Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA NOVEMA 2013

 TUMU PARAU MATAMUA | EAHA TE POROI O TE BIBILIA?

Te parau apî oaoa no te huitaata

Te parau apî oaoa no te huitaata

Ua haapuai to Iesu tia-faahou-raa i te faaroo o ta ’na mau pǐpǐ a itoito roa ’i ratou. A tere ai na Asia Iti e Mediteranea, ua faanaho te aposetolo Paulo i te ohipa a te mau amuiraa. Ua faaitoito atoa i te mau Kerisetiano ia tapea i te taiva ore noa ’tu te mau faainoraa e patoiraa u‘ana. Noa ’tu tera mau fifi, ua ruperupe noa te ohipa a te mau amuiraa a riro atu ai e rave rahi taata ei Kerisetiano.

Noa ’tu e ua tuuhia Paulo i te fare tapearaa, ua papai oia i te mau rata no te faaitoito e a‘o i te mau amuiraa Kerisetiano. Ua faaara atoa ’tu e e tupu te tahi fifi atâta, te ohipa apotata. Ma te aratai a te varua mo‘a o te Atua, ua faaite Paulo e e ô atu te “urî taehae roa” i rotopu ia ratou ma te haaparare i te “parau pi‘o, ia peehia ratou e te pǐpǐ.”—Ohipa 20:29, 30.

Ua haamata tera ohipa apotata i te hopea o te senekele matamua. Ua faaite râ Iesu tei tia faahou mai i te tahi faatiaraa taipe o te tau no a muri a‘e i te aposetolo Ioane. Ta tatou ïa e ite i roto i te buka Apokalupo. Ia au i ta ’na i papai, noa ’tu te mau enemi e orometua haavare, e faatupu iho â te Atua i ta ’na opuaraa no te fenua e te huitaata. E faaroo to “te mau fenua atoa, e te mau opu atoa, e te mau reo atoa, e te mau nunaa atoa” i te parau apî oaoa no nia i te Basileia o te Atua. (Apokalupo 14:6) E riro faahou te fenua nei ei paradaiso. E nehenehe te feia atoa e rave i te hinaaro o te Atua e ora ’tu i roto!

No oe, e parau apî oaoa anei tera? Mai te peu e e, a haapii i te Bibilia no te ite atu â no nia i ta te Atua poroi no te huitaata e e nafea oe e faufaahia ’i i te reira i teie nei e a muri a‘e.

E nehenehe oe e taio i te Bibilia i nia www.jw.org. I nia i tera reni, e ite atoa oe i te buka rairai Parau apî oaoa a te Atua, te papai Eaha ta te Bibilia e haapii mau ra? e te tahi atu. I roto, e faataahia ’tu no te aha e buka papu ai te Bibilia e e nafea ia faaohipa i te mau a‘oraa faufaa no to oe maitai e to to utuafare. E nehenehe atoa e ani i te mau Ite no Iehova te tahi atu mau haamaramaramaraa.

Faatiaraa o te Ohipa, Ephesia, Philipi, Kolosa, Philemona, Ioane 1, Apokalupo.