Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TIURAI 2014

 A PEE I TO RATOU FAAROO | MARIA

Ua faaoromai i te mauiui o te patia ‘o‘e

Ua faaoromai i te mauiui o te patia ‘o‘e

TE PARAHI e te oto ra Maria, eita e nehenehe e faataa mau i to ’na mauiui rahi. Te haamana‘o ra paha oia i te auê o ta ’na tamaiti a pohe ai i muri a‘e tau hora haamauiuiraa. Noa ’tu e e avatea tera taime, ua poiri roa te ra‘i e tupu atura te aueueraa fenua puai mau. (Mataio 27:45, 51) Ua haapapu paha te reira ia Maria e te faaite ra Iehova i to te ao e o ’na tei mauiui roa ’‘e i te pohe o Iesu Mesia.

A maramarama ’i te vahi e parauhia o Golagota aore ra vairaa apu upoo i te taperaa mahana, te oto ra Maria no ta ’na tamaiti! (Ioane 19:17, 25) Eita e ore e ua mana‘ona‘o oia i tei tupu a 33 matahiti a‘enei. I te taime a afai ai o ’na e Iosepha i ta raua aiû iti i te hiero i Ierusalema, ma te faaurua, ua faaite te taata paari ra o Simeona i te tahi parau tohu. E parau faahiahia ta ’na i faaite no Iesu, ua na ô atoa râ e i te hoê mahana, e ite Maria i te mauiui mai te huru ra e ua patiahia o ’na i te ‘o‘e. (Luka 2:25-35) I tera noa taime ahoaho mau oia i te taaraa i tera mau parau.

Ua patiahia te aau o Maria

Ua parauhia iho â e o te pohe o ta oe iho tamarii te mea mauiui roa ’‘e. E enemi aroha ore mau te pohe e e haamauiui iho â te reira ia tatou i te hoê mahana. (Roma 5:12; Korinetia 1, 15:26) E nehenehe anei e faaoromai i tera mau huru mauiui? A hi‘opoa ’i i te oraraa o Maria i te haamataraa o te taviniraa a Iesu e tae atu i to ’na pohe e i muri iti noa ’‘e, e haapii atu â tatou no nia i te faaroo i tauturu ia Maria ia faaoromai i te mauiui o te patia ‘o‘e.

“TA ’NA E FAAUE MAI IA OUTOU NA, E NA REIRA OUTOU”

E ho‘i na tatou e toru matahiti e te afa i na mua ’tu. Ua taa ia Maria e e tupu te tahi tauiraa. Noa ’tu e te paraparau rahi ra te taata o te oire iti o Nazareta no Ioane Bapetizo e ta ’na poroi putapû mau o te tatarahapa, ua taa Maria e ua ite ta ’na tamaiti i te tapao no te haamata i ta ’na taviniraa. (Mataio 3:1, 13) Aita faahou ana‘e Iesu i te fare, e rave rahi ohipa te taui. No te aha?

E au e ua pohe ê na Iosepha i tera taime, ua ite a‘enei ïa Maria i te mauiui a ere ai oia i ta ’na tane. * Aita Iesu i pii-noa-hia “te tamaiti a te tamuta,” “te tamuta” atoa râ. Ua rave atoa ïa Iesu i te imiraa moni a to ’na metua tane e ua haapao e ua aupuru oia i to ’na metua vahine e na ono paha tamarii tei fanauhia i muri a‘e ia ’na. (Mataio 13:55, 56; Mareko 6:3) O Iakobo te tamaiti paari i muri a‘e ia Iesu. Eita e ore e ua faaineine oia ia ’na ei mono no ’na, e ere iho â râ i te mea ohie no te utuafare. E hopoia rahi ê na ta Maria, e farii anei oia i tera mau tauiraa? Aita e parauhia ra, tera râ, te vai ra te tahi uiraa faufaa roa ’tu â. Eaha to ’na huru ia riro Iesu no Nazareta ei Iesu Mesia tei tohuhia na? E ite mai tatou i te reira a hi‘opoa ’i i te tahi aamu Bibilia.—Ioane 2:1-12.

