Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Mati 2014

 TAUAPARAURAA E TE ITE NO IEHOVA

No te aha te Atua e vaiiho ai ia mauiui tatou?

No te aha te Atua e vaiiho ai ia mauiui tatou?

Teie te tahi hoho‘a tauaparauraa e te mau Ite no Iehova. A feruri na e e Ite no Iehova Michelle e te farerei ra o ’na ia Sophia.

TE TÂU‘A MAIRA ANEI TE ATUA IA MAUIUI TATOU?

Michelle: Iaorana Sophia. Oaoa roa vau i te farerei ia oe.

Sophia: O vau atoa.

Michelle: Ua tauaparau a‘enei tâua i tera mahana ra e te tâu‘a maira anei te Atua ia mauiui tatou. * Ua faaite mai oe e ua feruri oe i tera uiraa. I te taime iho â râ a pepe ai to oe mama i te tahi ati purumu. Eaha ’tura to ’na huru?

Sophia: Te vai ra iho â te tahi mau mahana, mea maitai e te tahi atu eita. I teie mahana, mea maitai roa.

Michelle: Mea oaoa roa ïa. Mea itoito mau oe i roto i tera tupuraa!

Sophia: Oia mau. I te tahi taime, e feruri au, e faaoromai o ’na i te reira ehia maororaa?

Michelle: E mana‘o iho â oe mai tera. Te haamana‘o ra oe i ta tâua tauaparauraa matamua? Ua hiti mai te uiraa no te aha te Atua e vaiiho ai i te taata ia mauiui i te mea e e nehenehe ta ’Na e faaore i te reira.

Sophia: E, te haamana‘o ra vau.

Michelle: Hou a hi‘o ai i ta te Bibilia pahonoraa, e faahiti faahou na tâua i te mau mana‘o i tauaparauhia i tera mahana.

Sophia: Na reira.

Michelle: Na mua, ua haapii tâua e ua uiui ê na te tahi taata taiva ore i te Atua no te aha o ’na e vaiiho ai i te taata ia mauiui. Aita roa te Atua i tama‘i atu no ta ’na uiraa. Ua faaitoito atu râ ia rahi atu â to ’na faaroo.

Sophia: E, e mana‘o apî te reira no ’u.

Michelle: Ua ite atoa tâua e eita te Atua e au ia mauiui tatou. A mauiui ai to ’na nunaa, te na ô ra te Bibilia: “Aroha ’tura to ’na aau i te pohe rahi o Iseraela.” * E ere anei i te mea tamahanahana ia ite e te tâu‘a maira te Atua ia mauiui tatou?

Sophia: Oia.

Michelle: I muri a‘e, ua farii atoa oe e e puai rahi to to tatou Atua poiete e e nehenehe o ’na e faaore i te mauiui i te taime ta ’na i faaoti.

Sophia: Tera ta ’u e ore e taa ra. I te mea e e nehenehe o ’na e faaore i te mauiui, no te aha ïa o ’na e vaiiho ai ia tupu te reira?

O VAI TE FAAITE RA I TE PARAU MAU?

Michelle: E pahono ana‘e i ta oe uiraa ma te rave i te Genese, te buka matamua o te Bibilia.  Ua ite anei oe i te faatiaraa no nia ia Adamu, Eva e te maa opanihia?

Sophia: E, ua haapii au i tera aamu i te haapiiraa Tapati. Ua parau te Atua eiaha ia amu i te reira, aita râ raua i faaroo.

Michelle: Tera. Teie nei, e hi‘o ana‘e i tei turai ia Adamu raua Eva ia hara. Ia ite oe i tei tupu, e taa ïa oe i te tumu tatou e mauiui ai. E taio mai na oe i te Genese pene 3, irava 1 e tae atu i te 5.

Sophia: Te na ô ra: “E paari rahi to te ophi i to te mau manu avae maha atoa o te fenua, i ta te Atua ra ta Iehova i hamani ra; e ua na ô maira oia i te vahine, Oia ïa, ua parau mai te Atua e, Eiaha orua e amu i to te mau raau atoa o te ô nei? Ua parau atura te vahine i taua ophi ra, E amu mâua i to te mau raau atoa o te ô nei; maori râ o to taua raau i ropu i te ô nei, ua parau mai ïa te Atua e, Eiaha orua e amu i to reira; eiaha hoi orua e rave noa ’tu; a pohe orua. Ua parau maira taua ophi ra i te vahine, E ore roa orua e pohe: ua ite hoi te Atua e, ua amu ana‘e orua i to reira, e araara ïa to orua mata, e e riro orua mai te atua ra te huru, i te ite i te maitai e te ino.”

Michelle: Mauruuru. E hi‘opoa maite ana‘e tera mau irava. Na mua, ua paraparau te ophi ia Eva. Te faaite ra te tahi atu buka o te Bibilia e o Satani te Diabolo tei faaohipa i te ophi no te paraparau atu. * Ua ani Satani ia Eva i ta te Atua faaueraa no te tahi raau. Ua tapao anei oe i ta te Atua i parau ia amu Adamu e Eva i to tera raau?

Sophia: E pohe raua.

Michelle: Tera. I muri iho, e pariraa rahi ta Satani i te Atua. A hi‘o na i ta ’na i parau: “E ore roa orua e pohe.” Te na ô ra ïa Satani e ua haavare te Atua!

Sophia: Aita vau i haapao a‘enei i te reira.

Michelle: E titauhia ïa te taime no te faaafaro i tera fifi. Ua ite anei oe no te aha?

Sophia: Aita vau e papu ra.

Michelle: E taa paha oe i teie faahoho‘araa. A feruri na e i te tahi mahana, e parau atu vau e o vau te mea puai a‘e ia oe. E nafea oe e haapapu ai e ua hape vau?

