Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TIURAI 2014

 APARAURAA E TE HOÊ ITE NO IEHOVA

Te tiaturi ra anei te mau Ite no Iehova ia Iesu?

Te tiaturi ra anei te mau Ite no Iehova ia Iesu?

Teie te tahi hoho‘a aparauraa e te hoê Ite no Iehova. A feruri na e e Ite no Iehova Anthony e te farerei ra o ’na ia Tim i to ’na fare.

MEA FAUFAA ROA IA TIATURI IA IESU

Anthony: Iaorana Tim, te oaoa nei au i te farerei faahou ia oe.

Tim: Te oaoa atoa nei au i te farerei ia oe.

Anthony: Ua afai mai au i Te Pare Tiairaa e A ara mai na! apî na oe. I to ’u mana‘o, e au roa oe i te mau tumu parau i roto i teie na vea.

Tim: Mauruuru. Te oaoa nei au i to oe tere i teie mahana, e uiraa pai ta ’u.

Anthony: A ui mai na.

Tim: I te tahi mahana, ua paraparau vau i te hoê hoa ohipa e ua faaite atu vau e mea au roa na ’u e taio i ta outou mau papai. Ua na ô mai oia e eiaha e taio i te reira no te mea aita te mau Ite no Iehova e tiaturi ra ia Iesu. Tera iho â? Ua pahono vau ia ’na e e ani vau ia ho‘i faahou mai oe e farerei ia ’u.

Anthony: Mauruuru no ta oe uiraa. Mea au pai e ua ani iho â oe i te hoê Ite no Iehova, eiaha râ i te tahi atu. Ia hinaaro oe e ite i te tiaturiraa a te tahi taata, te ravea maitai a‘e, e ui ïa oe ia ’na, e ere anei?

Tim: Tera atoa to ’u mana‘o.

Anthony: Teie te parau mau. O te mau Ite no Iehova te feia e tiaturi roa ia Iesu. No matou, e mea faufaa roa ia faatupu i te faaroo ia Iesu no te ora.

Tim: Ua papu iho â ia ’u. Tera râ i to ’na parauraa mai e aita outou e tiaturi ra ia Iesu, feruri a‘era vau, aita tâua i tauaparau no tera tumu parau na mua ’‘e.

Anthony: E hinaaro paha oe ia faaite atu vau te tahi mau irava Bibilia e haapapu ra i te faufaaraa ia faatupu i te faaroo ia Iesu? Teie te tahi mau irava ta te mau Ite no Iehova e faaohipa pinepine no te poro i te taata.

Tim: Na reira ïa.

Anthony: Na mua roa, e hi‘o ana‘e i ta Iesu iho i parau i roto i te Ioane 14:6. Te tauaparau ra Iesu e te tahi o ta ’na aposetolo. Ua papaihia: “Ua parau atura Iesu ia ’na, O vau te e‘a, e te parau mau, e te ora, aore roa e taata e tae i te Metua ra, maori râ ei ia ’u.” Ia au i teie irava, maoti o vai e nehenehe ai te taata e haafatata ’tu i te Metua?

Tim: Maoti Iesu.

Anthony: Tera e te tiaturi papu nei te mau Ite no Iehova e o ’na ana‘e te ravea. I to oe mana‘o, ia au i ta oe i ite no nia i te mau titauraa a te Atua, e mea tia ia pure na roto ia vai?

Tim: Na roto i te i‘oa o Iesu.

Anthony: No reira ïa i roto i ta ’u mau pure atoa, e pûpû vau i te reira i te Atua na roto ia Iesu. E mai tera te mau pure a te mau Ite no Iehova atoa.

Tim: Mea au roa ia ite i te reira.

Anthony: E hi‘opoa ana‘e atoa i te Ioane 3:16. Mea faufaa roa tera irava. Ahiri e nehenehe  ta oe e haapoto i tei papaihia no nia i te oraraa o Iesu i te fenua nei e ta ’na taviniraa, teie te irava e tano maitai. E hinaaro anei oe e taio?

Tim: E, te na ô ra: “I aroha mai te Atua i to te ao, e ua tae roa i te horoa mai i ta ’na Tamaiti fanau tahi, ia ore ia pohe te faaroo ia ’na ra, ia roaa râ te ora mure ore.”

Anthony: Mauruuru, ua ite a‘enei oe i teie irava?

Tim: E, mea pinepine au i te faaroo i te reira i ta matou fare pure.

Anthony: Mea matau roa te taata i teie irava. Ia hi‘o maitai tâua, ua parau Iesu e no to te Atua here e nehenehe ai te taata e fana‘o i te ora mure ore. Eaha râ te tia ia rave?

Tim: Ia faatupu i te faaroo.

Anthony: Tera. Ia faatupu iho â râ i te faaroo i ta ’na Tamaiti fanau tahi o Iesu Mesia. Te matara maitai ra tera mana‘o i te api 2 o te vea ta ’u i horoa ’tu. I roto i Te Pare Tiairaa, te parauhia ra no tera vea “te faaitoito atoa ra ia faatupu i te faaroo ia Iesu Mesia, o tei pohe ia nehenehe tatou e fana‘o i te ora mure ore e o te faatere nei ei Arii o te Basileia o te Atua.”

Tim: Ua haapapu-roa-hia ïa i roto i ta outou mau vea e te tiaturi ra te mau Ite no Iehova ia Iesu.

Anthony: E.

Tim: No te aha ïa te taata e parau e e aita outou e tiaturi ia Iesu?

Anthony: E rave rau tumu. I te tahi taime, ua faaroo noa ratou i ta vera ma e parau ra aore ra i ta to ratou mau tia haapaoraa i haapii atu.

