Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Novema 2013

 E HAAFATATA ’TU I TE ATUA

‘Ua faaore Iehova i ta oe hapa’

‘Ua faaore Iehova i ta oe hapa’

Ua haapapu na Edward Herbert, taata tuatapapa Beretane o te senekele 17, i te tumu e hinaaro ai ia faaore mai vetahi ê i ta tatou hapa: I te hoê taime, e ani atu iho â tatou ia na reira atoa mai ratou. (Mataio 7:12) Te vai ra râ te tahi atu tumu. A hi‘o na i ta te aposetolo Paulo i papai: “E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai ta [“Iehova,” Traduction du monde nouveau] atoa i faaore i ta outou na, e na reira atoa outou.”Kolosa 3:13.

No to tatou huru tia ore, e haapepe iho â tatou ia vetahi ê e e na reira atoa mai paha ratou. (Roma 3:23) E nafea ia vai hau noa e vetahi ê? Ma te turu a te Atua, ua a‘o mai Paulo ia faaoromai e ia faaore i te hapa. Te tano noa ra tera a‘oraa i teie mahana noa ’tu e ua papaihia te reira a piti tausani matahiti a‘enei. E hi‘opoa maite ana‘e i ta Paulo i parau.

“E faaoromai te tahi i te tahi.” Ua faaite te tahi buka e e faatupu te mau Kerisetiano i tera huru maitai ia “ineine ratou i te faaoromai i te taata e hapa ’tu aore ra i tei faatupu i te tahi huru ta ratou e au ore.” A na ô ai “te tahi i te tahi,” e ere noa ïa vera ma te tia ia faaoromai mai, o tatou atoa râ. Ma te haamana‘o e e au-ore-hia atoa paha te tahi o to tatou huru, e tutava ana‘e i te faatupu i te hau e vetahi ê. E nafea râ, ia hara te tahi atu ia tatou?

“E faaore te tahi i ta te tahi hapa.” Ia au i te tahi aivanaa, aita te parau Heleni “faaore i te hapa” “e faaohipahia na no te faaoreraa hapa noa . . . no te haafaufaa atoa râ i te hamani maitai ia faaorehia te hapa.” Te na ô ra te tahi atu taata, “e faaho‘i i te hoê mea maitai, fana‘oraa taa ê e faufaa” te auraa atoa o tera parau. E na reirahia ïa ia ineine tatou i te faaore i te hapa noa ’tu e ‘e pariraa ta tatou ia vetahi ê.’ No te aha râ e mea tia ’i ia na reira? No te mea, ia tae i te hoê taime, e hinaaro iho â tatou ia faaore mai vetahi ê i ta tatou hapa.

‘Mai ta Iehova hoi i faaore i ta outou na, e na reira atoa outou.’ Tera te tumu faufaa roa ’‘e e faaore ai tatou i te hapa a vetahi ê: E faaore noa hoi Iehova i ta tatou mau hapa. (Mika 7:18) A feruri na i te haamaitairaa rahi ta Iehova e horoa i te taata hara tatarahapa. Aita iho â ta Iehova e hara. Ua ineine râ oia i te faaore roa i te hara a tei tatarahapa mau ma te ite e eita o ’na e hinaaro i ta ratou faaoreraa hapa. O Iehova te hi‘oraa maitai roa ’‘e i te mea e ua faaore oia i te hara a tei tatarahapa mau!

O Iehova te hi‘oraa maitai roa ’‘e i te mea e ua faaore oia i te hara a tei tatarahapa mau!

No to Iehova hamani maitai, e haafatata ’tu iho â tatou ia ’na a hinaaro atoa ’i e pee i to ’na hi‘oraa. (Ephesia 4:32–5:1) E uiui ana‘e ïa, ‘I te mea e ua faaore mai Iehova i ta ’u hapa ma te hamani maitai rahi, no te aha vau e ore ai e faaore i te hapa a te tahi atu taata tia ore tatarahapa mau?’—Luka 17:3, 4.