Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA NOVEMA 2013

 UA TAUI TE BIBILIA I TO ’U ORARAA

“Mea rahi te taata i ore i au ia ’u”

“Mea rahi te taata i ore i au ia ’u”
  • MATAHITI FANAURAA: 1978

  • FENUA: TIRENI

  • AAMU: TAATA INO ROA

NA MUA ’‘E:

Ua paari au i Santiago, te oire rahi o Tireni, i te tahi vahi e mea matauhia te ohipa ino, te raau taero e te mau pǔpǔ taata hamani ino. A pae ai to ’u matahiti, ua haapohehia to ’u metua tane. I muri a‘e, ua faaea mama e te tahi taata ino mau. E pinepine oia i te taparahi ia matou. Tau matahiti i muri a‘e, ua haamana‘o noa vau i te reira.

A paari noa ’i au, ua taui to ’u huru a riro roa ’i ei taata ino mau. E faaroo na vau te pehe heavy metal, e inu hua na i te ava e i te tahi taime e rave atoa i te raau taero. E pinepine au i te apiti i te mau aroraa e te feia hoo raau taero i roto i te mau aroâ. E rave rahi taime to tera mau taata i te tamataraa i te haapohe ia ’u. I te tahi mahana, ua aufau te pǔpǔ enemi i te hoê taata no te haapohe ia ’u. Ua horo ê au, ua pepe atoa râ. I te tahi atu taime, ua tuu te hoê pǔpǔ taata hoo raau taero i te pupuhi i nia i to ’u upoo ma te hinaaro e haapohe ia ’u.

I 1996, ua here mau vau i te tahi vahine o Carolina te i‘oa e i 1998, ua faaipoipo ia ’na. No to ’u huru ino mau, a fanau ai ta maua tamarii matamua, ua riaria vau i te hamani ino i to ’u utuafare a riro atu ai mai te tane apî a to ’u metua vahine. Ua haere au i te tahi pu e tauturu ra i te taata ia ora e vetahi ê. Ua rapaauhia vau e te taote e ua rave i te raau, aita râ i apî mai. E pinepine au i te riri hanoa no te mau mea iti haihai; eita ta ’u e nehenehe e haavî ia ’u. Ma te hape, ua opua vau i te haapohe ia ’u ia ore to ’u utuafare ia mauiui faahou. Aua‘e, aita te reira i manuïa.

E rave rahi matahiti, ua farii au e aita te Atua e vai mau ra noa ’tu e ua hinaaro noa na vau e tiaturi atu. No reira, i apiti na vau i te tahi taime i te hoê haapaoraa. Ta ’u râ vahine, ua haapii ïa i te Bibilia e te mau Ite no Iehova. Mea au ore roa na ’u ia ratou, e pinepine au i te parau faufau atu. Ua maere au e e vai hau noa ratou.

I te tahi mahana, ua ani mai Carolina ia taio i te Salamo 83:18 i roto i ta ’u Bibilia. Te faaite maitai ra tera irava e o  Iehova te i‘oa o te Atua. Ua huru ê au a taa ’i e ua haapii mai ta ’u haapaoraa no nia i te hoê atua eiaha râ no nia ia Iehova. I 2000, ua haamata vau i te haapii i te Bibilia e te mau Ite no Iehova.

UA TAUI TE BIBILIA I TO ’U ORARAA:

I muri a‘e, ua itea ia ’u i te tamahanahanaraa a haapii ai e e Atua aroha rahi Iehova e te faaore i te hapa. Te faaite ra iho â te Bibilia i roto i te Exodo 34:6, 7: “O Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ’tu te ui; e te faaore i te parau-tia ore, e te hara, e te ino.”

Ua itea ia ’u i te tamahanahanaraa a haapii ai e e Atua aroha rahi Iehova e te faaore i te hapa

E ere râ i te mea ohie ia faaohipa i ta ’u e haapii ra. Ua mana‘o na vau e eita roa ta ’u e nehenehe e haavî i to ’u huru ino. I te taime fifi, ma te here, e faaitoito mai Carolina. E haamana‘o mai oia e te ite ra Iehova i ta ’u mau tutavaraa. No te turu o ta ’u vahine, ua itoitohia vau i te rave noa i ta Iehova e au noa ’tu e i mana‘o na vau e eita vau e taui.

I te tahi mahana, ua ani mai te taeae e haapii ra ia ’u, Alejandro, ia taio i te Galatia 5:22, 23. Te faaite ra tera na irava e o ‘te here, te oaoa, te hau, te faaoromai, te mǎrû, te maitai, te faaroo. Te mamahu, te hitahita ore’ te hotu o te varua mo‘a o te Atua. Ua faataa mai Alejandro e eita e tia ia ’u ia faatupu i tera mau huru maitatai ma to ’u noa puai ma te turu râ o te varua mo‘a o te Atua. Ua taui roa vau a taa ’i i tera parau mau!

I muri a‘e, ua haere au i te tahi tairururaa rahi a te mau Ite no Iehova. Ua ite au i te naho, te hoê vahi mâ e te auhoêraa. Na te reira i haapapu mai e ua itea ia ’u i te haapaoraa mau. (Ioane 13:34, 35) Ua bapetizohia vau i Fepuare 2001.

TO ’U FAUFAARAAHIA:

Ua taui roa Iehova ia ’u. Na mua ’‘e, e taata ino roa, i teie nei, e taata hau. No ’u, e au e ua huti mai Iehova ia ’u mai roto mai i te vari. Mea rahi te taata i ore i au ia ’u, aita vau e faahapa ’tura. I teie nei râ, ma te hau, te oaoa nei au i te tavini ia Iehova e ta ’u vahine e ta maua na tamaroa e piti.

Ua maere roa to ’u fetii e hoa e ua taui au. E rave rahi o ratou tei hinaaro e haapii i te parau mau no roto mai i te Bibilia. Te mauruuru nei au i te fana‘oraa taa ê e tauturu ia vetahi ê ia ite o vai Iehova. Auê te oaoa ia taui te parau mau i te oraraa o te taata!