Tim: Ia feruri au, peneia‘e e na reira vetahi no te mea e te parau ra outou e e Ite outou no Iehova eiaha râ no Iesu.

Anthony: Peneia‘e, tera te tahi tumu.

Tim: No te aha outou e paraparau noa ’i no Iehova?

‘UA FAAITE AU I TO OE I‘OA’

Anthony: Te tahi tumu no te mea ua na reira Iesu te tamaiti a Iehova. E hi‘o ana‘e i ta Iesu i parau a pure ai oia i to ’na Metua. Tei roto ïa i te Ioane 17:26. E taio mai na oe i tera irava.

Tim: Te na ô ra: “E ua faaite atu hoi au ia ratou, e e faaite atu â vau, i to oe i‘oa, ia herehia mai ratou i to hereraa mai ia ’u nei ra, e o vau hoi e parahi i roto ia ratou.”

Anthony: Mauruuru. Te ite ra oe e ua parau Iesu e ua faaite oia i te i‘oa o te Atua. I to oe mana‘o, no te aha oia i na reira ’i?

Tim: Aita vau e papu ra no te aha.

E mea faufaa roa ia faatupu i te faaroo ia Iesu no te ora

Anthony: Te haamana‘o ra vau i te tahi atu irava o te tauturu mai ia maramarama. E rave mai na i te Roma 10:13 o te na ô ra: “O te tiaoro atoa hoi i te i‘oa o Iehova ra, e hope roa ïa i te ora.” Te haapapuhia ra e e mea faufaa ia faaite i te i‘oa o Iehova no te ora. I to oe mana‘o, aita anei Iesu i ite i te reira?

Tim: Mea papu e oia.

Anthony: Ua ite Iesu e e mea faufaa te reira no te ora. No reira oia i faaite ai i ta ’na mau pǐpǐ i te i‘oa o te Atua a faaitoito atu ai ia faahiti i te reira. Tera te tahi tumu matou e paraparau noa ’i no Iehova. E mea faufaa no matou ia faaite i to te Atua i‘oa e ia tauturu ia vetahi ê ia faahiti i tera i‘oa.

Tim: Tera râ, noa ’tu e aita te taata i ite aore ra i faahiti i to ’na i‘oa, te mana‘o ra ratou i te Atua.

Anthony: Peneia‘e. Ma te faaite mai râ i to ’na i‘oa, ua ite te Atua e e mea ohie a‘e no tatou ia haafatata ’tu ia ’na.

Tim: Eaha ïa ta oe e hinaaro ra e parau?

 Anthony: A feruri na. E ere paha i te mea faufaa ia ite e o Mose te i‘oa o te taata i vahi i te miti Uteute aore ra ua horoahia ia ’na na Ture ahuru. E no Noa, te taata i hamani i te araka e ua faaora i to ’na utuafare e te animara. E no Iesu, te taata i pou mai mai te ra‘i mai e ua pohe no ta tatou mau hara.

Tim: E.

Anthony: Ua hinaaro râ te Atua ia ite tatou i to ratou mau i‘oa. E mea au a‘e iho â pai! Ma te faahiti noa i to ratou i‘oa, ua taa ia tatou i ta ratou i rave na.

Tim: Aita vau i feruri a‘enei mai tera. E mana‘o tano roa!

Anthony: Te vai ra te tahi atu tumu e faaite ai te mau Ite no Iehova i to te Atua i‘oa. Te hinaaro nei matou ia faatupu te taata i te faaroo i te Atua ra o Iehova a haafatata ’tu ai ia ’na. Mea faufaa atoa râ no matou ia ite te taata e maoti Iesu e faaorahia ’i tatou. Peneia‘e, e nehenehe tâua e taio i te tahi atu irava e haapapu ra i tera mana‘o.

Tim: E.

Anthony: A haamana‘o na. Ua taio tâua e ua parau Iesu i roto i te Ioane 14:6 e o ’na “te e‘a, e te parau mau, e te ora.” E hi‘o ana‘e i te mau irava i nia noa ’tu, i roto i te Ioane 14:1. E hinaaro anei oe e taio i te tuhaa hopea o tera irava no te ite i ta Iesu i parau?

Tim: E, te na ô ra: “E faaroo i te Atua, e e faaroo atoa mai hoi ia ’u.”

Anthony: Mauruuru. I to oe mana‘o, mea faufaa anei te faaroo? Te faaroo ia Iesu aore ra ia Iehova?

Tim: Ua parau Iesu te faaroo ia raua toopiti.

Anthony: Mea papu. Ua taa iho â ïa ia oe eita e navai ia parau e e faaroo to tatou i te Atua e ia Iesu! E mea titauhia ia faaite i te reira i roto i to tatou oraraa.

Tim: Parau mau roa!

Anthony: E nafea ïa ia faaite e ua faatupu mau tatou i te faaroo i te Atua e ia Iesu? E nehenehe anei tâua e tauaparau i te reira i te tahi atu mahana? *

Tim: A e!

E uiraa ê anei ta oe no nia i te tahi tumu parau Bibilia? E hinaaro anei oe e ite atu â i te mau tiaturiraa a te mau Ite no Iehova? Mai te peu e e, eiaha e taiâ i te ui. E oaoa roa ratou i te aparau e oe

^ par. 60 No te ite atu â, a hi‘o i te pene 12 o te buka Eaha ta te Bibilia e haapii mau ra? piahia e te mau Ite no Iehova.

No te ite atu â

E ora ana‘e ma te auhia e te Atua

E nehenehe e ora ma te auhia e Iehova. Inaha, e nehenehe oe e riro ei hoa no ’na.