Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TETEPA 2014

 UA TAUI TE BIBILIA I TO ’U ORARAA

Ua faatupu i ta ’u iho aroraa i te parau-tia ore e te ino

Ua faatupu i ta ’u iho aroraa i te parau-tia ore e te ino
  • MATAHITI FANAURAA: 1960

  • FENUA: LEBANONA

  • AAMU: TAATA TAPUTÔ TINITO

NA MUA ’‘E:

Ua paari au i Rmaysh, piri atu i te otia e faataa ê ia Iseraela ia Lebanona. E tama‘i to tera ra tau, te haamana‘o noa ra vau i te mau ofai paaina e te mau taata hapa ore i ere i te mau mero o to ratou tino. E mea fifi roa te oraraa e ua rahi roa te taparahiraa e hamani-ino-raa taata.

Tei roto to matou utuafare i te Etaretia Maronite, hoê o te mau Etaretia Katolika i Hitia o te râ. O papa te ohipa noa ia nehenehe na melo 12 o to ’na utuafare ia tamaa. O mama râ, e haapao ïa o ’na ia haere te toea i te fare pureraa. Ua haamata ’tura vau i te mana‘o e aita te haapaoraa e te taata atoa i nehenehe e tauturu i te feia paruparu.

I to ’u taurearearaa, ua hinaaro roa vau e haapii i te taputô Tinito parauhia kung fu. E tera iho â ta ’u i rave e ua riro vau ei taata aravihi i te faaohipa i te rima, te avae e e rave rau mauhaa o tera taputô. No ’u, ‘eita ta ’u e nehenehe e faaore i te tama‘i, te feia râ e hamani ino ia vetahi ê, oia ïa.’ Ia ite au e piti taata ia taputô, oioi noa vau i te tapea ia raua. Ua riro vau ei taata e riri taue noa. Ua riaria te feia atoa o te pae Apatoa o Lebanona ia ’u no te mea ua faatupu vau i ta ’u iho aroraa i te parau-tia ore e te ino.

Ua apiti au i te tahi pǔpǔ taputô Tinito i Beyrouth i 1980. Ma te mau mauhaa rau, e topita-noa-hia tera vahi, ua tamau râ vau i te haere i reira no te haapii i te taputô. Aita ’tu â ohipa i roto i to ’u oraraa, tamaa, taoto e e ora mai ia Bruce Lee, te tahi taata hauti teata i Taina e Marite e aito atoa hoi no te taputô Tinito. Ua tâpû vau i to ’u rouru mai to ’na, ua haere mai ia ’na e ua pee atoa i to ’na hi‘oraa a taputô ai, aita roa vau e ata noa ’‘e.

UA TAUI TE BIBILIA I TO ’U ORARAA:

Ua hinaaro vau e riro ei taata aravihi roa no te taputô Tinito i Taina. I te tahi po, te faaineine ra vau ia ’u no te haere i Taina a patotohia ’i i te opani. O to ’u ïa hoa e e piti Ite no Iehova. E ahu ereere to nia iho ia ’u e ua î roa to ’u tino i te hou, ua parau atu  vau, ‘Aita vau i ite noa ’‘e i te hoê mea no nia i te Bibilia.’ Aita roa vau i mana‘o noa ’‘e e e taui to ’u oraraa i tera taime.

Ua faaite mai na Ite no te aha eita ’i te taata e nehenehe e faaore roa i te parau-tia ore e te ino. Ua faataa mai e o te Diabolo ra o Satani te tumu o tera mau fifi. (Apokalupo 12:12) Ua maere roa vau i te hau e te tiaturi o na Ite e ua putapû atoa a haapii mai ai e i‘oa to te Atua. (Salamo 83:18) Ua faaite atoa mai raua i te Timoteo 1, 4:8 e na ô ra: “O te haamataro hoi i ta te tino nei, e faufaa iti haihai to te reira: area te paieti ra, e faufaa ïa to te reira i te mau mea atoa nei, e maitai tei faaitehia mai no te reira i teie nei ao e te ao a muri atu.” Ua taui roa to ’u oraraa i tera mau parau.

Ma te peapea, aita vau i farerei faahou i te mau Ite, ua parau atu hoi to ’u utuafare eiaha e ho‘i mai. Noa ’tu râ, ua haavî au i to ’u feruriraa no te faaea i te taputô Tinito e no te haapii i te Bibilia. Noa ’tu e aita to ’u mau taeae i au i tera mana‘o, ua faaoti papu vau i te farerei faahou i te mau Ite no Iehova no te haapii i te Bibilia e o ratou.

Ua tamau vau i te imi i te mau Ite, aita râ i farerei noa ’‘e i te hoê. I roto i taua area taime ra, ua oto roa vau no te pohe-taue-raa to ’u metua tane e no te tahi atu mau ati o to ’u utuafare. Ua haamata vau i te rave i te ohipa i roto i te hoê taiete paturaa. I te tahi mahana, ua ani mai to ’u hoa rave ohipa o Adel te i‘oa eaha te haapeapea ra ia ’u. Ua haamata oia i te tauaparau no nia i ta te Bibilia tiaturiraa, te tia-faahou-raa. I muri a‘e, ua haapii mai tera Ite î i te here e te faaoromai i te Bibilia e iva ava‘e.

I te roaraa o te haapiiraa, ua taa ia ’u e e titauhia ia taui roa vau i to ’u huru. Mea fifi roa râ, e riri hanoa hoi au e mea ohie atoa ia faatihaehae mai. Maoti te Bibilia, ua haapii au e nafea ia haavî ia ’u e ia ore e riri taue noa. Ei hi‘oraa, teie te a‘oraa a Iesu i roto i te Mataio 5:44: “E aroha ’tu i to outou mau enemi . . . e pure hoi [no] te feia i parau ino mai e tei hamani ino mai ia outou.” Te faaara atoa ra te Roma 12:19: “Eiaha outou e tahoo . . . ua papaihia hoi e, Te parau maira Iehova, Ei ia ’u te riri, na ’u ïa e tahoo atu.” Ua noaa ia ’u te hau maoti tera e te tahi atu mau irava Bibilia.

TO ’U FAUFAARAAHIA:

I muri a‘e, ua faatura to ’u utuafare i te mau Ite no Iehova noa ’tu e i te haamataraa ua patoi ratou i ta ’u faaotiraa e haapii. Ua tahoê mai hoi hoê o to ’u mau taeae no te haamori ia Iehova e ua turu mama i to mâua faaroo i mua ia vetahi ê e tae roa i to ’na poheraa.

Ua haamaitai-atoa-hia vau na roto ia Anita ta ’u vahine taiva ore e te nehenehe tei riro ei apiti here i roto i te pororaa taime taatoa. Mai 2000 ra, te ora nei mâua i Eskilstuna i Tuete e te haapii ra i te Bibilia i te feia e paraparau ra i te reo o te mau Arabia.

Te peapea noa ra to ’u aau no te feia e mauiui ra no te hamani-ino-raa. Te ite ra râ vau i te oaoa e te hau no te mea ua taa ia ’u te tumu o te reira, oia atoa i ta te Atua e fatata roa i te rave no te faaore i te ino.—Salamo 37:29.

Te oaoa nei mâua ta ’u vahine i te poro e te au atoa nei i te haapii ia vetahi ê o vai Iehova

No te ite atu â

No te aha te Atua e vaiiho noa ’i i te ino e te mauiui?

Nohea mai te ino, e no te aha te Atua e vaiiho noa ’i i te reira? E ore roa anei te mauiui?