Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA TIURAI 2013

 E HAAFATATA ’TU I TE ATUA

‘E ore Iehova e haapao i te huru o te taata’

‘E ore Iehova e haapao i te huru o te taata’

Ua hi‘o-ino-ê-na-hia anei oe no to oe iri, nunaa aore ra tiaraa? Mai te peu e e, e ere o oe ana‘e. Teie te tahi parau apî oaoa: E ere roa ’tu mai tera i te ra‘i. Ma te tiaturi, ua na ô te aposetolo Petero e “e ore te Atua e haapao i te huru o te taata.”—A taio i te Ohipa 10:34, 35.

I te fare o Korenelio to Petero parauraa i te reira. E taata no te nunaa ê o ’na e o Petero e ati Iuda ïa. E tupuraa taa ê mau teie. I tera tau, i hi‘o ino na te ati Iuda i te taata o te tahi atu nunaa a ore atu ai e hinaaro e faahoa ’tu. Eaha te tumu i tae ai Petero i te fare o Korenelio? Na Iehova i faanaho i taua farereiraa ra. Ma te hoê orama, ua na ôhia ’tu ia ’na: “O ta te Atua i tamâ ra, eiaha oe e parau e, e mea viivii.” Hoê mahana na mua a‘e, ma te tahi atu orama, ua faaue te melahi ia Korenelio ia tono e tii ia Petero. (Ohipa 10:1-15) Ua taa i te aposetolo e o Iehova te tumu o teie ohipa. Aita ïa o ’na i mǎta‘u i te parau i tei faahitihia ’tu na.

Ua na ô Petero: “Ua ite mau atura vau e ore te Atua e haapao i te huru o te taata.” (Ohipa 10:34) Ia au i te ta‘o Heleni, o “tei tâu‘a i te hoho‘a o te taata” ïa te auraa. (The Kingdom Interlinear Translation of the Greek Scriptures) Ua faataa te tahi aivanaa: “E au i te hoê haava o te hi‘o noa i te hoho‘a o te taata a horoa ’tu ai i ta ’na haavaraa. Aita te tupuraa mau i hi‘opoahia. Ua na reira râ ia au i ta ’na e au aore ra e ore e au i teie taata.” Eita te Atua e haafaufaa a‘e ia vetahi ê i te tahi atu no to ’na iri, nunaa, tiaraa aore ra huru rapaeau.

O te aau râ ta Iehova e hi‘o. (Samuela 1, 16:7; Maseli 21:2) I muri a‘e, ua na ô Petero: “O tei mǎta‘u râ ia ’na, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:35) Ma te faatura, faahanahana e tiaturi ia ’na e mǎta‘u ai tatou i te Atua. E haapae atoa tatou i te rave i te tahi mea o te faaoto ia ’na. E rave ana‘e i te parau-tia ma te haa ia au i to ’na hinaaro. E mauruuru ïa Iehova i te mea e na te mǎta‘u i turai ia na reira.—Deuteronomi 10:12, 13.

Ia hi‘o Iehova i te fenua nei mai te ra‘i mai, e ite oia hoê noa nunaa: te taata

Mai te peu e ua hi‘o-ino-ê-na-hia aore ra hamani-ino-hia oe no to oe iri aore ra te tahi atu tumu, e itoitohia ïa oe i ta Petero mau parau no nia i te Atua. Te faatae ra Iehova i te taata o te mau nunaa atoa i te haamoriraa mau. (Ioane 6:44; Ohipa 17:26, 27) E faaroo e e pahono oia i te mau pure a tei haamori ra ia ’na ma te ore e haapao i to ratou iri, nunaa e tiaraa. (Te mau arii 1, 8:41-43) Ia hi‘o Iehova i te fenua nei mai te ra‘i mai, e ite oia hoê noa nunaa: te taata. E hinaaro anei oe e ite atu â no nia i teie Atua o te ore e haapao i te huru o te taata?

Taioraa Bibilia

Ioane 17-21Ohipa 1-10