Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA NOVEMA 2013

 E HAAFATATA ’TU I TE ATUA

“O te taata horoa noa ta te Atua e hinaaro”

“O te taata horoa noa ta te Atua e hinaaro”

Ia horoahia ’tu te tahi tao‘a, na te aha e faaoaoa ia oe? No te rahiraa, e oaoa tatou ia ite e na te here i turai i te tahi taata ia horoa mai i te tao‘a eiaha râ no te mea ua faahepohia ’tu. Mea faufaa ïa te tumu tatou e horoa ’i. Te haafaufaa nei iho â te taata i te mana‘o turai, hau roa ’tu â ïa te Atua. E hi‘opoa ana‘e i te mau parau faaurua ta te aposetolo Paulo i faahiti i roto i te Korinetia 2, 9:7.

No te aha Paulo i papai ai i tera mau parau? Ua hinaaro oia e faaitoito i te mau Kerisetiano i Korinetia ia tauturu i to ratou mau taeae riirii i Iudea. Ua faahepo anei o ’na i to Korinetia ia horoa? Aita roa ’tu, ua papai râ: “E horoa te taata atoa i ta ’na i opua i roto i to ’na aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.” E hi‘opoa maite ana‘e i tera a‘oraa.

“Ta ’na i opua i roto i to ’na aau.” Ua faaite Paulo e e horoa te Kerisetiano mau no te mea ua faaoti oia “i roto i to ’na aau” ia na reira. Eita ïa o ’na e mana‘o noa i te mau hinaaro o to ’na mau taeae. Ia au i te tahi aivanaa, te auraa o te ta‘o tumu “opua,” o te “tahi [ïa] mea faaineinehia.” E feruri te hoê Kerisetiano i te mau mea e hinaarohia e to ’na mau taeae a uiui atu ai e nafea ia horoa ’tu i te reira.—Ioane 1, 3:17.

“Eiaha ma te nounou, e mai te mea e no te titau.” Ua faahiti Paulo e piti peu e mea tia ia haapae te Kerisetiano mau, te oreraa e horoa ma te aau tae e te horoaraa na roto i te faahepo. “Eiaha e oto (aore ra mauiui)” te auraa o te parau “nounou” na roto i te reo Heleni. Te faataa ra te tahi papai, i te mana‘o-noa-raa e horoa i te moni, ua mauiui ê na te aau o te taata nounou. No tei faahepohia ia horoa, e na reira oia no te mea noa ua titauhia ’tu. O vai mau na te hinaaro i te tao‘a a te taata nounou e a tei faahepohia?

“O te taata horoa noa ta te Atua e hinaaro.” Ia faaoti te hoê Kerisetiano e horoa, ia na reira oia ma te oaoa, ta Paulo ïa e parau ra. E oaoa iho â te taata tei horoa ma te aau tae. (Ohipa 20:35) Ia hi‘o atu vetahi ê, e ite-maitai-hia to ’na oaoa. Mea tano ia faaohipa i te ta‘o “horoa noa” no te faataa i te aau maitai o te taata e te ohipa ta ’na e rave a pûpû ai i te hoê ô. E haaputapû te taata horoa noa i to tatou aau a faaoaoa ’tu ai i te Atua. Te na ô ra te tahi atu huriraa Bibilia: “Te here nei hoi te Atua i te taata e horoa ma te oaoa.”—Te Faufaa api.

“Te here nei hoi te Atua i te taata e horoa ma te oaoa”

Ei Kerisetiano, eaha te haapii mai i ta Paulo mau parau faaurua? E faaohipa ana‘e i te taime, puai aore ra ta tatou mau faufaa no vetahi ê, te feia iho â râ e faaruru ra i te fifi. No te aha? No te mea ua faaoti e ua hinaaro tatou e na reira. E ere noa tatou te oaoa, o te Atua râ o te ‘hinaaro i te taata horoa noa.’

Taioraa Bibilia

Korinetia 1 e 2