Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2014

 TUMU PARAU MATAMUA | TE POHE, TE HOPEA ANEI O TE MAU MEA ATOA?

Eita te taata e hinaaro e pohe

Eita te taata e hinaaro e pohe

QIN SHI HUANGDI, ARII TINITO

PONCE DE LEÓN, TAATA MAIMI I TE FENUA APÎ

E enemi puai roa te pohe, ua rau ïa ta te taata raveraa no te ora e a muri noa ’tu. E mauiui iho â tatou ia pohe tei herehia e tatou. I te apîraa, eita paha tatou e mana‘o e pohe. E moemoeâ noa râ te reira!

Ua hinaaro te mau arii no Aiphiti e ora noa i muri a‘e i te pohe. Ua faaohipa ratou e tausani taata no te imi i te ravea no te ora maoro atu â. E paturaa rahi ta ratou no te tuu i te mau tino pohe o te hui arii ia vai maoro te reira. Ua mana‘o e e nehenehe faahou ratou e rave i tera mau tino, ua ino râ te reira. Aita ïa ta ratou opuaraa i manuïa.

Ua tamata atoa te mau arii Tinito i te tahi atu mau ravea no te ora e a muri noa ’tu. Ua ani te arii Qin Shi Huangdi i to ’na mau taata ia hamani i te tahi raau taa ê no te ore e pohe. Ua faaohipa râ ratou e rave rahi raau taero e e au ra e ua pohe te arii a inu ai i te tahi o tera mau raau.

E taata maimi i te fenua apî Juan Ponce de León. I 1513, ua tere oia i te mau motu i Antilles no te maimi i te vahi o te pape pihaa e nehenehe ai te taata e apî noa. Ua tapae oia i te tuhaa fenua Floride, ua pohe râ i muri a‘e i te hoê aroraa e te mau taata tumu no Marite. Aita ïa te vahi o tera pape pihaa i itehia a‘e.

Ua hinaaro ïa te mau arii Aiphiti, Tinito e taata maimi i te fenua apî e ora e a muri noa ’tu. E ere paha ta ratou mau raveraa i te mea au, e opuaraa maitai râ. Te hinaaro ra hoi tatou paatoa e ora noa, e ere anei?

E FAAOREHIA ANEI TE POHE?

No te aha tatou e ore ai e hinaaro e pohe? Te faataa ra te Parau a te Atua i te tumu. No to tatou Atua poiete ra o Iehova *, te na ô ra te Bibilia: “Ua faanehenehe oia i te mau mea atoa i te tau mau ra, e ua tuu oia i te mana‘o [“o te tau otia ore,” Traduction du monde nouveau] i roto i [te  aau o te taata].” (Koheleta 3:11) E hinaaro tatou e oaoa i te oraraa i te fenua nei e a muri noa ’tu, eiaha râ e 80 matahiti noa. (Salamo 90:10) Tera te hinaaro o to tatou aau.

No te aha te Atua i tuu ai i te tau otia ore i roto i to tatou aau? No te haamauiui anei ia tatou? Aita roa ’tu! Te fafau maira te Atua e fatata roa te pohe i te faaorehia. E pinepine te Bibilia i te faahiti i te reira, oia atoa i te parau fafau a te Atua no nia i te ora mure ore.—A hi‘o i te tumu parau tarenihia,  “E faaorehia te pohe.”

Ma te papu, ua na ô Iesu Mesia: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Te vai ra ïa te ravea no te faaore i te pohe. Ua haapapu râ Iesu e o te Atua ana‘e te nehenehe e rave i te reira.

^ par. 9 O Iehova te i‘oa o te Atua i roto i te Bibilia.