Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Tetepa 2014

E nehenehe anei e ite i te Atua hi‘o-ore-hia?

E nehenehe anei e ite i te Atua hi‘o-ore-hia?

“E VARUA te Atua,” eita ïa to tatou mata e nehenehe e ite ia ’na. (Ioane 4:24) Te faaite ra râ te Bibilia e ua hi‘o aore ra ite vetahi i te Atua. (Hebera 11:27) E nehenehe anei? E tia anei ia oe ia ite i “te Atua hi‘o-ore-hia”?—Kolosa 1:15.

E nehenehe e faaau i to tatou tupuraa i to te taata i matapo mai to ’na fanauraahia. Te auraa râ anei e eita oia e taa i tei haaati ra ia ’na? Eita, ma te ravea rau, e nehenehe ta ’na e taa e e taata teie, e tauihaa tera e e ohipa te tupu ra. Ua parau te tahi taata matapo, “aita to ’u mata e ite ra, to ’u râ feruriraa, te taa râ ïa.”

Noa ’tu e eita to oe mata e nehenehe e hi‘o i te Atua, e nehenehe ‘te mata o to aau’ e ite ia ’na. (Ephesia 1:18) E hi‘opoa ana‘e e toru ravea.

“TE ITEA PAPUHIA NEI . . . MAI TE HAMANIRAA MAI Â O TEIE NEI AO”

E pinepine te taata matapo i te faaohipa ’tu â i to ’na tari‘a aore ra rima no te taa i ta ’na e ore e ite. Mai ia ’na, e nehenehe atoa oe e taa o vai te Atua poiete hi‘o-ore-hia na roto i te mau mea atoa e haaati ra ia oe. “Te mau mea hoi no ’na e ore e tia ia hi‘o ra, te itea papuhia nei ïa i te mau mea i hamanihia nei, mai te hamaniraa mai â o teie nei ao.”—Roma 1:20.

A feruri na i te fenua nei tei riro ei nohoraa no tatou. Aita noa te reira i hamanihia ia parahi maoro te taata i nia iho, ia oaoa atoa râ i te oraraa. Ia puihau mai te mata‘i haumǎrû, ia mahanahana tatou i te mahana, ia amu i te maa au mau aore ra ia faaroo i te ta‘i tamǎrû o te mau manu, e oaoa tatou! E ere anei te faaiteraa e e Atua poiete maitai, aroha e horoa noa to tatou?

Eaha te haapii mai i ta tatou e ite ra i roto i te ao nui? E faaite te mau ra‘i i te puai o te Atua. Ia au i te tahi faaiteraa a te mau aivanaa, te parau ra ratou e te aano noa ’tura te ao nui ma te vitiviti! A nânâ ’i to mata i nia i te ra‘i i te po, a feruri na: ‘No vai te puai e faaaano noa ’tura i te ao nui ma te vitiviti?’ Te parau maira te Bibilia e e “puai rahi” to te Atua poiete. (Isaia 40:26) Te faaite ra te mau mea ta te Atua i poiete e o ’na “te Puaihope” e e mana faito ore to ’na.—Ioba 37:23.

“OIA TE FAAITE MAI IA ’NA”

Te na ô ra te tahi metua vahine e ua mohimohi te mata o ta ’na na tamarii e piti: “O te paraparauraa te ravea maitai roa ’‘e no te haapii ia ratou. E faataa oe ia ratou i te mau mea atoa ta oe e ite ra, e faaroo ra, [e] ia vai ineine noa oe i te faataa vitiviti ia ratou. O oe to ratou mata.” Noa ’tu e “aore e taata i ite i te Atua,” o te Tamaiti a te Atua o Iesu “i nia i te ouma o te Metua ra, oia te faaite mai ia ’na.” (Ioane 1:18) I te mea ua poietehia o ’na na mua i te mau mea atoa e oia te Tamaiti fanau tahi a te Atua, ua riro Iesu ei “mata” no tatou no te hi‘o i to te ra‘i. O ’na ana‘e te faaite maitai roa ’‘e o vai te Atua hi‘o-ore-hia.

Mea maoro roa Iesu i pihai iho i to ’na Metua, a hi‘o na vetahi parau ta ’na i faaite no te faataa o vai te Atua:

  • Te ohipa ra te Atua ma te rohirohi ore. “Te ohipa noa nei â tau Metua.”—Ioane 5:17.

