Eaha to roto?

Tapura tumu parau

Eaha te tiaturiraa no to ˈu mau tupuna?

Eaha te tiaturiraa no to ˈu mau tupuna?

AITA i maoro aˈenei, ma te maere teie tei piahia i te api matamua o te tahi vea no Korea (The Chosun Ilbo): “E haere anei te potii Shim Cheong tei ore i ite o vai Iesu i roto i te po auahi?”

Ua huru ê te taata i tera uiraa. I roto i te tahi aai no Korea, ua horoa te vahine apî ra o Shim Cheong i to ˈna ora no te tauturu i to ˈna metua tane matapo. Mea faufaa roa ïa o ˈna no te taatoaraa. A tau matahiti aˈenei to te taata faahanahanaraa ia ˈna. I Korea, ua riro ïa Shim Cheong ei tamahine faaturahia.

No te rahiraa, e mea tano ore e te ino ia faautua i te taata ia haere i te po auahi no te mea aita oia i bapetizohia ei Kerisetiano. Ua parare ê na hoi teie aai na mua ˈˈe te poroi no nia ia Iesu e tae ai i to ˈna oire iti.

Te faaite-atoa-hia ra i roto i tera vea i ta te tahi tia haapaoraa i parau. Ua anihia ia ˈna e e haere anei te feia pohe i ore i ite o vai Iesu i roto i te po auahi? Ua pahono oia: “Aita matou i ite. E au ra râ e e faautuaraa ta te Atua [no tera mau taata].”

EAHA TE RAVE IA FAAORAHIA TE TAATA?

Teie tei papaihia i roto i te tahi buka (The New Catholic Encyclopedia): “Ia faaorahia te tahi taata, e mea tia ia bapetizohia oia. Ia au i ta Iesu i parau, ia ore te tahi e fanau-faahou-hia i te pape e te Varua Maitai, e ore oia e ô i te Basileia o te Atua (Ioa 3:5).” No tera mau parau vetahi e tiaturi ai e e haere te feia pohe i ore i bapetizohia i te po auahi aore ra e haamauiuihia ratou i muri aˈe i te pohe.

Te vai ra râ te ore e farii i tera tiaturiraa. E mirioni taata tei pohe ma te ore i ite i te Bibilia. Mea tano anei ia haamauiuihia ratou e a muri noa ˈtu? Eaha ta te Bibilia e haapii ra?

TA TE BIBILIA TIATURIRAA

Ia au i te Bibilia, e ere no te mea aita te taata i ite i ta ˈna mau titauraa, eita ïa te Atua e haapao ia ratou. Teie hoi te tamahanahanaraa i roto i te Ohipa 17:30: “Aita ˈtura te Atua i haapao i taua mau anotau ite ore ra.” Eaha ta te Bibilia tiaturiraa no te feia pohe i ore i haapii o vai te Atua?

Eaha te auraa o te mau parau a Iesu a na ô ai, “Ei paradaiso ïa oe e o vau atoa”?

E ite tatou i te pahonoraa i roto i ta Iesu i parau i te tahi taata ohipa ino i pohe i pihai iho ia ˈna. Ua na ô tera taata ia Iesu: “E te Fatu, e haamanaˈo mai oe ia ˈu ia tae oe i to oe ra basileia.” Teie ta Iesu i pahono: ‘Ei paradaiso ïa oe e o vau atoa, i teie nei â mahana oia mau ta ˈu e parau atu ia oe nei.’—Luka 23:39-43.

Ua fafau anei Iesu e e haere tera taata i te raˈi? Aita. Aita hoi oia i ‘fanau-faahou-hia’ i te pape e te varua mai tei titauhia na mua roa i te feia e ô atu i te Basileia i te raˈi. (Ioane 3:3-6) Ua parau râ Iesu ia ˈna e e ora faahou oia, i roto râ i te paradaiso. I te mea e e ati Iuda teie taata, ua papu maitai ia ˈna i te parau o te paradaiso i te fenua nei mai tei faaitehia i roto i te buka Bibilia matamua, te ô i Edene. (Genese 2:8) Ma ta ˈna mau parau, ua horoa ˈtu Iesu i te haapapuraa e e tia faahou mai oia ia riro te fenua nei ei paradaiso.

