Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TETEPA 2014

E nafea ia a‘o i ta oe tamarii?

E nafea ia a‘o i ta oe tamarii?

“A faaroo ai i te haruru o te mau pereoo, e moemoe noa vau. Teie te toru o te taime a ore ai Jordan e haapao i te hora e ho‘i mai ai i te fare. ‘Teihea roa oia?,’ ‘Te fifi ra anei o ’na? Aita paha oia i feruri noa ’‘e e e haapeapea mâua.’ I te taime a tae mai ai oia, ua ura roa vau i roto.”GEORGE.

“Ua riaria roa vau a faaroo ai i te auê a ta ’u tamahine. I to ’u huriraa atu, te tapea ra oia i to ’na upoo e te ta‘i ra. Ua tupai to ’na taeae e maha matahiti ia ’na.”—NICOLE.

“Ma to ’na na mata ninamu araara maitai e te toparaa reo mǎrû, ua parau Natalie ta mâua tamahine e ono matahiti, ‘Aita vau i eiâ i te tapea rima, ua itehia mai ia ’u!’ No ta ’na mau parau taparuparu, ua mauiui roa mâua e ua ta‘i. Ua ite mâua e ua haavare oia.”—STEPHEN.

E METUA anei oe? Eita e ore te taa ra oe i te huru o te metua i faahitihia i nia ’tu. I mua i te hoê â tupuraa, e feruri anei oe e nafea aore ra e mea tia anei ia a‘o i ta oe tamarii? E mea ino anei ia a‘o i ta oe tamarii?

EAHA TE A‘O?

I roto i te Bibilia e ere te parau “a‘o” i te tahi noa ta‘o ê no te faautuaraa. Na mua roa, ua riro te a‘o ei ravea no te aratai, haapii e tauturu ia taui i te haerea. E ere roa ’tu te reira i te ohipa ino.—Maseli 4:1, 2.

E nehenehe e faaau i te a‘o a te metua i te ohipa faaapu. E faaineine te taata faaapu i te repo, te pape e e haapao oia i te maa ta ’na i tanu. E paruru atoa oia i te reira i te mau manumanu e te aihere. A tupu ai tei tanuhia, e titauhia paha i te taata faaapu ia topetope ia tupu afaro noa te reira. Ua ite oia e rave rau ravea ta ’na e tia ia haapao maite ia riro te reira ei raau ruperupe. E faaohipa atoa te mau metua i te mau ravea e rave rahi no te haapao i ta ratou tamarii. I te tahi râ taime, e titauhia ia topetope aore ra ia a‘o ia taui oioi te tamarii i to ’na haerea a nehenehe atu ai oia e rave i te mea afaro aore ra maitai. E mea tia râ ia haapao maitai a topetope ai i te tahi raau, e nehenehe hoi te reira e ino roa. A a‘o ai i te tamarii, e titau-atoa-hia i te mau metua ia a‘o ma te here.

Ua horoa te Atua o te Bibilia ra o Iehova i te hi‘oraa maitai i te mau metua. Ma te tano e te au, ua a‘o oia i ta ’na mau tavini auraro i te fenua nei i tia ’i ia ratou ia “hinaaro i te a‘o.” (Maseli 12:1) O ratou atoa te haapao nei i te parau “e tapea etaeta i te a‘o” e “eiaha roa e tuua” i te reira. (Maseli  4:13) E nehenehe oe e tauturu i ta oe tamarii ma te pee i te hi‘oraa o te Atua: E a‘o (1) ma te here, (2) ma te tano e (3) ma te tamau.

A A‘O MA TE HERE

No te here te Atua e a‘o ai. Te na ô ra te Bibilia: “O tei herehia e Iehova ra, o ta ’na ïa e a‘o mai, mai te metua e a‘o i te tamaiti ta ’na e here ra.” (Maseli 3:12) E Atua “aroha noa, e te hamani maitai rahi, e te faaoromai rahi” o Iehova. (Exodo 34:6) E ere ïa o ’na i te Atua faahepo aore ra ino. Eita oia e haamauiui ma ta ’na mau parau, eita atoa e faaino aore ra e faaooo. E nehenehe hoi te reira e ‘au i te ‘o‘e patiatia.’—Maseli 12:18.

A FAAROO

Eita iho â te mau metua e nehenehe e faaoromai roa mai te Atua ra. I tera râ taime, a haamana‘o noa e e pinepine te riri i te turai ia faautua ma te faahepo, ma te tano ore e eita te tamarii e tauturuhia ia taui. E ere te faautuaraa na roto i te riri aore ra te inoino i te a‘o. I tera taime, ua erehia oe i te faaoromai.

Ia a‘o râ oe ma te here e te faaoromai, e faufaa rahi ta oe e ite. A hi‘o na eaha ta George e Nicole, na metua i faahitihia i te omuaraa i rave.