 Ua haere Iesu ia Ioane ia bapetizohia oia e ua riro tei faatavaihia e te Atua aore ra te Mesia. (Luka 3:21, 22) I muri iho, ua maiti i ta ’na mau pǐpǐ. Noa ’tu e e mea ru ta ’na ohipa, ua faataa oia i te taime no te oaoa e to ’na utuafare e hoa. Ua haere oia, to ’na mama, ta ’na mau pǐpǐ e to ’na mau taeae i te tahi oroa faaipoiporaa i Kana, e au e e oire tera i nia roa i te mou‘a e tau 13 kilometera i te atea ia Nazareta. I tera oroa, ua taa Maria e e fifi te tupu ra. Peneia‘e, ua ite oia i te hoho‘a mata o vetahi o te fetii o na hoa faaipoipo i te haapeapearaa. Aita faahou e uaina. I tera tau, ia ore oe e farii maitai i te taata, e ino roa te roo o te utuafare, tei mua ’tu â ïa te haama ia tupu te reira i te oroa faaipoiporaa. Ua haapeapea Maria no teie mau taata e ua fariu ia Iesu ra.

Ua parau i ta ’na tamaiti, “aita a ratou uaina.” Eaha ta ’na e hinaaro ra? Aita i parauhia, tera râ, no Maria, ua riro ta ’na tamaiti ei taata rahi o te nehenehe e rave i te ohipa faahiahia mau. Peneia‘e, ua hinaaro oia ia haamata Iesu i te na reira i tera taime. E au ïa e ua na ô oia: “E tau tamaiti, a rave na i te tahi ohipa iti!” Ua maere roa paha oia a pahono ai Iesu: “Eaha ta oe ia ’u nei, e teie nei vahine?” Ua mana‘o vetahi e aita Iesu i faatura i to ’na metua vahine a pahono ai mai tera. E au ra râ e ma teie nei mau parau, ua haamana‘o oia ma te mǎrû i to ’na mama e aita ta ’na e parau i ta ’na taviniraa. E ohipa hoi tera na to ’na Metua ra o Iehova.

I te mea e e vahine haehaa e te feruriraa paari o Maria, ua farii oia i te a‘o a ta ’na tamaiti. Ua fariu oia i te mau tavini e ua parau noa: “Ta ’na e faaue mai ia outou na, e na reira outou.” Ua taa ia Maria e eita faahou ta ’na e nehenehe e faatere atu, e mea tia râ ia ’na e te tahi atu ia farii i te aratairaa a ta ’na tamaiti. Ua faaite râ Iesu e te tâu‘a ra oia i te haapeapearaa o to ’na metua vahine no teie na hoa faaipoipo apî. Ua faatupu atura ïa i ta ’na semeio matamua ma te faariro i te pape ei uaina maitai. Eaha tei tupu? “Ua faaroo a‘era ta ’na mau pǐpǐ ia ’na” e o Maria atoa. E ere noa ïa Iesu ta ’na tamaiti, to ’na atoa râ Fatu e Faaora.

E haapii mai te mau metua i teie mahana i te faaroo o Maria. Papu maitai e aita ’tu â taata tei haapao i te tamarii mai ia Iesu te huru. E ere iho â i te mea ohie no te mau metua ia riro ta ratou tamarii ei taata paari. E haa noa paha na metua mai te huru ra e e tamariirii noa â ratou, e ere râ i te mea tano ia na reira. (Korinetia 1, 13:11) E nafea te metua e nehenehe ai e tauturu i ta ’na tamarii paari? Te tahi ravea, o te tiaturiraa ïa e e faaoti iho â ta ’na tamaiti aore ra tamahine i te haapao i ta te Bibilia e haapii ra e e haamaitaihia o ’na e Iehova. E riro mai te tamarii ei taata maitai ia faaite atu te metua i te haehaa e te tiaturi. Eita e ore e ua oaoa roa Iesu i te turu a Maria i roto i te mau tupuraa i muri a‘e.

“AORE . . . TO ’NA IHO HUI TAEAE MAU I FAAROO IA ’NA”

Mea iti roa te parau no Maria i roto i te mau evanelia i faatia i na toru matahiti e te afa o te taviniraa a Iesu. A haamana‘o na e ei vahine ivi, o ’na ana‘e paha te haapao ra i ta ’na mau tamariirii i te fare. E taa iho â ïa ia tatou e eita ta ’na e nehenehe e pee ia Iesu a poro ai i to ’na oire tumu. (Timoteo 1, 5:8) Noa ’tu râ, ua tamau oia i te feruriruri i ta ’na i haapii no nia i te Mesia e i te haere i te mau putuputuraa i te sunago mai tei  matauhia e to ’na utuafare.—Luka 2:19, 51; 4:16.

Eita e ore o Maria atoa tei rotopu i te taata e faaroo ra ia Iesu ia paraparau i te sunago i Nazareta. Auê paha oia i te oaoa i te faaararaa a ta ’na tamaiti e ua tupu te parau tohu no nia i te Mesia i nia ia ’na i tera taime! Ua hepohepo râ paha a ite ai i te feia no Nazareta i te patoi i ta ’na tamaiti, ua hinaaro atoa hoi ratou e haapohe ia ’na!—Luka 4:17-30.