Te fafau ra ïa te Bibilia e “e tia-faahou-raa to tei pohe, te feia parau-tia e te feia parau-tia ore.” (Ohipa 24:15) O te mau taata i ore i haapao i ta te Atua faaueraa tia no te mea aita ratou i ite i to ˈNa hinaaro “te feia parau-tia ore.” E faatia mai Iesu i te taata ohipa ino i paraparau ia ˈna, oia atoa e mirioni e peneiaˈe e miria tei pohe ma te ore i ite o vai te Atua. I muri iho, i roto i te paradaiso, o te mau titauraa a te Atua te haapiihia ˈtu ia nehenehe ratou e faaite i te here i te Atua ma te auraro i ta ˈna mau ture.

IA TIA FAAHOU MAI “TE FEIA PARAU-TIA ORE”

Ia tia faahou mai “te feia parau-tia ore,” e haavahia anei ratou ia au i ta ratou ohipa i rave na mua ˈˈe? Eita. Te na ô ra te Roma 6:7: ‘O te taata hoi i pohe ra, ua matara ïa oia i ta ˈna hara.’ A pohe ai, ua aufau “te feia parau-tia ore” no ta ratou mau hara. E haavahia ïa tera mau taata ia au i ta ratou e rave i muri aˈe i te tia-faahou-raa, eiaha râ ia au i ta ratou mau ohipa na mua ˈˈe a pohe ai. E faufaahia anei ratou?

I muri aˈe i te tia-faahou-raa, e haapii “te feia parau-tia ore” i ta te Atua mau ture o te faahohoˈahia ra i te mau otaro e tatarahia. E haavahia ratou ia au “i ta ratou ra mau ohipa,” e taata auraro anei i te Atua aore ra eita. (Apokalupo 20:12, 13) No te rahiraa o “te feia parau-tia ore,” tera te taime matamua e nehenehe ai ratou e faaite e e hinaaro ratou e ora e a muri noa ˈtu i te fenua nei ma te haapii e ma te rave i te hinaaro o te Atua.

Ua tauturu teie haapiiraa a te Bibilia e rave rahi ia tiaturi faahou i te Atua. O Yeong Sug te tahi. E Katolika oia mai to ˈna tamariiraa e e perepitero vetahi melo o to ˈna utuafare. I te mea e ua hinaaro oia e tavini i te Atua, ua haere oia i te tahi fare no te paretenia. I muri aˈe râ, ua tatarahapa roa oia no te mau ohipa ta ˈna i ite i ǒ. Hau atu â, aita oia i farii i te haapiiraa o te po auahi, e mea aroha ore hoi no ˈna ia haamauiui i te taata i roto i te auahi o te po.

I muri aˈe, ua faaite te tahi Ite no Iehova ia Yeong Sug i teie mau parau a te Bibilia: “Ua ite te feia e ora nei, e pohe ratou, aita râ a te feia i pohe ra e parau itea. Aita hoi a ratou e utua toe i te fenua nei.” (Koheleta 9:5) Ua tauturu te Ite no Iehova ia ˈna ia papu e aita to ˈna mau tupuna e haamauiuihia ra i roto i te po auahi, te taoto ra râ ma te tiai i te tia-faahou-raa.

Ma te ite e aita te rahiraa i faaroo atura i te parau mau o te Bibilia, ua putapû roa te aau o Yeong Sug i ta Iesu i parau i roto i te Mataio 24:14, “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” I teie mahana, te poro ra oia i tera parau apî oaoa e te faaite atoa ra ia vetahi ê i te tiaturiraa o te Bibilia ta ˈna i farii.

“E ORE TE ATUA E HAAPAO I TE HURU O TE TAATA”

Te na ô ra te Bibilia e “e ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) E maere anei tatou i teie faaiteraa tia roa o te parau-tia a te Atua o tei ‘hinaaro i te parau-tia e te au?’—Salamo 33:5.