Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TIURAI 2013

 UA TAUI TE BIBILIA I TO ’U ORARAA

“I hinaaro na vau e riro ei perepitero”

“I hinaaro na vau e riro ei perepitero”
  • MATAHITI FANAURAA: 1957

  • FENUA: MEHIKO

  • AAMU: PIAHI I TE HAAPIIRAA FAAROO E TAATA IRIA

NA MUA ’‘E:

Ua fanauhia vau i te oire iti o Texcoco. I tera tau, aitâ te mau purumu i tâhia ’tura, e repo puehu ana‘e ïa. I matau na te taata o te mau oire tapiri i te haere mai e hoo i te taihaa faautahia e te asini. E iva tamarii matou, o vau te hitu. Mea veve roa to matou utuafare. E taata tataî tiaa to ’u papa. Mea na reira oia i te aupururaa mai. E hitu râ to ’u matahiti a pohe ai o ’na. Mai reira mai, na to ’u mama i faaitoito i te faatamaa ia matou.

E taata hauti i te fira e faatere i te tahi pǔpǔ himene faaroo to ’u papa ruau. Fatata pauroa te melo o to matou utuafare i te ite i te faata‘i i te upaupa. E vahine himene mama i te fare pure, to ’na taeae, e taata himene e hauti piana ïa. Mea itoito roa matou i roto i te haapaoraa Katolika. A tamarii ai au, i hinaaro na vau e riro ei mitionare. I au atoa na vau i te mau hoho‘a taputô Tapone. Rahi atu â vau i te mataitai i te reira, rahi atu â vau i te iria.

I haere na vau i te hoê fare haapiiraa faaroo i Puebla. Ua hinaaro vau e riro ei perepitero. Tau matahiti râ i muri a‘e, ua huru ê au i te tupu ra i roto i ta ’u haapaoraa. Ua rave te mau tia faaroo i te peu morare ore. Hau atu â, aita ratou e faaohipa ra i ta ratou e haapii ra. Ore roa ’tura to ’u hinaaro e riro ei perepitero.

A tamarii ai au, i hinaaro na vau e riro ei mitionare. I au atoa na vau i te mau hoho‘a taputô Tapone. Riro mai nei au ei taata ino e te iria

Ua faaoti au i te haere i te fare upa i te oire Mehiko.  Noaa mai nei ta ’u parau tuite, faaipoipo atura e riro mai nei ei papa no e maha tamarii. Ua faatamaa vau i to ’u utuafare ma te himene i te fare pure.

Ua fifi ê na to ’u faaipoiporaa. No te pohehae, mea ino roa mâua i nia te tahi i te tahi. I te haamataraa, mea parau ino, i te pae hopea râ, mea tupai roa ïa. I muri a‘e 13 matahiti faaipoiporaa, faaoti atura mâua i te faataa ê a taa roa ’tu ai.

UA TAUI TE BIBILIA I TO ’U ORARAA:

Hou mâua a faataa ê ai, ua farerei au e piti Ite no Iehova tei patoto mai i te fare. Tauaparau atura matou i nia i te Bibilia. No ’u, mea rahi to ’u ite i te pae faaroo. No reira vau i tamata ’i i te haapapu e o raua tei hape. E uiraa paari ta ’u i tuu atu ma te mana‘o e aita e pahonoraa. Ua horoa noa mai râ raua i te mana‘o o te Bibilia. Taa ’tura ia ’u e mea iti roa to ’u ite. A haere mai ai te mau Ite no Iehova i te fare, mea ino roa ta ’u vahine i nia ia ratou. I te hoê â taime, mea ohipa roa vau, ore atura ta ’u haapiiraa.

E pae matahiti i muri a‘e, ua farerei faahou vau i te mau Ite no Iehova. Te faaea ra ïa vau i te tahi atu vahine o Elvira. Mea ohie a‘e no ’u ia haapii tamau i te Bibilia i te mea e aita oia e patoi ra i te mau Ite no Iehova. Tau matahiti râ tei mairi hou to ’u oraraa a taui ai.

Ua ite au e e titauhia ia na reira no te tavini ia Iehova ma te aau atoa. Ua aha ïa vau? Na mua, ua faarue i ta ’u ohipa himene i te fare pure Katolika. Ua imi i te tahi atu toroa no te faatamaa i to ’u utuafare. (Apokalupo 18:4) Te piti, ua faaipoipo mâua Elvira.

O te haavîraa ia ’u iho te mea fifi roa ’tu â. E taata riri hanoa hoi au. E piti râ irava Bibilia tei tauturu mai: te Salamo 11:5 o te faaite ra e mea au ore na Iehova te ino e te Petero 1, 3:7 o te haapii mai ia faatura i ta ’u vahine ia faaroo Iehova i ta ’u mau pure. A feruriruri ai i taua mau irava ra e a ani ai i ta Iehova tauturu, ua nehenehe au e haavî i to ’u riri.

Ua haapii mai te Bibilia ia faatura i ta ’u vahine ia faaroo Iehova i ta ’u mau pure

TO ’U FAUFAARAAHIA:

I teie nei, e oraraa utuafare oaoa to ’u. Te tutava ra vau ia maitai faahou te taairaa e ta ’u mau tamarii no te faaipoiporaa matamua. Te tauturu atoa ra vau i to ’u iho nei utuafare ia puai noa to ratou faaroo.

I to ’u tamariiriiraa, i hinaaro na vau e riro ei perepitero no te tauturu i te taata. I teie mahana, ua itea ia ’u te oaoa mau. Te faatamaa ra vau i to ’u utuafare ma te haapii i te faata‘i i te upaupa. E mauruuru rahi to ’u no to Iehova faaoromairaa ia ’u a nehenehe atu ai au e taui e e riro ei taata maitai!