Sophia: E hinaaro ïa vau e ite i to oe puai.

Michelle: Tera. E ani mai paha oe ia amo i te tahi mea teiaha. I tera ra iho â taime e itehia ’i o vai te mea puai a‘e i roto ia tâua.

Sophia: Te taa ’tura.

Michelle: E ia parau atu vau: O vau te taata maitai a‘e ia oe? Mea taa ê roa ïa, e ere anei?

Sophia: E.

Michelle: Eita te pahonoraa i tera uiraa e ite-oioi-hia?

Sophia: Eita iho â.

Michelle: E titauhia te taime no te ite o vai te taata maitai i roto ia tâua.

Sophia: E mea tano.

Michelle: I teie nei, e hi‘o faahou ana‘e i tei faatiahia i roto i te Genese. Ua parau anei Satani e o ’na te mea puai a‘e i te Atua?

Sophia: Aita.

Michelle: E nehenehe hoi ta te Atua e haapapu oioi atu e ua hape o ’na! Ua na ô râ Satani e o ’na te mea maitai a‘e i te Atua. Ua parau ïa ia Eva, “Te haavare ra te Atua, o vau râ, te faaite atu ra ïa i te parau mau.”

Sophia: Mea anaanatae tera mana‘o.

Michelle: Ma te paari, ua ite te Atua e nafea tera fifi e faaafaro-maitai-hia ’i. Na te tau ïa e haapapu mai e o vai tei faaite i te parau mau e tei haavare.

TE TAHI PARIRAA RAHI

Sophia: Aita anei te poheraa o Eva e haapapu ra e o te Atua tei faaite i te parau mau?

Michelle: Oia. Tera râ te vai ra ’tu â ta Satani  pariraa. A hi‘o faahou na i te irava 5. Eaha ta Satani i parau atoa ia Eva?

Sophia: Ia amu o ’na i tera maa, e araara to ’na mata.

Michelle: Tera, e e riro oia “mai te atua ra te huru, i te ite i te maitai e te ino.” Te na ô ra ïa Satani e te faaere ra te Atua i te mea maitai i te huitaata.

Sophia: Te taa ’tura.

Michelle: E pariraa rahi atoa tera.

Sophia: Eaha ta oe e hinaaro ra e parau?

Michelle: Mai te huru e ua parau Satani e e oaoa a‘e Eva, e te huitaata atoa ïa, ia ore te Atua e faatere ia ratou. Ua ite atoa Iehova eaha te ravea maitai roa ’‘e no te faaafaro i tera fifi. Ua vaiiho ïa ia Satani ia faatere i teie nei ao tau taime. I muri a‘e e papuhia ’i e mea tano anei ta ’na i parau. No reira tatou e ite ai i te mauiui rahi i teie mahana. No te mea o Satani te faatere o teie nei ao eiaha râ te Atua. * Te vai ra râ te tahi parau apî oaoa.

Sophia: Eaha te reira?

Michelle: Te haapii ra te Bibilia e piti pue parau mau faahiahia no nia i te Atua. A tahi, te tâu‘a maira Iehova ia mauiui tatou. A hi‘o na i ta te arii Davida i papai i roto i te Salamo 31:7. Mea rahi te fifi ta Davida i faaruru, a hi‘o na râ i ta ’na i parau a pure ai i te Atua. A taio mai na tera irava.

Sophia: Te na ô ra: “E mauruuru vau i to oe ra aroha; i hi‘o na hoi oe i to ’u atiraa, e ua ite mai oe i tau varua i te mau ati no ’u nei.”

Michelle: Noa ’tu te mau fifi, ua tiaturi Davida e te ite maira Iehova i te mau mea atoa ta ’na e faaruru ra. I teie atoa mahana, te ite ra Iehova i te mau ohipa atoa e tupu ra e tae noa ’tu i to oe mau mana‘o hohonu ta vetahi ê e ore e taa. Eita anei te reira e tamahanahana ia oe?

Sophia: Oia.

Michelle: Te tahi atu parau mau faahiahia, ua faataa Iehova i te taime no te faaore i te mauiui. Te haapii ra te Bibilia e fatata roa o ’na i te faaore i ta Satani faatereraa ino. E faaore roa oia i te mau mea ino atoa, oia atoa te mauiui ta oe e ta to oe mama e faaruru nei. E nehenehe paha ïa vau e ho‘i faahou mai no te faaite atu e nafea e papu ai e e faaore roa te Atua i te mau mauiui atoa? *

Sophia: Na reira ïa.

E uiraa ê anei ta oe no nia i te tahi tumu parau Bibilia? E hinaaro anei oe e ite atu â no nia i te mau tiaturiraa aore ra haapiiraa a te mau Ite no Iehova? Mai te peu e e, eiaha e taiâ i te ui atu. E oaoa roa ratou i te tauaparau e oe.

^ par. 7 A hi‘o i te tumu parau “Te tahi tauaparauraa e te hoê Ite no Iehova” i roto i Te Pare Tiairaa Tetepa – Atopa 2013.

^ par. 17 A hi‘o i Te mau tavana 10:16.

^ par. 26 A hi‘o i te Apokalupo 12:9.

^ par. 61 No te ite atu â, a hi‘o i te pene 9 o te buka Eaha ta te Bibilia e haapii mau ra? piahia e te mau Ite no Iehova.

No te ite atu â

EAHA TA TE BIBILIA E HAAPII MAU RA?

Te ora ra anei tatou i te “anotau hopea”?

Hi‘o e nafea te mau ohipa e haerea ta tatou e ite nei e haapapu ai e te ora nei tatou i te “anotau hopea” ta te Bibilia i tohu.