Te tahi atu tumu i hepohepo ai oia, no te huru ïa o te tahi atu o ta ’na mau tamaiti i nia ia Iesu. Ia au i te Ioane 7:5, aita na taeae e maha o Iesu i faatupu i te hoê â faaroo e to ratou metua vahine. Te parauhia ra: “Aore . . . to ’na iho hui taeae mau i faaroo ia ’na.” E piti paha tuahine to Iesu, aita râ te Bibilia e faaite noa ’‘e i to raua huru i nia ia ’na. * I te mau mahana atoa, ua ite Maria i te hepohepo ia ora e te fetii e ere i te hoê â tiaturiraa faaroo e to ’na. Ua tutava oia i te haapao noa i te parau mau no ǒ mai i te Atua e i te haaputapû i te aau o to ’na utuafare ma te ore e faahepo atu.

Eita e ore e tei rotopu to Iesu mau taeae i te fetii i haere e “tapea ia ’na.” Ua parau hoi ratou e ua maamaahia o ’na. (Mareko 3:21, 31) E ere iho â tera to Maria mana‘o, ua apee râ o ’na i ta ’na mau tamarii ma te tiaturi e e faatupu paha ratou i te faaroo ia Iesu na roto i ta ’na mau parau. Tera iho â anei tei tupu? Noa ’tu e ua rave Iesu e rave rahi ohipa maere e ua haapii i te pue parau mau faahiahia, aita te mau tamaiti a Maria i tiaturi ia ’na. Ua uiui anei oia ma te riri paha e nafea râ ia haaputapû i to ratou aau?

Mai te peu e aita to oe utuafare i tahoê i te pae faaroo, e haapiiraa faufaa mau ta oe e huti mai i te faaroo o Maria. Aita oia i faaea i te tiaturi e e nehenehe te mau melo o to ’na utuafare e taui. Ua faaoti oia i te faaite atu e te oaoa e te vai hau noa ra o ’na no to ’na faaroo. Ua tamau atoa oia i te turu i ta ’na tamaiti taiva ore. Ua mihi anei oia ia Iesu? I te tahi taime, aita anei o ’na i hinaaro ia Iesu i te fare i pihai iho ia ’na e to ’na utuafare? Oia paha, tera râ, aita oia i hinaaro ia haapaohia o ’na na mua. Ua faaite oia e e fana‘oraa taa ê no ’na ia turu e ia faaitoito ia Iesu. E nehenehe atoa anei oe e tauturu i ta oe tamarii ia haapao na mua i te hinaaro o te Atua?

E PATIAHIA TO AAU I TE ‘O‘E

Ua faufaahia anei Maria i te faatupu i te faaroo ia Iesu? Ua haamaitai mau Iehova ia ’na e te tahi atu. (Hebera 11:6) A feruri na i to ’na huru a faaroo ai i ta ’na tamaiti ia paraparau aore ra ia faatia ’tu vetahi ê i ta ’na i parau.

Ua faaite ta Iesu mau faahoho‘araa i ta Iosepha e Maria i haapii ia ’na

I roto i te mau faahoho‘araa a ta ’na tamaiti, aita anei Maria i haamana‘o ia Iesu i to ’na paariraa i Nazareta? A faahiti ai Iesu i te hi‘oraa o te hoê vahine e purumu ra i to ’na fare no te imi i te tahi tao‘a moe, e taviri ra i te faraoa ota aore ra e tutui ra i te lamepa a tuu atu ai i te vahi teitei, aita anei Maria i haamana‘o i teie tamariirii i pihai iho ia ’na a rave ai oia i tera mau ohipa? (Luka 11:33; 15:8, 9; 17:35) A parau ai Iesu e mea mǎrû ta ’na zugo e te mâmâ, aita anei Maria i haamana‘o i te mahana faufaa roa i ite ai oia ia Iosepha ia haapii i te tamarii ra o Iesu ia hamani e ia tuu i te zugo ma te mǎrû ia ore te reira e haafifi i te animara? (Mataio 11:30) Papu maitai e ua oaoa roa Maria i te fana‘oraa taa ê ta Iehova i horoa ia ’na ia haapii e ia faaineine i teie tamaiti o te riro  ei Mesia. Ua oaoa mau oia i te faaroo ia Iesu, te taata haapii rahi roa ’‘e, tei rave i tera mau faahoho‘araa e tupuraa matauhia i tera vahi no te faataa i te mau haapiiraa faufaa mau!