A PURE

“Ua riri roa ino mâua i te taime a tae mai ai Jordan, ua faaoromai râ a faaroo noa ’i i ta ’na faataaraa. I te mea e ua mairi roa te hora, ua faaoti matou e tauaparau i te poipoi. Ua pure matou paatoa e ua haere e taoto. I te poipoi, ua mǎrû mâua no te tauaparau ma te hau e no te haaputapû i te aau o ta mâua tamaiti. Ua farii oia i ta ’na hape, oia atoa i te mau opaniraa ta mâua i faaite atu. Ua ite mau mâua e eita te riri e tauturu ia vetahi ê ia taui. Mai te peu e e faaroo na mua tatou, e pinepine te fifi i te faaafaro-maitai-hia.”—George.

A TAUAPARAU

“Ua riri roa vau i te huru o ta ’u tamaiti a tupai ai o ’na i to ’na tuahine. E ere tera te taime e rave ai au i te faaotiraa tano, ua parau ïa vau na mua ia ’na ia haere i roto i to ’na piha. Ua mǎrû vau i muri a‘e e ua faataa ia ’na e mea ino ia tupai ia vetahi ê e ua faaite e ua mauiui roa to ’na tuahine i ta ’na i rave. Ua tano vau i te na reiraraa no te mea i muri noa ’‘e, ua ani oia i to ’na tuahine ia faaore i ta ’na hapa e ua tauahi atura ia ’na.”Nicole.

Noa ’tu ïa e faautuahia te tamarii, ia a‘o noa oe ma te here e tia ’i.

 A A‘O MA TE TANO

Ua a‘o noa Iehova ma te tano. (Ieremia 30:11; 46:28) E haapao oia i te taatoaraa o te tupuraa, oia atoa te ore e ite-mata-hia. E nafea te mau metua e na reira ’i? Te faataa ra Stephen tei faahitihia i te omuaraa: “Ua mauiui roa mâua e aita atoa i taa i te tumu e onoono ai Natalie i te rave i te tapea rima, ua tamata râ mâua i te haapao i to ’na faito matahiti e to ’na ite.”

E feruri atoa Robert te tane a Nicole i te taatoaraa o te tupuraa. Ia hape ta ’na tamarii, e uiui o ’na: ‘A tahi ra anei te reira e tupu ai aore ra ua matau oia i te na reira? Ua rohirohi aore ra ua ma‘ihia anei te tamarii? Aita anei to ’na haerea e faaite maira e te vai ra te tahi atu fifi?’

Mea au atoa ia feruri te mau metua e aita te mau tamarii i ite maitai atura i te haapaoraa. Ta te aposetolo Paulo iho â ïa i farii a papai ai: “I tau tamarii riiraa ra, mai ta te tamarii atoa ta ’u parau, e mai to te tamarii to ’u ite.” (Korinetia 1, 13:11) Te na ô ra Robert: “Te tahi ravea e tauturu ra ia ’u ia a‘o ma te tano e ia ore ia riri, o te haamana‘oraa ïa i ta ’u i matau na i te rave i to ’u tamariiraa.”

Mea faufaa roa ia ore ia etaeta roa e i te hoê â taime ia ore ia faatiatia aore ra ia tapo i to mata i mua i te haerea ino o te tamarii. Ma te haapao i te matahiti o ta oe tamarii, to ’na ite e te vai atu ra, e a‘o oe ma te tano e te au.

A A‘O TAMAU

Eita Iehova e taui. (Malaki 3:6) Ua ite maitai te mau tavini a te Atua i te reira. E titau-atoa-hia ia ite te tamarii e e a‘o tamau atu te mau metua. Ia tauiui noa ta oe aratairaa ia au i to oe huru i tera e tera mahana, eita ta oe tamarii e taa faahou e e fiu oia.

A haamana‘o i ta Iesu i parau: “Ia riro râ ta outou oia ei oia, e ta outou aita ei aita.” E tano atoa tera a‘oraa no te mau metua. (Mataio 5:37) Hou a faahiti ai i te parau, a feruri maite na mua e e rave anei oe mai ta oe i parau! A faaara ’i i te tamarii e e faautua oe ia hape oia, a rave mai ta oe i parau.

E mea faufaa roa ia tauaparau maitai na metua no te a‘o tamau. Te faataa ra Robert: “I te tahi taime, e farii au i ta te tamarii aniraa ma te ore e ite e ua patoi atu to ratou mama, ia ite au i te reira, e taui au i ta ’u faaotiraa no te turu i ta ’u vahine.” Ia ore te mana‘o o na metua ia tu, e mea maitai a‘e ia tauaparau raua ana‘e e ia hoê ta raua faaotiraa.

E MEA FAUFAA ROA TE A‘O

Ia pee oe i te hi‘oraa o Iehova a a‘o ai ma te here, ma te tano e ma te tamau, e faufaa-mau-hia ta oe mau tamarii. E tauturu ta oe aratairaa here ia ratou ia riro ei taata paari maitai. Mai ta te Bibilia e parau ra: “E haapii i te tamaiti i tana e‘a ia haere ra; e ia paari oia ra, e ore e faarue i taua e‘a ra.”—Maseli 22:6.

No te ite atu â

E nafea ia a‘o i to tamarii?

Te a‘oraa, te haapiiraa ’tu ïa. E tauturu atu te mau faaueraa Bibilia ia haapii te tamarii ia auraro eiaha râ ia orure hau atu.