Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TIURAI 2013

 TUMU PARAU MATAMUA: MEA INO ANEI TE ATUA?

No te aha te rahiraa e parau ai e mea ino te Atua?

No te aha te rahiraa e parau ai e mea ino te Atua?

MEA ino anei te Atua? Mai vetahi, e huru ê paha oe i teie uiraa! No te tahi, tera iho â. Te rahiraa râ te uiui noa ra ïa.

Ua na ô vetahi tei faaruru i te ati natura: “No te aha te Atua e vaiiho ai ia tupu tera mau ati? Aita paha e tâu‘a maira aore ra mea ino iho â o ’na.”

A taio ai i te Bibilia, ua huru ê atoa te tahi atu i te mau aamu mai te diluvi i te tau o Noa. E uiui ïa ratou: ‘No te aha te hoê Atua aroha i haamou ai i te taata atoa? Mea ino anei oia?’

Peneia‘e tera atoa ta oe e uiui ra aore ra aita paha ta oe e pahonoraa. A feruri na ïa i to muri nei uiraa.

NO TE AHA TATOU E AU ORE AI I TE INO?

Mea hinaaro iho â na tatou te parau-tia, area te animara aita ïa. Ua poiete te Atua i te taata ‘ma to ’na huru.’ (Genese 1:27) Eaha te auraa? E nehenehe ïa e faaite i to ’na mau huru maitatai. E tuea atoa to tatou mana‘o i to te Atua no nia i te mea maitai e te mea ino. A feruri na: Mai te peu e mea au ore na te taata te ino eita atoa anei ïa te Atua?

Tera iho â ta te Bibilia e parau ra. Te na ô maira te Atua: “To ’u ra haerea, e teitei ïa i to outou haerea, e to ’u ra mau mana‘o i to outou ra mau mana‘o.” (Isaia 55:9) Ia parihia e mea ino te Atua, aita anei tatou e parau ra e mea teitei a‘e to tatou haerea i to ’na? Hou ïa a na reira ’i, mea maitai ia ite i te tahi pue parau mau. E mea tia ia uiui, no te aha e au ra e mea ino ta te Atua mau haaraa? Na mua, eaha mau na te taata “ino”?

Ia haa te tahi ma te mana‘o ino e parauhia ’i e taata ino tera. Eita atoa oia e tâu‘a i to vetahi ê ati aore ra mauiui. No reira, mea ino te papa e a‘o i te tamarii no te haamauiui noa ia ’na. Ei papa maitai râ, e na reira ïa o ’na no te haapii aore ra paruru atu. E pinepine iho â eita tatou e taa no te aha te taata e rave ai i te tahi mea. E hape hanoa ïa to tatou mana‘o.

E hi‘opoa ana‘e ïa e piti tumu e mana‘o ai te rahiraa e mea ino te Atua. Te mau ati natura e te mau faautuaraa a te Atua i roto i te Bibilia. I reira noa e itehia ’i mai tera iho â anei oia.