Ua faaite noa Maria i te haehaa. Aita ta ’na tamaiti i faateitei i to ’na metua vahine a vaiiho atu ai ia haamorihia o ’na. I te roaraa o ta ’na taviniraa, ua faaite te tahi vahine e ia haamaitai-mau-hia to Iesu mama i te fanauraa ia ’na. Ua pahono oia: “O tei faaroo â e ua haapao i te parau a te Atua, o ratou tei maitai.” (Luka 11:27, 28) A parau ai vetahi i mua i te nahoa taata e tei reira to Iesu metua vahine e to ’na mau taeae, ua na ô oia e o tei faatupu i te faaroo to ’na metua vahine e taeae mau. Aita Maria i huru ê i ta ’na i parau, ua taa râ oia i te haapiiraa e mea faufaa roa ’‘e te feia e faatupu i te taairaa e te Atua i te fetii.—Mareko 3:32-35.

Eita e nehenehe e faataa i to Maria oto rahi i mua i ta ’na tamaiti e mauiui ra i nia i te pou haamauiuiraa. Tei reira atoa te aposetolo Ioane i tera taime e ua papai maite oia i tei tupu. Ua faaea noa Maria i pihai iho i “te satauro o Iesu.” Eita hoê noa ’‘e e nehenehe e faaatea ê i teie metua vahine taiva ore e î i te here i ta ’na tamaiti i tera taime hopea roa. Ua hi‘o Iesu ia ’na e noa ’tu e mea mauiui roa, ua huti oia i te aho e toe ra ia ’na e ua paraparau. Ua ani oia i ta ’na aposetolo here ra o Ioane ia haapao i to ’na mama. I te mea e aita to ’na mau taeae i faatupu atura i te faaroo, aita Iesu i tiaturi i te tahi noa ’‘e o ratou, maori râ i ta ’na pǐpǐ taiva ore. Ua faaite mau Iesu i te faufaaraa no te hoê taata e faatupu ra i te faaroo ia haapao i to to ’na utuafare, i to ratou iho â râ mau taairaa e te Atua.—Ioane 19:25-27.

I te taime a pohe ai Iesu, ua ite Maria i te mauiui mai te huru ra e ua patiahia oia i te ‘o‘e mai tei tohuhia mea maoro a‘enei. Eita paha tatou e nehenehe e faataa mau i to ’na huru e mauiui i tera taime, eaha ’tu â ïa te parau i to ’na oaoa rahi a ite ai i te semeio rahi roa ’‘e e toru mahana i muri a‘e, te tia-faahou-raa o Iesu! Ua oaoa ’tu â o ’na a fa ’i Iesu i to ’na taeae Iakobo na mua. (Korinetia 1, 15:7) Ua putapû roa Iakobo e te tahi atu o te mau taeae o Iesu i te farereiraa ia ’na. I muri a‘e, te itehia ra e ua tiaturi ratou e o Iesu te Mesia. Aita i maoro, ua haere e to ratou metua vahine i te putuputuraa e ua “tamau maite atura ratou atoa i te pure.” (Ohipa 1:14) E piti o ratou, tei papai i muri a‘e i te tahi buka o te Bibilia, o Iakobo ïa e Iuda.

Ua oaoa roa Maria i te ite i te tahi atu o ta ’na mau tamaiti ia riro ei Kerisetiano taiva ore

Ua faahitihia te parau hopea no Maria a pure ai oia e ta ’na mau tamaiti i te putuputuraa. Auê parau hopea faahiahia mau no Maria, e hi‘oraa maitai atoa hoi ta ’na i vaiiho mai! Maoti to ’na faaroo, ua nehenehe oia e faaoromai i te mauiui o te patia ‘o‘e e ua fana‘o i muri a‘e i te haamaitairaa hanahana mau. Ia pee tatou i to ’na faaroo, e faaoromai atoa tatou i te mau mauiui atoa i roto i teie nei ao e e fana‘o atoa i te mau haamaitairaa faahiahia mau.

^ par. 8 I muri a‘e i te faatiaraa o tei tupu i te 12raa o to Iesu matahiti, aita te parau no Iosepha e faahiti-faahou-hia i roto i te mau evanelia. I muri a‘e, te vai ra te faatiaraa no te metua vahine o Iesu e te tahi atu o ta ’na mau tamarii, aita râ no Iosepha. I pii-noa-hia na Iesu “te tamaiti a Maria” eiaha râ a Iosepha.—Mareko 6:3.

^ par. 16 E ere iho â Iosepha te metua tane mau o Iesu, ua riro râ ta ’na mau tamarii ei taeae e ei tuahine no Iesu.—Mataio 1:20.