  • Ua ite te Atua i to tatou mau hinaaro. “Ua ite hoi to outou Metua i te mau mea e au ia outou.”—Mataio 6:8.

  • Ta te Atua e horoa noa maira. “To outou Metua i te ao ra; te faahiti nei oia hoi i to ’na mahana i nia i te ino e te maitai, e te haamairi mai nei  oia i te ûa i nia i te parau-tia e te parau-tia ore.”—Mataio 5:45.

  • E mea faufaa te taata taitahi no te Atua. “E ere anei taipiti manu rii ia hoo i te moni veo hoê nei? e ore râ te hoê o taua na manu rii ra e moe i to outou Metua ia mairi i raro i te repo. Eaha ’tu â ïa, ua hope atoa ra te rouru o to outou upoo na i te taiohia. Eiaha maori outou e mǎta‘u, e maitai rahi hoi to outou i to te manu e ia rahi noa ’tu.”—Mataio 10:29-31.

TE TAATA I FAAITE I TE HURU O TE ATUA HI‘O-ORE-HIA

E pinepine, mea ê roa te ravea e taa ’i te matapo i te tahi mea ia faaauhia i te feia e nehenehe to ratou mata e ite. E taa te matapo e e vahi marumaru tera, eita râ e ite i te poiri, no ’na e vahi haumǎrû te reira e paruruhia ’i te taata i te mahana. Mai te matapo o te ore e ite i te poiri aore ra i te maramarama o te mahana, ia ore tatou e tauturuhia, eita tatou e ite o vai Iehova. Ua tono mai ïa Iehova i te tahi taata o te faaite ma te tia roa i to ’na mau huru maitatai e o vai o ’na.

O Iesu tera taata. (Philipi 2:7) Aita noa Iesu i paraparau no nia i to ’na Metua, ua faaite atoa râ i to ’na huru. Ua ani Philipa, e pǐpǐ na Iesu: “E te Fatu, e faaite mai ia matou i te Metua.” Ua pahono Iesu: “O tei hi‘o mai ia ’u ra, ua hi‘o ïa i te Metua.” (Ioane 14:8, 9) Eaha ta tatou e “hi‘o” no nia i te Metua na roto i ta Iesu mau haaraa?

E taata maitai Iesu e te haehaa e ohie ia haafatata. (Mataio 11:28-30) No to ’na huru au mau, aita te taata i taiâ i te tapiri atu. Ua taa atoa Iesu i te oto o vetahi ê e ua oaoa a oaoa ’i ratou. (Luka 10:17, 21; Ioane 11:32-35) A taio aore ra a faaroo ai i te aamu o Iesu, a faaohipa i to oe feruriraa e mai te mea e to reira oe i tera taime. Ia feruriruri oe i to Iesu huru i nia i te taata, e ite atu â oe i te huru maitai o te Atua e e haafatata ’tu â oe ia ’na.

IA AU I TA OE I HAAPII MAI

Teie ta te tahi taata papai buka i parau no te matapo: “Ma te mau ravea rau (ma te fafa, hau‘a, faaroo e te vai ra atu â), e mea tatuhaahia te mau haamaramaramaraa e tae atu ia ’na, i muri a‘e, e amui oia i te mau tuhaa atoa no te taa.” Mea rahi te mau mea ta oe e ite a mataitai ai i ta te Atua i poiete, a taio ai i ta Iesu i parau no to ’na Metua e a hi‘opoa ’i i ta ’na i rave no te faaite i te mau huru maitatai o te Atua. Mai te matapo, ia amui oe i tera mau haamaramaramaraa atoa, e ite oe i te huru nehenehe mau o Iehova e e tiaturi atu â oe ia ’na.

Ua na reira Ioba tei ora mea maoro i teie nei. Ua paraparau oia “i tei ore i itea” e ana. (Ioba 42:3) A hi‘opoa maite ai râ oia i te mau ohipa faahiahia ta te Atua i poiete, ua na ô Ioba i muri a‘e: “Ite a‘enei au ia oe i te ite tari‘a nei, teie nei râ, te hi‘o nei tau mata ia oe.”—Ioba 42:5.

‘Ia imi oe ia Iehova ra, e itea ’tu oia e oe’

E nehenehe atoa oe e na reira. “Ia imi oe [ia Iehova] ra, e itea ’tu oia e oe.” (Paraleipomeno 1, 28:9) E oaoa roa te mau Ite no Iehova i te tauturu ia oe ia imi e ia ite i te Atua hi‘o-ore-hia.