e e miti ana‘e tei haaati mai. I reira to ’u taaraa i to ’u haihai ia faaauhia i to tatou Atua poiete rahi. No te iti o te ohipa e nehenehe e rave i nia i te moana, ua haafaufaa vau i te taime rahi e vai ra ia ’u no te taio i te Bibilia. Ua putapû roa vau i te aamu o Iesu a ora ’i oia i te fenua nei. Ei taata tia, e aravihi taa ê mau to ’na, aita roa râ i faatietie ia ’na. Aita oia i haapao i to ’na hinaaro, i to to ’na râ Metua i te ra‘i.

Ua taa ia ’u e titauhia ia haafaufaa vau i te Basileia o te Atua na mua roa

Ua feruriruri au i te hi‘oraa o Iesu e ua taa e e titauhia ia haafaufaa vau i te Basileia o te Atua na mua roa, eiaha râ i te mau ohipa huru rau ta ’u e hinaaro e rave. (Mataio 6:33) A tae ai i Marite, ua faaoti mâua Laurie e faaea i te tere na te ara no te haapao i ta mâua haamoriraa i te Atua.

TO ’U FAUFAARAAHIA:

Na mua ’‘e, ua tiaturi noa vau ia ’u e e pinepine au i te haapeapea no te mau faaotiraa ta ’u i rave. I teie nei râ, ua ite au teihea te paari mau no te aratai ia ’u. (Isaia 48:17, 18) E fa to to ’u oraraa i teie nei, e haamori i te Atua e e tauturu ia vetahi ê ia haapii o vai o ’Na.

Ma te haapao i te mau aratairaa Bibilia, ua maitai atu â to mâua Laurie taairaa. Ua haamaitai-atoa-hia mâua na roto i ta mâua tamahine nehenehe mau, ua paari hoi ma te ite o vai o Iehova e ma te here ia ’na.

E ere râ te auraa aita matou i faaruru na i te fifi. Na roto râ i te tauturu a Iehova, ua faaoti papu matou i te faaoromai aore ra i te tiaturi noa ia ’na.—Maseli 3:5, 6.

No te ite atu â

E nafea to oe utuafare e oaoa ’i?

E Atua oaoa Iehova o te hinaaro ra ia oaoa te mau utuafare. Hi‘o i te mau aratairaa Bibilia faufaa no te mau tane, vahine, metua e tamarii.